نۇرتورە ءجۇسىپ جاس تىلشىلەرگە اق باتاسىن بەردى

2150
Adyrna.kz Telegram

  2020 جىلدىڭ 7 شىلدەسىندە ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ تۇلەگى،  قازاقستان پارلامەنتى سەناتىنىڭ دەپۋتاتى، نۇرتورە ءجۇسىپ ينستاگرام پاراقشاسىندا (@journalism_kaznu) تىكەلەي ەفيردە ءدارىس وتكىزدى.

نۇرتورە اعامىز  تىكەلەي ەفيردە «نەگە جۋرنال، گازەت، كىتاپ وقيتىن جاستارىمىز ساۋساقپەن سانارلىقتاي از، مۇنشالىقتى تومەندەۋىنە نە سەبەپ؟»، «جۋرناليست – قوعام مەن ادامدى بايلانىستىرۋشى كۇش. ءسىز نە سەبەپتى جۋرناليست بولدىڭىز؟»، «قازاق جۋرناليستيكاسىنا نە جەتىسپەيدى؟» دەگەن جاس تىلشىلەردىڭ سۇراقتارىنا جاۋاپ بەردى.

بولاشاق جۋرناليستتەرگە كەڭەس بەرۋ ءۇشىن ەڭ الدىمەن ءتىلشىنىڭ قانداي بولۋى كەرەكتىگىنە توقتالدى: «جۋرناليست - جۇرەكتى ادامنىڭ ءىسى جانە بۇل سالانىڭ مامانى بولۋى ءۇشىن وي مەن ءتىل پاراساتتىلىعى كەرەك. ياعني، جۋرناليست ەڭ الدىمەن ساۋاتتى جانە امبەباپ بولۋى ءتيىس. وعان قوسا، ادەبيەت - اردىڭ ءىسى بولسا، جۋرناليست بولۋ دا اردىڭ ءىسى. سەبەبى جۋرناليست - ادال، ءادىل بولۋى كەرەك. ناعىز جۋرناليست - ۇلتىن سۇيەتىن، ۇلتتى سۇيە وتىرىپ، ۇلتىنا قىزمەت ەتەتىن ادام. ولار ەلىمىزدە كانداي جاعداي ورىن الماسىن، مايداندا جۇرگەن جاۋىنگەرلەر ىسپەتتەس! اباي اتامىز ايتقانداي: «تەگىندە، ادام بالاسى ادام بالاسىنان اقىل، عىلىم، ار، مىنەز دەگەن نارسەلەرمەن وزباق». ءجۋرناليستتىڭ بويىندا وسى ايتىلعان قاسيەتتەردىڭ بارلىعى بولۋى قاجەت» دەپ جاستارعا اقىلىن ايتتى.

قورىتىندىلاي كەلە، نۇرتورە ءجۇسىپ بولاشاق تىلشىلەرگە اق باتاسىن بەرىپ، «شەتەلدىك جۋرناليستەردىڭ جەتىپ جاتقان جەتىستىكتەرى ءبىزدى قامشىلاي تۇسەدى. ءبىزدىڭ بولاشاعىمىز سەندەرسىندەر، ياعني رۋحى ءور، ويى ەركىن جاستار» دەگەن سوزدەرىمەن ەفيرىن اياقتادى.

ايتا كەتەيىك، نۇرتورە ءجۇسىپ 1990 جىلدان - «ەگەمەن قازاقستان» گازەتىنىڭ ءبولىم مەڭگەرۋشىسى، باس رەداكتوردىڭ ورىنباسارى. 1996 جىلدان - «جاس الاش» گازەتىنىڭ باس رەداكتورى. 2002 جىلدان - «اق جول، قازاقستان» گازەتىنىڭ باس رەداكتورى. 2005 جىلدان - «ەگەمەن قازاقستان» رەسپۋبليكالىق گازەتى» اق باس ديرەكتورى. 2007 جىلدان - «استانا حابارى» گازەتىنىڭ باس رەداكتورى. 2008 جىلدان بەرى - «ايقىن» گازەتىنىڭ باس رەداكتورى «قۇرمەت» وردەنىمەن (2009), «قازاقستان رەسپۋبليكاسىنىڭ تاۋەلسىزدىگىنە 10 جىل» (2001), «قازاقستان كونستيتۋتسياسىنا 10 جىل» (2000) مەدالدارىمەن ماراپاتتالعان. قازاقستان جۋرناليستەر وداعىنىڭ ب. بۇلقىشەۆ اتىنداعى سىيلىعىنىڭ (1995), باق سالاسىنداعى پرەزيدەنتتىك سىيلىقتىڭ (1998), «التىن ادام» سىيلىعىنىڭ (2000) لاۋرەاتى.

مۇرات قىمبات،

الماتى ق. نزم مەكتەبى تۇلەگى

پىكىرلەر