بۇگىن الماتىدا 81 جاسقا قاراعان شاعىندا الاشتىڭ كورنەكتى ازاماتى، الەم حالىقتارى جازۋشىلار وداعىنىڭ مۇشەسى، قازاقستان جۋرناليستتەر وداعىنىڭ مۇشەسى، قازاقستان جازۋشىلار وداعى جانىنداعى «جەر جانە قازاق تاعدىرى» كوميتەتى توراعاسىنىڭ ورىنباسارى، حالىقارالىق مۇستافا كەمال اتاتۇرىك اتىنداعى «التىن» مەدالىنىڭ يەگەرى، قازاقستاننىڭ قۇرمەتتى ءجۋرناليسى، ءال فارابي اتىنداعى حالىقارالىق ادەبي سىيلىعىنىڭ لاۋرەاتى، پۋبليتسيست-جازۋشى، ساياساتتانۋشى، اكادەميك، بەلگىلى مەملەكەت جانە قوعام قايراتكەرى مولداعالي ماتقانۇلى ماتقان دۇنيەدەن وزدى.
مولداعالي ماتقانۇلى 3 قاڭتار 1940 جىلى اقتوبە وبلىسى شالقار اۋدانىندا دۇنيەگە كەلدى. ول 1969 ج. الماتى زووۆەتينستيتۋتىن بىتىرگەن. ينستيتۋتتا وقىپ جۇرگەن كەزدە وك كومسومولدا، شەتەلمەن بايلانىس ورناتۋ دوستىق ۇيىندە قىزمەتتەردى قوسا اتقاردى.
1973 ج. اسپيرانتۋرادا وقىپ، كانديداتتىق ديسسەرتاتسيانى مەرزىمىنەن ەرتە اياقتادى. 1973 ج. عا-نىڭ ميكروبيولوگيا جانە ۆيرۋسولوگيا ينستيتۋتىنا كونكۋرس نەگىزىندە عىلىمي قىزمەتكە ورنالاسىپ، سول ينستيتۋتتىڭ كاسىپوداق ۇيىمىن قوسا باسقاردى. 1977 ج. قپ وك جانىنداعى رەسپۋبليكالىق «ءبىلىم» قوعامىندا لەكتسيالىق ۇگىت-ناسيحات ءبولىمىنىڭ باستىعى، 1981 ج. «كىتاپ» قوعامىندا ءوندىرىس-باسپا ءبولىمىنىڭ باستىعى، «لۋچ» وندىرىستىك بىرلەستىگىنىڭ باس ديرەكتورى بولدى.
1990 جىلدان «اقنيەت» حالىقارالىق كوپسالالى ورتالىعىنىڭ پرەزيدەنتى قىزمەتىن اتقاردى. 2005 جىلدان «التىن ادام» جشس پرەزيدەنتى، ديرەكتورلار كەڭەسىنىڭ توراعاسى، ال 2007 جىلدان حالىقارالىق گۋمانيتارلىق ينۆەستيتسيالىق «شاقشاق جانىبەك تارحان» قورىنىڭ باس ديرەكتورى قىزمەتىن قوسا اتقاردى.
«جاساي بەر ءومىر»، «ەلىم قايتىپ كۇن كورەر؟!»، «نامىسسىز ۇرپاق – كۇرەسسىز قۇرىماق»، «اجداھالى اپات»، «تەكتىلىك تابىندىرماي قويماس»، «اسىلدان، قازاق!»، «ۇلى دالانىڭ ۇلىمىن» سىندى ت.ب. 15 كىتابى، 500-دەن استام حالىقتىق، ۇلتتىق كوكەيتەستى وتكىر ماسەلەلەرگە قاتىستى عىلىمي-پۋبليتسيستيكالىق، تاريحي-پالساپالىق، سىني ماقالالارى جارىق كوردى.
"ادىرنا" ۇلتتىق پورتالى
