شىمكەنتتە بۇگىنگە دەيىن 3 320 پروۆيزورلى ورىن اشىلدى

2467
Adyrna.kz Telegram

شىمكەنت قالاسىندا ەپيدەميولوگيالىق جاعدايدى رەتكە كەلتىرۋ ماقساتىندا اۋقىمدى جۇمىستار اتقارىلۋدا. قالا اكىمى م.ايتەنوۆتىڭ تاپسىرماسىمەن شاھاردا بۇگىنگە دەيىن بارلىق مەديتسينالىق قۇرال-جابدىقتارمەن قامتىلعان 3 320 پروۆيزورلى ورىن اشىلدى. ونىڭ ىشىندە رەزەرۆتىك 450 ورىندىق پروۆيزورلى ورىن 1 شىلدە كۇنى جەڭىل اتلەتيكالىق سپورت كەشەنىنەن دايىندالدى. وعان قوسا قالادا 51 كۇندىزگى ستاتسيونار اشىلدى. ناتيجەسىندە، ناۋقاستارعا كومەك كورسەتۋ ەكى ەسەگە كۇشەيدى. وسى ورايدا قالا باسشىسى اۋرۋحانالار مەن ەمحانالارعا ءدارى-دارمەكتىڭ ءۇزىلىسسىز جەتكىزىلۋىن دە قاداعالاپ وتىر. ماسەلەن، كەشە قاجەتتى ورىنداردى دارىمەن قامتۋ مۇمكىندىگىن باعامداۋ ماقساتىندا ءدارى-دارمەك شىعاراتىن ءوندىرىس ورنى مەن ءىرى قويمالارعا باردى.

مۇرات دۇيسەنبەكۇلى، ەڭ الدىمەن، «SANTO» ءدارى-دارمەك زاۋىتىنا تابان تىرەپ، ءوندىرىس تسەحتارىن ارالادى. مۇندا قالا باسشىسى ينفەكتسيالىق ەرىتىندىلەر مەن ينفۋزيالار، قاتتى پەرورالدى دارىلىك زاتتار (تابلەتكالار، ساشە، تۇيىرشىكتەر), انتيبيوتيك ۇنتاقتارى، ستەريلدى ەمەس ەرىتىندىلەر شىعارىلىپ جاتقانىنا كوز جەتكىزدى. ءوز كەزەگىندە كومپانيانىڭ ءوندىرىس جونىندەگى ديرەكتورى سۆەتلانا مايورسكايا قالا اكىمىنە تاۋلىك بويى ءتورت اۋىسىمدا 830 قىزمەتكەر جۇمىس ىستەپ، ءونىمنىڭ 70 پايىزى كوتەرمە، 30 پايىزى بولشەك باعادا ساتىلىپ وتىرعانىن ايتتى.

م.ايتەنوۆ ءدارى-دارمەك قورىنىڭ مۇمكىندىگىن باقىلاۋ ءۇشىن قالامىزداعى ەڭ ءىرى «اقنيەت» جانە «زەردە» دارىلىك زاتتار قويمالارىنا دا باردى. اتالعان قويمالاردىڭ ديرەكتورلارى قالاداعى ءجۇز شاقتى دارىحاناعا ەكى مەزگىل ءدارى جەتكىزىلىپ وتىرعانىن العا تارتتى. ال ديستريبيۋتەرلەر قويمالارعا كۇنىنە ەكى-ءۇش كولىك ءدارى-دارمەك اكەلىنىپ جاتقانىن تىلگە تيەك ەتتى. وسى رەتتە قالا باسشىسى دارىلەردىڭ جەتكىزىلۋىندە ەشبىر كەدەرگى بولماۋىن تاپسىردى. سونداي-اق، م.دۇيسەنبەكۇلى جاڭادان سالىنعان جۇقپالى اۋرۋلارعا ارنالعان گوسپيتال مەن مەكتەپتەردە دايىندالىپ جاتقان كۇندىزگى ستاتسيونارلاردىڭ جۇمىسىمەن دە تانىستى.

قازىرگى تاڭدا شىمكەنت قالاسىندا ءتورتىنشى كاتەگورياداعى ۆيرۋسقا قارسى دارىلەرگە سۇرانىس جوعارىلاعان. سول سەبەپتى قويما كومپانيالارى تاپسىرىستارىن 5 ەسەگە ارتتىرعان. وسىعان وراي «زەردە» دارىلىك زاتتار قويماسى 15 كولىك، 5 ۆاگون ءدارى-دارمەك الدىرۋدا. «زەردە-فيتو» نپو جشس-ءنىڭ ديرەكتورىنىڭ ايتۋىنشا، بۇگىندە قالادا پاراتسەتامولدىڭ 50-گە تارتا انالوگتىك ءتۇرى ءدارىحانالاردا بار. كورشى ايماقتاعى جامبىل، قىزىلوردا جانە تۇركىستان وبلىستارىنان سۇرانىس كوپتەپ ءتۇسىپ جاتىر. بىراق، ەڭ الدىمەن، شىمكەنت قالاسىن تولىعىمەن قامتىپ بولعان سوڭ عانا وزگە وڭىرلەرگە جىبەرىلەدى ەكەن.

وسى رەتتە شىمكەنت قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى دارىحانالارداعى 77 ءدارىنىڭ تۇرىنە مونيتورينگ جاساعانىن جەتكىزگىمىز كەلەدى. ناتيجەسىندە، قالاداعى ءدارىحانالاردا ءدارى-دارمەك قورى جەتكىلىكتى ەكەنى انىقتالدى. ياعني، ىستىقتى تۇسىرەتىن دارىلەردىڭ (پاراتسەتامول، ەففەرالگان، پانادول، نۋروفەن، يبۋپروفەن، نيمەسۋليد) قورى 238 486 قوراپتى قۇراعان. ونىڭ ىشىندە ءدارىحانا قويمالارىندا – 115 389 قوراپ، ءدارىحانالاردا 123 097 قوراپ بار. ال ۆيرۋسقا قارسى دارىلەردىڭ (ينگاۆيرين، ەرگوفەرون، كاگوتسەل، ارپەفليۋ) قورى 38 187 جانە انتيبيوتيكتەردىڭ سانى (ازيتروميتسين، تسەفترياكسون، تسەفيكسيم، اموكسيتسيللين، لەۆوفلوكساتسين) 592 899 قوراپتى قۇراپ وتىر.

ايتا كەتەيىك، شىمكەنت قالاسىندا حالىقتىڭ دەنساۋلىعىن نىعايتۋ ماقساتىندا كۇندىزگى ستاتسيونار قىزمەتكەرلەرى دەمالىسسىز جۇمىس ىستەۋدە. ال بارلىق اۋرۋحانالار مەن ەمحانالارعا ءدارى-دارمەك ءۇزىلىسسىز جەتكىزىلۋدە.

شىمكەنت 

پىكىرلەر