Elmıra Eshnııazovany Instagram jelisin belsendi qoldanatyn jeli oqyrmandary jaqsy tanıdy. Qazaqtyń qaısar qyzy bar ýaqytyn jaqsylyq jasaýǵa arnap júr. Búginde onyń jeke qaıyrymdylyq qory bar. «Adyrna» ulttyq portaly qoǵam belsendisimen bolǵan suhbatty nazarlaryńyzǵa usynady.
- Elmıra hanym, dúıim jurt sizdiń jetim balalarǵa kómektesip júrgenińizdi jaqsy biledi. Jeke qaıyrymdylyq qoryn ashýyńyzǵa ne túrtki boldy?
- Instagram paraqshamdy 2013 jyly ashtym. Sol kezden bastap paraqshamdy belsendi túrde júrgizip kelemin. 2017 jyly, Oraza kezinde tanymal bloger, qyzylordalyq Aınur Bulaqbaı, Muhıt Bataev degen kisiniń kómekke muqtaj ekenin habarlap, whatsapp jelisi arqyly maǵan hat jiberdi. Men bul aqparatty birden óz paraqshama saldym. Bes jyl buryn jol apatynyń saldarynan aıaýly jarynan aıyrylyp, jeti balasyn jalǵyz ózi ósirip otyrǵan Muhıt myrzanyń taǵdyry meniń oqyrmandarymdy alańdatpaı qoımady. Postty kórgen halyq “Emı táte, kaspı gold ashyńyz, sizge aqsha jibereıik, birge kómekteseıik" dep shýlap qoıa berdi. Ol kezde kaspı gold degendi kim bilgen (kúlip). Erteńine úlken qyzym Gúlnur meni bankke aparyp, karta ashyp berdi. Sodan soń rekvezıtimdi jelige salyp jiberdim. 3 kúnniń ishinde halyqtan 1,5 mıllıon teńge aqsha jınaldy. Volonterlar da tabyla ketti. Jınalǵan aqshanyń barlyǵy da Muhtar aǵaıdyń kerek-jaraǵyna jumsaldy. Mine, sodan beri toqtamastan jumys jasap kelemin.
- Qor osy ýaqytqa deıin qandaı jetistikterge jetti?
- Áleýmettik jelide «asarlatyp» jylý jınaýdy eń alǵashqylardyń biri bolyp bastadym. Qaıyrymdylyq jasaýǵa halyqtyń ózi ıtermelep jiberdi. Sodan beri jeke ómirimdi umytyp kettim desem de bolady. Kúni-túni halyqtyń muń-muqtajyn tyńdap, kómektesýmen kelemin. Meniń qorymnyń maqsaty - kámeletke tolmaǵan tul jetim nemese anasy ıa ákesi qaıtys bolǵan balalarǵa baspana alyp berý. Osy ýaqytqa deıin qarapaıym halyqtan qarjy jınap, 43 otbasynyń baspanaly bolýyna kómektesippin. Al sońǵy ret 2020 jyldyń 3-shildesinde 70 jastaǵy múgedek ataǵa baspana alyp berippiz. Alla qalasa áli de muqtaj jandarǵa kómektese bermekpin.
- Ózińiz baspana alyp bergen balalarmen aralasyp turasyz ba?
- Árıne, aralasqanda qandaı! Balalarym únemi ýatsap jelisi arqyly habarlasyp, merekelerde quttyqtaýlaryn jiberip jatady. Al týǵan kún týraly aıtpaı-aq qoıaıyn (kúlip). Instagramdaǵy oqyrmandarymmenýlap-shýlap, týǵan kún toılaıtyn jaıymyz bar.
- Osy bir tótenshe jaǵdaı kezińde de ıgi isterińizdi jalǵastyryp, ottegi apparattaryn satyp alýǵa úles qostyńyz. Qarjy qansha ýaqytta jınaldy?
- Dáýlet balamnyń arqasynda Aınur hanymnyń qoryna aqshany aýdaryp úlgerdim.2800000 teńge negizi qorymda jınalyp turǵan aqsha edi. Ár qazaq – meniń jalǵyzym! Osy bir qıyn kezeńde qordaǵy aqshamdy ottegi apparattaryn satyp alýǵa aýdaryp, halyqqa járdemdesýdi jón sanadym.Osylaısha 10 apparatty satyp alýǵa septigimizdi tıgizdik.
- Qazirgi tańda qaıyrymdylyq jasaý qanshalyqty trendte dep oılaısyz?
- Qaıyrymdylyq jasaý trendte dep oılamappyn, tipti ondaı oı eshqashan mıyma kirmepti. «Qaıyrymdylyq jasasań, qaıyryn óziń kórersiń» ,- deıdi dana halqymyz. Óz basym qaıyrymdylyqpen jan rahaty úshin, adamdarǵa septigimdi tıgizip, olardy qýantý úshin aınalysamyn.
Áńgimelesken: Dıana ASANOVA,
«Adyrna» ulttyq portaly
