ميرامگۇل ورىنباسارقىزى - بۇرىنعى كىتاپحانا قىزمەتكەرى، بەس بالانىڭ اناسى. بىرنەشە جىلدان بەرى ديپلومى مەن جۇمىس ءوتىلىنىڭ بارىنا قاراماستان، اۋىلدىق كىتاپحاناعا جۇمىسقا ورنالاسا الماي ءجۇر. ميرامگۇل حانىم بىزگە جازعان حاتىندا مەكەمە باسشىسىنىڭ سوت شەشىمىن ورىنداماي جۇرگەنىن اتاپ ءوتتى. كوپبالالى انانىڭ جانايقايى «ادىرنا» ۇلتتىق پورتالىن بەي-جاي قالدىرمادى.
- سالەمەتسىزدەر مە، «ادىرنا» ۇلتتىق پورتالى جانە ونىڭ وقىرماندارى! مەن اقتوبە وبلىسى، ايتەكە بي اۋدانى، قارابۇتاق اۋىلىنىڭ تۇرعىنى، بەس بالانىڭ اناسى - ايتۋوۆا ميرامگۇل ورىنباسارقىزىمىن.
ماماندىعىم - كىتاپحاناشى. قارابۇتاق اۋىلدىق بالالار كىتاپحاناسىندا بوس جۇمىس ورنى بولعاندىقتان، ءارى ءوزىم كىتاپحاناشى ماماندىعىن بىتىرگەننەن كەيىن، «ايتەكە بي اۋداندىق جۇمىسپەن قامتۋ ورتالىعىنا» بارىپ، جۇمىسقا تۇرۋعا جولداما الدىم. الايدا، ايتەكە بي اۋداندىق ورتالىقتاندىرىلعان كىتاپحانالار جۇيەسى كمم-ءنىڭ باسشىسى م.اياعانۇلى ديپلومىم مەن جولداماما قاراماستان، جۇمىسقا الۋدان تۇبەگەيلى باس تارتتى. امالىم تاۋسىلعاننان، اۋداندىق ايتەكە بي سوتىنا جۇگىنىپ، كومەك سۇرادىم. سوت مەملەكەتتىك مەكەمەگە مەنى كىتاپحاناشى رەتىندە جۇمىسقا قابىلداۋ مىندەتتەلسىن دەگەن شەشىم شىعاردى. سوت وتىرىسىندا ك.جارىمبەتوۆ كىتاپحانا جۇيەسىنە كوۆوركينگ ورتالىعىن اشۋ ءۇشىن قىسقارتۋ پروتسەسى جۇرگىزىلىپ جاتقانىن ايتىپ، مەنى جۇمىسقا قابىلداۋ مۇمكىندىگى بولماي تۇرعانىن ءتۇسىندىردى. كەيىننەن ۇيعارىم بويىنشا سوت مەنىڭ تالاپ ارىزىم قاناعاتتاندىرىلسىن دەگەن شەشىمگە كەلدى.
بارماعان جەرىم، باسپاعان تاۋىم جوق. تالاي ەسىكتى قاقتىم، ەشكىم ارىزىما قۇلاق سالمادى. نەگىزگى ماماندىعىم كىتاپحاناشى بولعانىنا قاراماستان، اۋىلدىق كىتاپحاناعا جۇمىسقا كىرە الماي وتىرمىن. سوت شەشىمى مۇلدەم ورىندالمادى. وسى ۋاقىت ارالىعىندا كىتاپحانا ءوز جۇمىسىن توقتاتپادى. كوۆوركينگ ورتالىعى دا اشىلعان جوق. مەن جۇمىس سۇراپ جۇرگەن كەزدە ءبىر ەمەس, ەكى جۇمىس ورنى بوسادى. بىرەۋىنە جاس مامان، بىرەۋىنە تاعى ءبىر ادام كەلدى. ال مەنىڭ شاعىمىم قارالماي قالدى. سوت ورنىنا بارسام، ولار كاسىپوداق شەشىمىن اكەلۋىمدى تالاپ ەتىپ وتىر. الايدا، كاسىپوداق بۇل ماسەلەنى شەشە المايتىنىن جەتكىزدى.
سىزدەردەن ادىلدىك ورناتىپ بەرۋلەرىڭىزدى سۇرايمىن. مەنىڭ جانايقايىم جوعارى جاققا جەتىپ، سوت شەشىمى ورىندالسا ەكەن.
«ادىرنا» ۇلتتىق پورتالى ماسەلەنىڭ انىق-قانىعىنا جەتۋ ماقساتىندا «ايتەكە بي اۋداندىق ورتالىقتاندىرىلعان كىتاپحانالار جۇيەسى» كمم-ءنىڭ باسشىسى م.اياعانۇلىنا حابارلاستى. باسشى جاۋاپ بەرۋدەن باس تارتتى.
قۇرمەتتى قر مəدەنيەت مينيسترلىگى، اقتوبە وبلىسىنىڭ ادىلەت دەپارتامەنتى، اقتوبە وبلىسىنىڭ پروكۋراتۋراسى! سىزدەردەن وقيعامەن تانىسىپ، ءتيىستى شارالاردى قولدانۋلارىڭىزدى سۇرايمىز!
دايىنداعان: ديانا اسانوۆا
«ادىرنا» ۇلتتىق پورتالى
