شىلدەدەگى كارانتين كەسىرىنەن ءبىر ميلليون قازاقستاندىق جۇمىسسىز قالادى. وسىنداي كوڭىل كونشىتپەس بولجامدى ەڭبەك جانە حالىقتى الەۋمەتتىك قورعاۋ مينيسترلىگىندە مالىمدەدى. بۇل تۋرالى "ادىرنا" ۇلتتىق پورتالى «ەۋرازيا» بىرىنشى ارناسىنا سىلتەمە جاساي وتىرىپ حابارلايدى.
قازىردىڭ وزىندە رەسمي ستاتيستيكا بويىنشا، شەكتەۋلەرگە بايلانىستى 700 مىڭنان استام ادام جۇمىسسىزدار تىزىمىندە ەسەپتە تۇر.
18 – ميلليون حالقى بار ەلىمىز ءۇشىن ءبىر ميلليون جۇمىسسىز دەگەن بۇل وتە ۇلكەن كورسەتكىش. دەي تۇرعانمەن، ءساۋىر ايىندا بۇل كورسەتكىش ءتورت ەسە كوپ بولعانىن ەستەن شىعارماۋ كەرەك. كارانتيندى الىپ تاستاعاننان كەيىن جاعداي تۇراقتاندى. ساراپشىلاردىڭ باعالاۋىنشا، قاتالدىعى جاعىنان الدىڭعىدان ءبىراز جۇمساقتاۋ بولسادا سوڭعى شەكتەۋلەردىڭ كەسىرىنەن، كەيبىر كومپانيالاردىڭ جانە ءتىپتى تۇتاس ءبىر سالالاردىڭ وز وزدەرىنە كەلۋىنە كوپ ۋاقىت قاجەت بولادى.
بانك ماسەلەلەرى جونىندەگى تاۋەلسىز ساراپشى نۇرجان بياقاەۆتىڭ پىكىرىنشە، ەكونوميكانىڭ ەڭ كوپ زارداپ شەككەن سەكتورىنىڭ ءبىرى – ول، بىرىنشىدەن تۋريزيم. ءبىزدىڭ ەلدىڭ بارلىق شەكارالارى جابىق بولعاندىقتان، قازىر قازاقستاندىقتار ۇشىن تۋريستىك ساپارلاردىڭ وزەكتىلىگى جوق دەۋگە بولادى. ال زارداپ شەككەن ەكونوميكانىڭ ەكىنشى سەكتورى، مەنىڭ ويىمشا، بۇل قىزمەت كورسەتۋ سالاسى. بۇل تۇرمىستىق قىزمەت كورسەتۋمەن اينالىساتىن سۋبەكتىلەرگە قاتىستى، دەپ اتاپ ءوتتى ساراپشى.
جەكە مەنشىك ءبىلىم بەرۋ ۇيىمدارى دا شاراسىز قالدى دەپ كاسىپكەرلەر شاعىمداندا. ولار دەنساۋلىق ساقتاۋ جانە ءبىلىم مينيسترلىكتەرىنەن جۇمىس ىستەۋگە رۇقسات بەرۋدى ءبىر ەمەس بىرنەشە رەت سۇراعان. توپتاردا بالالار سانى 5- 7 اسپايدى، قولعاپتار، ماسكالار، انتيسەپتيك قۇرالدارى – بارلىعى بار. ازىرگە بۇل وتىنىشتەرى جاۋاپسىز قالىپ وتىر. وسى سەبەپتى ولار ءوز مۇددەلەرىن قورعاۋ ماقساتىندا ءبىلىم سالاسىنداعى كاسىپكەرلەردىڭ اسسوتسياتسياسىن قۇرماق نيەتتە.
