ۆاكتسينا سالىنعان العاشقى ادام
دجەننيفەر حاللەر mRNA-1273 ۆاكتسيناسىن 16 ناۋرىزدا سالدىرعان. ونىڭ ايتۋىنشا، ءبىرىنشى كۇنى دەنە قىزۋى كوتەرىلىپ، ەكىنشى كۇنى قولى اۋىرسىنعان. ارتىنشا جاعدايى جاقسارعان ەكەن. اتالعان ۆاكتسينا الدىمەن جانۋارلارعا سالىنىپ، تاجىريبە ءساتتى اياقتالعان. ارتىنشا تاجىريبەگە ەرىكتى ادامدار ىزدەستىرىلگەن. حاللەر العاشىندا تاجىريبەدەن وتۋگە كەلىسىم بەرگەنىندە قاتتى قوبالجىعانىن ايتقان.
دجەننيفەر حاللەر © iz.ru
عالىمداردىڭ سوزىنشە، سيەتلدەگى Kaiser Permanente Washington Health Research ينستيتۋتىندا ۆاكتسينا سالدىرعان دجەننيفەر حاللەر مەن تاعى 44 ەرىكتىنىڭ جاعدايى 2021 جىلدىڭ كوكتەمىنە دەيىن باقىلاۋدا بولادى.
رەسەي - كوروناۆيرۋسقا قارسى ۆاكتسينانى سىناقتان وتكىزگەن ەلدەردىڭ ءبىرى. 17 ماۋسىمدا ماسكەۋدە كوروناۆيرۋس ينفەكتسياسىنا قارسى ۆاكتسينانىڭ ەكى فورماسى سىناقتان وتكىزىلە باستادى. ونى گامالەي اتىنداعى ەپيدەميولوگيا جانە ميكروبيولوگيانى زەرتتەۋگە ارنالعان ۇلتتىق ورتالىق جاساپ شىعارعان. ربك مالىمەتىنشە، ەلدىڭ دەنساۋلىق ساقتاۋ مينيسترلىگى بۋردەنكو اتىنداعى اسكەري گوسپيتالدە تىشقاندارعا سىناۋعا ارنالعان سۇيىق ۆاكتسينا، ال سەچەنوۆ اتىنداعى ۋنيۆەرسيتەتتە ۇنتاق تۇرىندەگى ۆاكتسينانى سىناقتان وتكىزبەك.
ال 18 ماۋسىمدا كوروناۆيرۋسقا قارسى ۆاكتسينانى تەستىلەۋدەن وتكىزۋگە العاشقى 18 ادام قاتىسقان. ولار ەكى توپقا ءبولىنىپ، تاجىريبەگە قاتىسۋشىلارعا ەكى ءتۇرلى كومپونەنتتەگى ۆاكتسينا سالىنعان. بۇگىن ەكى توپتاعى ادامداردىڭ جاعدايى بەلگىلى بولدى. ريا نوۆوستي حابارىنا قاراعاندا، ەرىكتىلەردىڭ جاعدايى جاقسى. ولار بۋردەنكو اتىنداعى گوسپيتال ماماندارىنىڭ باقىلاۋىندا.
"ماعان ۆاكتسينانى قالاي سالعاندارىن سەزبەي دە قالدىم - قاراپايىم ارقاعا سالعان ەكپە سياقتى. ەشقانداي بەلگى جوق، دەنە قىزۋىم قالىپتى، 36,6 گرادۋس. باسىم اۋىرىپ تۇرعان جوق. تابەت قاشادى دەگەن، بىراق بۇرىنعىدان دا جاقسى تاماقتانىپ ءجۇرمىز. ءدارى ەككەن جەردە تەك نۇكتە تۇر، ەشقانداي اۋىرسىنۋ جوق", - دەيدى تاجىريبەگە قاتىسقان سەرگەي ەسىمدى ەر ادام.
تاجىريبەگە قاتىسقان نيكولاي ەسىمدى ەر ادام ۆاكتسينا سالىنعاننان كەيىن حال-جاعدايىندا ەشقانداي وزگەرىس بولماعانىن ايتادى.
"قىسىمىم مەن دەنە قىزۋىم كوتەرىلەدى دەپ ويلادىم. ىشتەي ءبىر وزگەرىس بولاتىنىن كۇتىپ ءجۇردىم. بىزگە باسقاشا سيمپتومدار پايدا بولۋى مۇمكىن دەپ ەسكەرتتى. بىراق ەشتەڭە بولعان جوق", - دەيدى نيكولاي.
ۆاكتسينانى سىناقتان وتكىزۋگە ەرىكتى تۇردە قاتىسقان يۋري ەسىمدى ەر ادامنىڭ سوزىنشە دە ەكپەدەن ەشقانداي وزگەرىس بولماعان.
© نتۆ
اۋرۋحانانىڭ انەستەزيولوگ-رەانيماتولوگى ولەگ چيحلياەۆتىڭ سوزىنشە تاجىريبەگە قاتىسۋشىلاردا ەشقانداي كەرى رەاكتسيا جانە اسقىنۋ بايقالماعان.
"تاجىريبە قاتىسۋشىلارى ۇنەمى دارىگەرلەردىڭ باقىلاۋىندا. ولار پرەپاراتتاردى، سونىڭ ىشىندە ۆاكتسينالاردى كلينيكالىق سىناقتان وتكىزۋدە ۇلكەن تاجىريبەسى بار دارىگەرلەر", - دەيدى مامان.
ال 27 جاستاعى چجۋ اوبين قىتايلىق عالىمدار دايىنداعان ۆاكتسينانى سىناقتان وتكىزۋگە قاتىسقان ەرىكتىلەردىڭ ءبىرى. ول ۆاكتسينا سالىنعاننان كەيىنگى جاعدايى تۋرالى CGتN قىتايلىق جاڭالىقتار ارناسىنا بولىسكەن.
"مەنىڭ جاعدايىم جاقسى. دەنە قىزۋىم بىرقالىپتى. ەرىكتىلەردىڭ اتىنان قولداۋ بىلدىرگەندەرىڭىز ءۇشىن بارشاڭىزعا العىس بىلدىرەمىن. كوپتەگەن باق وكىلدەرى مەن الەۋمەتتىك جەلى قولدانۋشىلارى ءبىزدى ناعىز باتىر دەپ اتايدى", - دەيدى ەرىكتى.
ايتا كەتەيىك، چجۋ اوبينگە كوروناۆيرۋسقا قارسى ۆاكتسينا 18 ناۋرىزدا سالىنعان. ول ءوزىنىڭ جاعدايى تۋرالى ۆاكتسينا سالىنعاننان كەيىن بەس كۇننەن سوڭ بولىسكەن.
دەرەككوز:Tengrinews.kz
