«تاراز» ويىنشىلارى مەن ۇجىمى يۆل اپپاراتتارىن الىپ بەرەدى دەپ حابارلايدى كلۋبتىڭ رەسمي سايتى.
«تاراز» كلۋبىنىڭ ۇجىمى ەلىمىزدى ابىگەرگە سالعان الەمدىك پاندەميامەن كۇرەسىپ جاتقان دارىگەرلەر مەن مەديتسينا سالاسىنىڭ بارلىق قىزمەتكەرلەرىنە قۇرمەتپەن قاراپ، ادام جانىن اراشالاۋداعى ىستەرىنە باس يەدى. كۇن-ءتۇن دەمەي كۇزەتىپ، سىرقاتتانعان جانداردىڭ جانىنان تابىلىپ، جاردەم جاساۋى قانداي قۇرمەتكە بولسا دا لايىق.
بۇگىن فۋتبول كلۋبىنىڭ اكىمشىلىك قۇرامى مەن ويىنشىلارى كوروناۆيرۋس جۇقتىرعاندار مەن پنەۆمونيامەن اۋىرىپ جاتقان جانداردى ەمدەپ جۇرگەن ينفەكتسيوندى ستاتسيونارداعى 100 مەديتسينا مامانىنا تۇسكى اسقا ارناپ تاماق پەن جەمىس-جيدەك جەتكىزدى.
كلۋب باسشىسى تالعات تۇرلىبايۇلى:
-قاۋىپتى ينفەكتسيامەن كۇرەستە ەرلىك تانىتىپ، العى شەپتە جۇرگەن دارىگەرلەرگە دەگەن شىنايى قۇرمەتىمىزدى بىلدىرگىمىز كەلەدى. باستىسى ول جاندارعا رۋحاني دەمەۋ كورسەتۋ. ءبىز، قاراپايىم ازاماتتار دارىگەرلەرمەن بىرگە ەكەنىمىزدى، ولاردىڭ ءىسى ەرلىككە پارا پار ەكەنىن كورسەتۋ، - دەيدى.
بۇل يگى ءىس جامبىل وبلىسى اكىمدىگى مەن دەنە شىنىقتىرۋ جانە سپورت باسقارماسىنىڭ ۇگىت ناسيحات جۇمىسىنىڭ ناتيجەسى.
«تاراز» فۋتبول كلۋبىنىڭ باسشىلىعى شەتەلدەن 5 دانا يۆل اپپاراتىنا تاپسىرىس بەرىلىپ قويعانىن ايتتى. الداعى ۋاقىتتا جەتكىزىلمەك. ايتا كەتۋ كەرەك، فۋتبول كلۋبىنىڭ قىزمەتكەرلەرى مەن فۋتبولشىلارى وزدەرىنىڭ جەكە قاراجاتى ەسەبىنەن دەمەۋشىلىك تانىتتى.
ەسكە سالايىق، پاندەميا كەزەڭىندە بۇگىندە جامبىل وبلىسىندا ءۇش دارىگەر پنەۆمونيامەن اۋىرىپ، قايتىس بولدى. فۋتبول كلۋبى قايتىس بولعان مەديتسينا قىزمەتكەرلەرىنىڭ تۋىستارى مەن جاقىندارىنا قايعىسىنا ورتاق بولىپ، كوڭىل ايتادى.