«بىزگە – قوعامدىق تاماقتانۋ، ازىق-تۇلىك دۇكەندەرى، كولىك – قۇرالدارى سالالارىنداي ارى قاراي جۇمىس ىستەۋگە رۇقسات بەرۋدى وتىنەمىز. سەبەبى ەرەسەكتەردە، بالالاردا دامۋعا مۇقتاج، قازىرگى كۇنى بالالاردىڭ ينتەللەكت سالاسىندا ءتيىستى دامۋسىز قالىپ وتىرعاندىقتارىنان كوپتەگەن ماسەلەلەر تۋىنداۋدا»، - دەپ اتاپ ءوتتى ءبىلىم بەرۋ ورتالىعىنىڭ ديرەكتورى مارحابا كۋرمانوۆا.
جيھازبەن اينالىساتىندار دا كارانتيننىڭ سىناعىن كوتەرە الماي قالۋى مۇمكىن. جيھاز جانە اعاش وڭدەۋ ونەركاسىبى كاسىپورىندارى قاۋىمداستىعىنىڭ مالىمەتى بويىنشا، ءىرى قالالاردا 30 مىڭعا جۋىق ادام جۇمىسسىز قالعان. پاندەميادان باسقا، مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرى ءۇشىن جيھاز ساتىپ الۋعا جاريالانعان ءۇش جىلدىق موراتوري دا بۇل سالاعا ايتارلىقتاي اسەر ەتتى. ءىرى ۇيىمداردان تاپسىرىستار تۇسپەيدى. جەكە تاپسىرىس بەرۋشىلەر دە ازايدى. كەيبىر كومپانيالاردا ءتۇسىم 90 پايىزعا دەيىن ازايىپ كەتتى.
ەلورداداعى جۇمىسپەن قامتۋ ورتالىعى، ادامدار جۇمىسسىز قالمايدى دەپ سابىرعا شاقىرۋدا. 5 700 بوس ورىن بار، كوپشىلىگى قۇرىلىس، ساتۋ، اۆتوموبيل جوندەۋ جانە ءبىلىم سالالارىندا. كارانتين كەزىندە جۇمىسقا ورنالاسۋ بويىنشا وتىنىشتەر سانى 20 پايىزعا ءوستى. سونىمەن بىرگە، تۇرعىندارعا «جۇمىسپەن قامتۋدىڭ جول كارتاسى» بويىنشا دا جۇمىس ۇسىنىلادى.
"اتالعان باعدارلاما بويىنشا 15 مىڭ ادامدى جۇمىسقا ورنالاستىرۋ جوسپارلانىپ وتىر، قازىر ول جەرگە ادامدار جەتىسپەي جاتىر. وندا قۇرىلىس، كوگالداندىرۋ جانە اباتتاندىرۋ سالالارىمەن بىرگە باسقا دا ماماندىقتار بويىنشا جۇمىستار بار. ەرتەڭ ءبىز ونلاين تۇردە - «بوس ورىندار جارمەڭكەسىن» وتكىزەمىز، ونى ايىنا ەكى رەت وتكىزىپ وتىرامىز. وندا الەۋەتتى قۇرىلىمدار سالاسىندا 500 بوس جۇمىس ورنى بار", - دەپ مالىمدەدى حالىقتى جۇمىسپەن قامتۋ ورتالىعىنىڭ ءباسپاسوز حاتشىسى گۇلميرا مۇقسۋلوۆا.
جىل باسىنان بەرى بۇكىل ەل بويىنشا حالىقتى جۇمىسپەن قامتۋ ورتالىقتارىنا 310 مىڭ قازاقستاندىق جۇگىنسە، ونىڭ 238 مىڭى جۇمىسقا ورنالاسقان. مامانداردىڭ ايتۋىنشا، ادامدار ءوز بەتىنشە جۇمىسقا ورنالاسادى نەمەسە جۇمىسسىز رەتىندە تىركەلەدى. قازىر ولار 181 مىڭ ادام.
ايتا كەتۋ كەرەك، 6 500 قازاقستاندىق تەك ماۋسىم ايىندا عانا جۇمىسسىزدىق بويىنشا جاردەماقى راسىمدەگەن كورىنەدى.
"ادىرنا" ۇلتتىق پورتالى
