شىمكەنتتە اتموسفەرالىق اۋانىڭ جاي-كۇيىن كورسەتەتىن LED ەكراندار ورناتىلادى

2415
Adyrna.kz Telegram

 

بۇگىن شىمكەنت قالاسى اكىمدىگىندە شىمكەنت قالاسى تابيعي رەسۋرستار مەن تابيعات پايدالانۋدى رەتتەۋ باسقارماسىنىڭ باسشىسى احمەت تاتىباەۆتىڭ قاتىسۋىمەن اتقارىلعان جۇمىستار جانە جوسپارلار بويىنشا بريفينگ ءوتتى.

ءباسپاسوز ماجىلىسىندە احمەت وتەگەنۇلى اتالعان باسقارمانىڭ 6 ايلىق جۇمىسىن قورىتىندىلاپ، الداعى جوسپارلارى جايلى ايتتى.

– 2020 جىلى قورشاعان ورتاعا ەميسسيا ءۇشiن تولەمدەر ءتۇسىمى 975,916 ملن تەڭگە كولەمىندە جوسپارلانىپ، وسى جىلدىڭ 5 ايىندا ناقتى وندىرىلگەن تولەمدەر 440,5995 ملن تەڭگەنى قۇرادى. ياعني، جىلدىق جوسپار 45,15 پايىزعا ورىندالدى. ال التى اي قورىتىندىسىندا بۇل كورسەتكىشتى 50 پايىزدان اسىرامىز دەپ وتىرمىز. قازىرگى تاڭدا ءبىزدىڭ باسقارماعا قارايتىن «ا.اسقاروۆ اتىنداعى شىمكەنت مەملەكەتتىك دەندرولوگيالىق ساياباعى» مەن «جاسىل بەلدەۋ» مەكەمەسى بار. وزدەرىڭىزگە ءمالىم، بۇگىنگە دەيىن «دەندروساياباعىنىڭ» جاعدايى مۇشكىل بولعان. ساياباقتا 1979 جىلى 560 اعاش ءتۇرى بولسا، بۇل كۇندە 200-دەي عانا اعاش-بۇتا ءتۇرى قالعان. ياعني، «قىزىل كىتاپقا» ەنگەن اعاش تۇرلەرى دە بار. وسى ولقىلىقتاردىڭ ورنىن تولتىرىپ، بۇگىنگى تاڭدا اعاش ءتۇرىن 350-گە جەتكىزدىك. الداعى ەكى جىلدىڭ ىشىندە بۇل كورسەتكىشتى 560-قا جەتكىزەمىز. ودان بولەك، بيىل ساياباقتا باسقا دا جۇمىستار جۇرگىزىلۋدە. اتاپ ايتساق، ۆەلوجول توسەلىپ، 673 جارىق بەرۋشى قويۋدامىز. مۇنى جىل سوڭىنا دەيىن اياقتايمىز دەپ وتىرمىز. سونداي-اق، ابدەن توزىعى جەتكەن سۋعارۋ جۇيەسىنە قارجى ءبولىنىپ، سۋعارۋ جۇيەلەرى تولىق ورناتىلادى»، – دەدى باسقارما باسشىسى.

اتالعان بريفينگ بارىسىندا ا.وتەگەنۇلى باسقارماعا قاراستى «جاسىل بەلدەۋ» مەكەمەسى جايىندا ءسوز قوزعادى.

– «جاسىل بەلدەۋ» – قالامىزدىڭ وكپەسى. سول سەبەپتى بۇل قالا اكىمىنىڭ قاتاڭ باقىلاۋىندا. جوسپار بويىنشا 2025 جىلعا دەيىن قالانىڭ سىرتىنداعى جاسىل بەلدەۋ تولىعىمەن ورىندالادى. مۇنىڭ بارلىعى ۇكىمەتتىڭ قاۋلىسىمەن شاhاردىڭ دامۋ جوسپارىنداعى 85-تارماعىندا بەكىتىلگەن. وسى ورايدا اتقارىلعان جۇمىسىمىزدىڭ ءبىر بولىگىن جەتكىزە كەتسەم، دوستىق مولتەك اۋدانى، اقبوساعا كوشەسىندەگى 900 م جول بويىنا وتىرعىزىلعان اعاشتارعا كۇتىپ-باپتاۋ جۇمىستارى جۇرگىزىلدى. 1600 دانا راۋشان گۇلدەرى، 300 دانا بوزارشا، 773 دانا جاي جاپىراقتى اعاشتارىنىڭ ءتۇبىن قوپسىتىپ، سۋعارۋ شۇڭقىرلارى جاسالىپ جانە اعاشتار سۋعارىلدى. سونداي-اق، وسى جىلى ورمان جانە دالا القاپتارىندا ءورت ەڭ كوپ بولاتىن جەرلەرگە قوسىمشا 2 بەكەت ۇيىمداستىرىلدى»، – دەدى ا.تاتىباەۆ.

بريفينگ سوڭىندا باسقارما باسشىسى شىمكەنت قالاسى بويىنشا اتموسفەرالىق اۋانىڭ جاي-كۇيى جونىندە حالىقتى حاباردار ەتۋدى قامتاماسىز ەتۋ ماقساتىندا قالالىق بيۋدجەتتەن قارجى ءبولىنىپ، 2 دانا LED ەكراندى ورناتۋ ءۇشىن قالا اۋماعىنان جەر ۋچاسكەلەرىن راسىمدەۋ جۇمىستارى جۇرگىزىلىپ جاتقانىن جەتكىزدى.

ايتا كەتەيىك، وسى جىلدىڭ التى ايىندا «ا.اسقاروۆ اتىنداعى شىمكەنت مەملەكەتتىك دەندرولوگيالىق ساياباعىنا» 101 578 دەمالۋشى كەلگەن. ناتيجەسىندە، جەرگىلىكتى بيۋدجەتكە 2 803 225 تەڭگە سالىق تولەنگەن. ساياباققا كىرۋ اقىسى – 26,51 تەڭگە. ەسكەرتەتىن جايت، كارانتين رەجيمى ساقتالۋىنا بايلانىستى ساياباقتا ۇسىنىلاتىن اقىلى قىزمەت تۇرلەرى جۇرگىزىلىپ جاتقان جوق.

شىمكەنت 

پىكىرلەر