قازاق ءاۋ باستان ىرىمشىل حالىق قوي. ەسكى زاماننان بۇگىنگە دەيىن ساقتالعان ىرىمدار جەتەرلىك. الايدا تومەندەگى نازارلارىڭىزعا ۇسىنىپ وتىرعان ىرىمدار «باسقاشالاۋ». كۇندەلىكتى ومىرىمىزدە ءجيى كەزدەسەتىن ىرىمدار. وقىپ كورىڭىزشى، راسىمەن سولاي عوي، قالاي ويلايسىز؟
- ەگەر وتباسىڭىزدىڭ نازارىن قالاپ نەمەسە ولاردىڭ قوڭىراۋىن كۇتسەڭىز، ۋاقىتتى ىسىراپ قىلماڭىز. دەرەۋ جۋىناتىن بولمەگە كىرىپ كەتىڭىز. 5 مينۋتتىڭ ىشىندە سىزگە بۇكىل الەم حابارلاسادى: 20 جىلدان بەرى ارالاسپاعان سىنىپتاسىڭىز قوڭىراۋ شالادى، حات تاسۋشى دا ءدال سول ساتتە ءسىزدى ەسىنە ءتۇسىرىپ، سالەمدەمە اكەلىپ، تۋىستارىڭىز ەسىكتى ۇرىپ، «تەزدەت!» دەپ ايعايعا باسادى، ال بالاعا گورشوك كەرەك بولا قالادى (ال ول جۋىناتىن بولمەدە).
- قىس پەن قاردان ابدەن مەزى بولساڭىز، سىزگە جىلى جاققا قونىس اۋدارۋدىڭ ەش كەرەگى جوق. جاي عانا شاڭعى، سنوۋبورد نەمەسە كونكي ساتىپ الىڭىز. ءدال سول جىلى كوكتەمگە دەيىن قار جاۋماي كۇيدىرەدى.
3.جاڭبىردى ۇناتپايسىز با؟ كۇن كوزىن بۇلت بۇركەگەننەن قولشاتىرىڭىزدى قولتىعىڭىزعا قىسا شىعىڭىز. ەشقاشان قولشاتىرىڭىزدى قولىڭىزدان تاستاماڭىز. اسپان قانشا تۇنەرىپ، اۋا رايى قۇبىلماسىن، ءسىز ۇيىڭىزدە قولشاتىرىڭىزدى ۇمىتىپ كەتپەيىنشە، جاڭبىر جاۋمايدى. ەگەر قولشاتىر الۋدى ۇمىتساڭىز، وزىڭىزگە وكپەلەڭىز، ءدال سول كۇنى جاۋىننىڭ استىندا قالىپ، مالمانداي سۋ بولاسىز.
4.ەگەر جۇمىسىڭىز، كولىگىڭىز نەمەسە تۋىستارىڭىز ساياجايعا بارىپ، باقشا جۇمىسىن ىستەۋىڭىزگە كەدەرگى كەلتىرسە، قىمبات مانيكيۋر جاساتىپ الىڭىز. قالاي تىرناعىڭىزعا بوياۋ جاعىپ، كۇتىم جاساۋدى باستايسىز، سول كەزدە تىرناقتى سىندىراتىن، قولىڭىزدى ءتىلىم ءتىلىم ەتەتىن جۇمىس شىعادى.
- كۇتكەن مارشرۋتىڭىز كەلمەي جاتىر ما؟ تەمەكى تارتىپ كورىڭىز. ەگەر قالتاڭىزدا سوڭعى تەمەكىڭىز قالسا، كەستەگە قاراماستان اۆتوبۋس ەكىنشى رەت تارتقانىڭىزشا، شاڭداتىپ تۇرىپ كەلەدى.
- ەگەر سىزگە كەتۋ كەرەك بوپ، بالامەن وتىراتىن ەشكىم تاپپاساڭىز، كەرەۋەتتى اۋدارىپ، جۋىلاتىن ىدىس-اياقتى تاۋداي قىپ تاستاڭىز، ۇتىكتەلمەگەن توسەك جاپقىشتاردى دا كوزگە كورىنەتىن جەرگە ءۇيىپ قويىڭىز. ءدال وسى ساتتە تىلسىم كۇشتەر ۇيىڭىزگە ەنەڭىزدى جەتەكتەپ اكەلە جاتقانىنا ءشۇباڭىز بولماسىن.
- كەيدە ويناۋعا شىققان بالاڭىزدى تاپپاي قالىپ، ازدان كەيىن تىنىشتاندىرعىش ءدارى ءىشىپ، تەلەفونعا جابىسىپ،ونداعان ادامعا قوڭىراۋ شالىپ، شاشىڭىز اقىرىنداپ اعارا باستاي ما؟ بالاڭىزدى تابۋدىڭ جولى وڭاي. دەرەۋ ايەلىڭىزدى قۇشاقتاپ، بەتىنەن سۇيە باستاڭىز. جاقىنداپ تا ۇلگەرمەيسىز...بالاڭىز ەسىكتى قاعىپ، ءوزى جەتىپ كەلەدى.
- ەگەر ءوزىڭىزدى بۇرىنعى جىگىتىڭىز بەن جاۋلارىڭىزدىڭ ەسىنە تۇسىرگىڭىز كەلسە، ... جوق، كەشىرىڭىز، قىزىل مازدانى كەلەسى جولى ايدايسىز. بۇل جولى باسىڭىزدى جۋماي، جاي عانا جىرتىق حالات كيىپ، قولىڭىزعا قوقىس شەلەگىن ۇستاپ سىرتقا شىعىڭىز. الدىڭىزدان كوپ اڭساتپاي اتا دۇشپانىڭىز نەمەسە كەزىندە مەنسىنبەي كەتكەن جىگىتىڭىز شىعا كەلەدى.
- تەلەفونمەن تۇتاس تانىستارىڭىز شارق ۇرىپ ىزدەگەنىن قالاساڭىز، كۇندىز ءبىر ۋاقىت تاۋىپ، جاي عانا ۇيىقتاڭىزشى. ءوزىڭىزدىڭ قانشالىقتى قاجەت ادام ەكەنىڭىزدى بىلەسىز.
- ەگەر ءوزىڭىز ۇناتپايتىن كورشى كەلىنشەك ەرتەڭ تاۋعا شىعىپ، دەمالۋدى جوسپارلاپ وتىرعانىن ەستىسەڭىز، وسى ءۇشىن كوڭىل كۇيىڭىز بىردەن تۇسسە، قامىقپاڭىز. ۇيگە كەلىپ، توقتاماي كىر جۋىڭىز دا، دالاعا جايىڭىز. كوپ ۇزاماي، اسپان تۇنەرىپ، جاڭبىر باستالادى. وكىنىشكە قاراي، ءسىز تۇگەل كەپپەگەن كىرلەرىڭىزدى ۇيگە كىرگىزەسىز، ال ەسەسىنە الگى كەلىنشەكتىڭ تاۋعا بارۋ جوسپارىنىڭ دا تالقانى شىعادى.
دايىنداعان ايجان قۇرمانباي،
«ادىرنا» ۇلتتىق پورتالى
