قازاقتىڭ "قىز جىبەگى": ەلباسى - اراشا!

6616

قازاقستان رەسپۋبليكاسىنىڭ

                                                           تۇڭعىش پرەزيدەنتى - ەلباسى

                                                           نۇرسۇلتان نازارباەۆقا

ا ر ا ش ا    ح ا ت

اسا مارتەبەلى نۇرسۇلتان ءابىشۇلى!

بۇگىنگى سەكسەننىڭ سەڭگىرىنە تولعان تۋعان كۇنىڭىز قۇتتى بولسىن! قازاقستانىمىزدىڭ تاۋەلسىز مەملەكەت، ءبىرتۇتاس ەل رەتىندە ءبىرتۋار بولمىسىمەن الەمگە تانىلعانى، جۇرەگى «ەل» دەپ سوققان ءوزىڭىزدىڭ ەرەن ەڭبەگىڭىز بەن جاسامپاز ىستەرىڭىزدىڭ ارقاسى. حالقىمىزدىڭ قازىرگى باق-قۋاتتى ءومىرى، باياندى بولاشاعى ءۇشىن بۇكىل سانالى عۇمىرىڭىزدى ارناپ، ازاماتتىق قاجىر-قايراتىڭىزبەن ەڭبەك ەتىپ كەلەسىز. ءسىزدىڭ سىندارلى ساياساتىڭىزدىڭ ارقاسىندا قازاقستانىمىز بەدەلدى دە ابىرويلى، الەمدىك قاۋىمداستىق مويىنداعان، جەدەل دامۋدىڭ داڭعىل جولىنا تۇسكەن ەلدەردىڭ قاتارىنا ەندى. حالىقتىڭ وزىڭىزگە دەگەن سۇيىسپەنشىلىگى دە ەرەكشە. «ەلىن سۇيگەن، ەلى سۇيگەن ەلباسى» دەگەن قاناتتى ءسوزدىڭ حالىقتىڭ جۇرەگىنەن بەرىك ورىن الۋى - سونىڭ ايقىن دالەلى. قاي مەملەكەتكە بارساق تا ءجۇزىمىز جارقىن، بەينەمىز اسقاق.

ونەر مەن حالىق – ەگىز  ۇعىم. سوندىقتان ونەر الەمىندەگى دارىندار حالىق اراسىنان شىعادى. سىزگە وسى ۇلكەن وتىنىشپەن جۇگىنە وتىرىپ، ادىلەتسىزدىكتىڭ قۇربانى بولىپ وتىرعان، بولاشاعانىنان زور ءۇمىت كۇتتىرەتىن تالانت يەسى، بۇگىنگى كۇنى تاعدىرى قىل ۇستىندە تۇرعان ءالىبي قانىبەكۇلى وتەپبەرگەن ەسىمدى جاس ورەننىڭ تاعدىرىنا اراشا سۇرايمىن!

ءالىبيدى – ءوزىمنىڭ رۋحاني بالام دەپ ەسەپتەپ، ونەردەگى اناسىنا اينالدىم. ونەر-بىلىمگە دەگەن تالانتى مەن قابىلەتىن، قۇشتارلىعى مەن زياتكەرلىگىن بىلاي قويعاندا، شەبەرحانامىزدىڭ ستاروستاسى رەتىندە بىرگە وقيتىن دوستارىنا، وزىنەن كىشى وقيتىن ءىنى-قارىنداستارىنا دەگەن مەيىرىمى مەن جاناشىرلىق سەزىمىنە، ۇيىمداستىرۋشىلىق قابىلەتىنە كۋامىز. جۇرەگىندە تازالىق پەن ادىلدىكتى تۋ ەتكەن، ادامگەرشىلىك اسىل قاسيەتتەرى مول، بولاشاعىنان زور ءۇمىت كۇتتىرەتىن ءالىبي وتەپبەرگەن توعىز اي ءوتتى، تەمىر تورعا جازىقسىز قامالىپ، بوزتورعايداي شىرىلداپ وتىر. مەن دە بوتاسىن جوعالتقان ارۋاناداي جانىم – جابىرقاۋ، جۇرەگىم – جارالى.

قازاق ۇلتتىق ونەر ۋنيۆەرسيتەتىنىڭ 3 كۋرس ستۋدەنتى بولا ءجۇرىپ، كانيكۋل كەزىندە باۋىرلارىنا كومەكتەسۋ ءۇشىن، قوسىمشا قاراجات تابۋ ماقساتىندا 2019 جىلدىڭ  شىلدە ايىندا ءوزىنىڭ تۋىپ-وسكەن اقتوبە وبلىسىنداعى «ۆوستوك-اقبوبەك» جازعى لاگەرىنە تالىمگەر بولىپ ورنالاسىپ، قىزمەتىنە كىرىسكەننەن كەيىن 4 كۇننەن سوڭ، ءجاسوسپىرىم بالالارعا ازعىندىق جاسادى دەپ ايىپتالىپ، بيىلعى جىلدىڭ 26 ناۋرىزداعى اقتوبە قالالىق ماماندىرىلعان سوتىنىڭ ۇكىمىمەن 10 جىل جازاعا كەسىلىپ وتىر. بۇل وتە اۋىر جازا!

