قۇرمەتتى دوستار! الەۋمەتتىك جەلىلەردە «Biz Birgemiz» ۇرانى اياسىندا تەلەگرام-بوتتار مەن ءارتۇرلى ونلاين تولەم جۇيەلەرى ارقىلى 50 مىڭ تەڭگەدەن تاراتىلىپ جاتىر ەكەن دەگەن جالعان اقپارات پايدا بولعانىن حابارلايمىن.
كەيبىر ازاماتتار قوردىڭ قايىرىمدىلىق كومەگىن الۋ ءۇشىن 2485 تەڭگە مولشەرىندە بىرجولعى جيىنتىق تولەم تولەۋ قاجەت دەگەن فەيك حابار تاراتىپ جاتىر.
بۇل اقپارات شىندىققا جاناسپايدى. قور قاراجاتىنان بەرىلەتىن ماتەريالدىق كومەك الۋشىلارعا ەكىنشى دەڭگەيدەگى بانكتەر ارقىلى جەكە تۇلعانىڭ كارتوچكاسىنا نەمەسە اعىمداعى ەسەپشوتىنا اۋدارۋ تاسىلىمەن بەرىلەدى. بۇل رەتتە قانداي دا ءبىر قۇجات ۇسىنۋ نەمەسە سالىق تولەۋ تالاپ ەتىلمەيدى. سونىمەن قاتار بانكتەر ەشقانداي كوميسسيا المايدى، ەگەر الۋشىنىڭ بانك الدىندا نەسيەسى بويىنشا قارىزى بولسا دا، بۇل قاراجات وسى قارىزدى وتەۋ ءۇشىن ۇستالمايدى.
وزدەرىڭىز بىلەتىندەي، ەلباسىنىڭ باستاماسىمەن قۇرىلعان «Birgemiz» قورى العاشقى كۇننەن باستاپ 550 مىڭنان استام قازاقستاندىق وتباسىعا اتاۋلى كومەك كورسەتتى. سونداي-اق كوروناۆيرۋسپەن كۇرەسكە جۇمىلدىرىلعان 2 مىڭنان استام مەديتسينا قىزمەتكەرى دە 50 مىڭ تەڭگەدەن الدى. «Jas Otan» بەلسەندىلەرى 300 مىڭداي وتباسىعا ازىق-تۇلىك سەبەتتەرىن جەتكىزىپ بەردى. سونىمەن قاتار ەلباسى نۇرسۇلتان نازارباەۆتىڭ تاپسىرماسى بويىنشا ماقتاارال اۋدانىنداعى سۋ باسۋدان زارداپ شەككەن دوستىق اۋىلىنىڭ تۇرعىندارىنا ارناپ جاڭا ۇيلەر سالۋعا قوردان 340 ميلليون تەڭگە ءبولىندى.
«Birgemiz» قورى اشىق جانە ەسەپ بەرۋ قاعيداتتارى نەگىزىندە حالىقتىڭ الەۋمەتتىك ءالسىز توپتارىنا قولداۋ كورسەتۋ جۇمىستارىن ارى قاراي دا جالعاستىرا بەرەدى.
وسىنداي كۇردەلى كەزەڭدە كەيبىر تەرىس نيەتتى جانداردىڭ قيىندىققا دۋشار بولعان ازاماتتاردىڭ سەنىمىمەن ويناۋى وتە وكىنىشتى ءجايت.
قور باسشىلىعى مۇنداي الاياقتىق ارەكەتتەردىڭ جولىن كەسۋ ءۇشىن قۇقىق قورعاۋ ورگاندارىنا جۇگىنەدى.
تاعى دا قايتالاپ ايتقىم كەلەدى، تەك رەسمي اقپارات كوزدەرىنە عانا سەنىڭىزدەر!
