"ماڭگى پۋتينگە جول جوق!" اكتسياسىنا شىققان جۇزدەن استام ادام ۇستالدى (ۆيدەو)

2338
Adyrna.kz Telegram

15 شىلدە كۇنى كەشكىسىن ماسكەۋدە وتكەن "ماڭگى پۋتينگە جول جوق!" اكتسياسىنىڭ جۇزدەن استام قاتىسۋشىسى ۇستالدى.اكتسيا رەسەي كونستيتۋتسياسىنا وزگەرىستەردى ەنگىزۋگە قارسى بولعان بەلسەندىلەر تارابىنان ۇيىمداستىرىلدى.

شارا كەشكى ساعات جەتىدە پۋشكين الاڭىندا باستالدى. وعان جۇزدەگەن ادام قاتىستى. اكتسيا ۇيىمداستىرۋشىلار ماسكەۋ مەرياسىنا ميتينگ وتكىزۋ جونىندە ءوتىنىش تۇسىرگەن. بىراق بيلىك رۇقسات بەرمەدى. وسىدان كەيىن ۇيىمداستىرۋشىلار كەزدەسۋ فورماتىندا وتكىزۋدى شەشكەن.

اكتسيا باستالعاننان ەكى ساعات وتكەننەن كەيىن قاتىسۋشىلار تۆەر كوشەسىن بويلاي ءجۇرىپ وتپەك بولدى. بىراق ولاردىڭ جولىن پوليتسيا جاساعى بوگەدى. ۇستالعانداردىڭ كوبى دەنە جاراقاتىن العانىن جەتكىزدى.

جالپى ماسكەۋ بويىنشا 103 ادامنىڭ ۇستالعانى حابارلاندى. ولاردىڭ اراسىندا قوعامدىق باقىلاۋ كوميسسياسىنىڭ مۇشەسى مارينا ليتۆينوۆيچ، "اشىق رەسەي" ۇيىمىنىڭ اتقارۋشى ديرەكتورى اندرەي پيۆوۆاروۆ، ماسكەۋ مەملەكەتتىك ۋنيۆەرسيتەتىنىڭ عىلىمي قىزمەتكەرى سەرگەي فيودوروۆ، مۋنيتسيپالدىق دەپۋتات يۋليا گاليامينا جانە ونىڭ قىزى بار.

اكتسياعا بىرنەشە ساعات قالعاندا، ماسكەۋدىڭ تاگان اۋداندىق سوتى گاليامينانى ميتينگ وتكىزۋ ءتارتىبىن قايتالاپ بۇزدى دەپ تانىپ، 200 مىڭ رۋبل كولەمىندە ايىپپۇل سالعان.

اكتسيا سانكت-پەتەربۋرگ قالاسىندا دا وتكەن. ازىرگە وندا ۇستالعاندار جونىندە مالىمەت جوق.

رەسەيدىڭ كونستيتۋتسياسىنا وزگەرىستەر ەنگىزۋ جونىندە بيىل قاڭتار ايىندا ەل پرەزيدەنتى ۆلاديمير ءپۋتيننىڭ ءوزى ۇسىنعان. ول وزگەرتۋلەر جالپى حالىقتىق داۋىس بەرۋ بويىنشا ءوتۋ كەرەك ەكەنىن ايتقان.

ورتالىق سايلاۋ كوميسسياسى تاراتقان رەسمي مالىمەتكە سايكەس، داۋىس بەرۋ ناتيجەسى بويىنشا وزگەرىستەردى سايلاۋشىلاردىڭ 78 پروتسەنتى قولداعان، 21 پروتسەنتى قارسى بولعان. داۋىس بەرۋگە سايلاۋشىلاردىڭ 65 پروتسەنتى قاتىسقان.

وزگەرتۋلەر كۇشىنە ەنگەننەن كەيىن رەسەيدىڭ كونستيتۋتسياسى حالىقارالىق قۇقىقتاردان جوعارى بولىپ، ەل باسشىسىنىڭ وسىعان دەيىنگى پرەزيدەنتتىك مەرزىمى جويىلادى. بۇل ۆلاديمير پۋتينگە تاعى ەكى رەت پرەزيدەنتتىك سايلاۋعا تۇسۋىنە مۇمكىندىك بەرەدى.

"ادىرنا" ءتىلشىسى  بۇعان دەيىن ءپۋتيننىڭ يمپەريالىق  پيعىلىن ايقىن كورسەتەتىن قاعيدالارىن جازعان بولاتىن.

Centralasia.org

پىكىرلەر