سىزگە جۇگىنبەس بۇرىن سوت ۇكىمىنە قاتىستى ءالىبيدى باسىنان باستاپ قورعاپ كەلە جاتقان قورعاۋشىلارى مەن باسقا دا ەلىمىزگە بەلگىلى كاسىبي زاڭگەر، مامانداردىڭ پىكىرىن بىلدىك. بارلىعى ءبىر اۋىزدان ۇكىمنىڭ زاڭسىز ەكەندىگىن، ءالىبيدى كىنالى دەپ تانىپ سوتتاۋعا جەتكىلىكتى دالەلدەردىڭ جوقتىعىن، كەرىسىنشە ونى تولىقتاي اقتاۋ كەرەكتىگىن ايتۋدا.

كەڭەس بەرگەن زاڭگەرلەردىڭ ءبىراۋىزدان ايتىپ وتىرعانى، سوت ۇكىمى - كوزگە ۇرىپ تۇرعان قاراما-قايشىلىقتار مەن زاڭسىزدىقتارعا تولىپ تۇر. اناسىز وسكەن ءالىبيىمدى تاعدىر ءبىر جىلاتتى، ەندىگى جەردە جۇرەگى مەيىرىمگە تولى ونەردەگى بالاپانىمنىڭ جاساماعان قىلمىسى ءۇشىن جازىقسىز سوتتالىپ تەمىر توردا  جىلايتىنى – جانىما باتىپ وتىر.

ال ونەرىنەن بولەك، وتباسى مەن ۇستازدارىنان العان تاربيەسى مەن ادامي قاسيەتتەرى مول - جاس.

ءالىبي وتەپبەرگەن – ۇلى دالانىڭ رۋحاني قۇندىلىقتارىن، ۇلتىمىزدىڭ تامىرى تەرەڭدە جاتقان مورالى مەن ەتيكالىق قاعيدالارىن بويىنا ءسىڭىرىپ وسكەن تاربيەلى، ونەگەلى جاس ەكەنىندىگىنە سەندىرەمىز.

ءالىبي وتەپبەرگەن – بولاشاق قازاق ونەرىنىڭ قايراتكەرى، جۇرەگى «ەل» دەپ سوققان مەملەكەتشىل جاس تۇلعا.

اسا مارتەبەلى نۇرسۇلتان ءابىشۇلى!

سىزدەن ءالىبي قانىبەكۇلى وتەپبەرگەنگە قاتىستى قىلمىستىق ىسىنە ارالاسىپ، قازاقستان رەسپۋبليكاسىنىڭ ەلباسى - قاۋىپسىزدىك كەڭەسىنىڭ توراعاسى رەتىندە ادىلەتتى ۇكىم شىعارىلۋىنا كومەكتەسۋىڭىزدى وتىنەمىز!

 

 زور وتىنىشپەن،

 مەرۋەرت وتەكەشوۆا، «قازاقتىڭ قىزجىبەگى»، قازاقستاننىڭ ەڭبەك سىڭىرگەن ءارتيسى، «پاراسات» جانە «قۇرمەت» وردەندەرىنىڭ يەگەرى

 

جانە ەلىمىزدىڭ ونەر قايراتكەرلەرى:

 ءاسانالى ءاشىموۆ، قازاقستاننىڭ ەڭبەك ەرى، كسرو جانە قازاقستاننىڭ حالىق ءارتيسى، قازاقستان تەاترلار اسسوتسياتسياسىنىڭ توراعاسى

 

ايمان مۇساقوجاەۆا، قازاقستاننىڭ ەڭبەك ەرى، قازاقستاننىڭ حالىق ءارتيسى، قازاق ۇلتتىق ونەر ۋنيۆەرسيتەتىنىڭ رەكتورى، مەملەكەتتىك سىيلىقتىڭ لاۋرەاتى

 

ەسكەندىر حاسانعاليەۆ، قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى

 

نۇرعالي ءنۇسىپجانوۆ، قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى

 

مايرا يلياسوۆا، قازاقستاننىڭ ەڭبەك سىڭىرگەن ءارتيسى، «پاراسات» جانە «قۇرمەت» وردەندەرىنىڭ يەگەرى،

 

قانات ايتباەۆ، مادەنيەت قايراتكەرى

 

سۆەتلانا ايتباەۆا، قازاقستاننىڭ ەڭبەك سىڭىرگەن قايراتكەرى

 

اسحات ماەميروۆ، قازاقستاننىڭ ەڭبەك سىڭىرگەن قايراتكەرى، فيلوسوفيا دوكتورى، ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ديرەكتورى

 

قاراقات ءابىلدينا، قازاقستاننىڭ ەڭبەك سىڭىرگەن قايراتكەرى

 

مەرۋەرت تۇسىپباەۆا، قازاقستاننىڭ ەڭبەك سىڭىرگەن قايراتكەرى، پەداگوگيكا عىلىمدارىنىڭ كانديداتى

 

التىناي جوراباەۆا، قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى،

 

التىناي نوگەربەك، قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ لاۋرەاتى

نۇركەن وتەۋىلوۆ، قازاقستاننىڭ ەڭبەك سىڭىرگەن قايراتكەرى

 

 

 

پىكىرلەر
رەداكتسيا تاڭداۋى