ەلميرا ەشنيازوۆانى Instagram جەلىسىن بەلسەندى قولداناتىن جەلى وقىرماندارى جاقسى تانيدى. قازاقتىڭ قايسار قىزى بار ۋاقىتىن جاقسىلىق جاساۋعا ارناپ ءجۇر. بۇگىندە ونىڭ جەكە قايىرىمدىلىق قورى بار. «ادىرنا» ۇلتتىق پورتالى قوعام بەلسەندىسىمەن بولعان سۇحباتتى نازارلارىڭىزعا ۇسىنادى.
- ەلميرا حانىم، ءدۇيىم جۇرت ءسىزدىڭ جەتىم بالالارعا كومەكتەسىپ جۇرگەنىڭىزدى جاقسى بىلەدى. جەكە قايىرىمدىلىق قورىن اشۋىڭىزعا نە تۇرتكى بولدى؟
- Instagram پاراقشامدى 2013 جىلى اشتىم. سول كەزدەن باستاپ پاراقشامدى بەلسەندى تۇردە جۇرگىزىپ كەلەمىن. 2017 جىلى، ورازا كەزىندە تانىمال بلوگەر، قىزىلوردالىق اينۇر بۇلاقباي, مۇحيت باتاەۆ دەگەن كىسىنىڭ كومەككە مۇقتاج ەكەنىن حابارلاپ، whatsapp جەلىسى ارقىلى ماعان حات جىبەردى. مەن بۇل اقپاراتتى بىردەن ءوز پاراقشاما سالدىم. بەس جىل بۇرىن جول اپاتىنىڭ سالدارىنان اياۋلى جارىنان ايىرىلىپ، جەتى بالاسىن جالعىز ءوزى ءوسىرىپ وتىرعان مۇحيت مىرزانىڭ تاعدىرى مەنىڭ وقىرماندارىمدى الاڭداتپاي قويمادى. پوستتى كورگەن حالىق “ەمي تاتە، كاسپي گولد اشىڭىز، سىزگە اقشا جىبەرەيىك، بىرگە كومەكتەسەيىك" دەپ شۋلاپ قويا بەردى. ول كەزدە كاسپي گولد دەگەندى كىم بىلگەن (كۇلىپ). ەرتەڭىنە ۇلكەن قىزىم گۇلنۇر مەنى بانككە اپارىپ، كارتا اشىپ بەردى. سودان سوڭ رەكۆەزيتىمدى جەلىگە سالىپ جىبەردىم. 3 كۇننىڭ ىشىندە حالىقتان 1,5 ميلليون تەڭگە اقشا جينالدى. ۆولونتەرلار دا تابىلا كەتتى. جينالعان اقشانىڭ بارلىعى دا مۇحتار اعايدىڭ كەرەك-جاراعىنا جۇمسالدى. مىنە، سودان بەرى توقتاماستان جۇمىس جاساپ كەلەمىن.
- قور وسى ۋاقىتقا دەيىن قانداي جەتىستىكتەرگە جەتتى؟
- الەۋمەتتىك جەلىدە «اسارلاتىپ» جىلۋ جيناۋدى ەڭ العاشقىلاردىڭ ءبىرى بولىپ باستادىم. قايىرىمدىلىق جاساۋعا حالىقتىڭ ءوزى يتەرمەلەپ جىبەردى. سودان بەرى جەكە ءومىرىمدى ۇمىتىپ كەتتىم دەسەم دە بولادى. كۇنى-ءتۇنى حالىقتىڭ مۇڭ-مۇقتاجىن تىڭداپ، كومەكتەسۋمەن كەلەمىن. مەنىڭ قورىمنىڭ ماقساتى - كامەلەتكە تولماعان تۇل جەتىم نەمەسە اناسى يا اكەسى قايتىس بولعان بالالارعا باسپانا الىپ بەرۋ. وسى ۋاقىتقا دەيىن قاراپايىم حالىقتان قارجى جيناپ، 43 وتباسىنىڭ باسپانالى بولۋىنا كومەكتەسىپپىن. ال سوڭعى رەت 2020 جىلدىڭ 3-شىلدەسىندە 70 جاستاعى مۇگەدەك اتاعا باسپانا الىپ بەرءىپپىز. اللا قالاسا ءالى دە مۇقتاج جاندارعا كومەكتەسە بەرمەكپىن.
- ءوزىڭىز باسپانا الىپ بەرگەن بالالارمەن ارالاسىپ تۇراسىز با؟
- ارينە، ارالاسقاندا قانداي! بالالارىم ۇنەمى ۋاتساپ جەلىسى ارقىلى حابارلاسىپ، مەرەكەلەردە قۇتتىقتاۋلارىن جىبەرىپ جاتادى. ال تۋعان كۇن تۋرالى ايتپاي-اق قويايىن (كۇلىپ). ينستاگرامداعى وقىرماندارىممەنۋلاپ-شۋلاپ، تۋعان كۇن تويلايتىن جايىمىز بار.
- وسى ءبىر توتەنشە جاعداي كەزىڭدە دە يگى ىستەرىڭىزدى جالعاستىرىپ، وتتەگى اپپاراتتارىن ساتىپ الۋعا ۇلەس قوستىڭىز. قارجى قانشا ۋاقىتتا جينالدى؟
- داۋلەت بالامنىڭ ارقاسىندا اينۇر حانىمنىڭ قورىنا اقشانى اۋدارىپ ۇلگەردىم.2800000 تەڭگە نەگىزى قورىمدا جينالىپ تۇرعان اقشا ەدى. ءار قازاق – مەنىڭ جالعىزىم! وسى ءبىر قيىن كەزەڭدە قورداعى اقشامدى وتتەگى اپپاراتتارىن ساتىپ الۋعا اۋدارىپ، حالىققا جاردەمدەسۋدى ءجون سانادىم.وسىلايشا 10 اپپاراتتى ساتىپ الۋعا سەپتىگىمىزدى تيگىزدىك.
- قازىرگى تاڭدا قايىرىمدىلىق جاساۋ قانشالىقتى ترەندتە دەپ ويلايسىز؟
- قايىرىمدىلىق جاساۋ ترەندتە دەپ ويلاماپپىن، ءتىپتى ونداي وي ەشقاشان ميىما كىرمەپتى. «قايىرىمدىلىق جاساساڭ، قايىرىن ءوزىڭ كورەرسىڭ» ،- دەيدى دانا حالقىمىز. ءوز باسىم قايىرىمدىلىقپەن جان راحاتى ءۇشىن، ادامدارعا سەپتىگىمدى تيگىزىپ، ولاردى قۋانتۋ ءۇشىن اينالىسامىن.
اڭگىمەلەسكەن: ديانا اسانوۆا،
«ادىرنا» ۇلتتىق پورتالى
