الماتىداعى سايران كولىندە شومىلۋ وتە قاۋىپتى. اي باسىندا الىنعان سىنامادان ماماندار ادام اعزاسىنا اسا قاۋىپتى ۆيرۋس انىقتالعانىن ايتتى. بۇل تۋرالى 24.kz. حابارلادى.
كول سۋىنا جۇرگىزىلگەن باكتەريولوگيالىق سىناما ناتيجەسى ادام اعزاسىنا اسا قاۋىپتى ۆيرۋس بارىن كورسەتكەن. سونداي-اق، سۋداعى ىشەك اۋرۋى تاياقشالارىنىڭ قالىپتى مولشەردەن توعىز ەسە اسىپ كەتكەنى انىقتالعان.
قازىرگى كەزدە كول اۋماعى قورشالىپ، سانيتارلىق قىزمەتتىڭ قاتاڭ ەسكەرتپەسىن ەلەمەي، سۋعا ءتۇسىپ، شومىلىپ جۇرگەن ادامداردىڭ ارەكەتى دۇرىس ەمەس دەيدى ماماندار.
«بۇگىننەن باستاپ اكىمدىك وكىلدەرىمەن جانە ارنايى ماماندارمەن بىرگە ءتۇسىندىرۋ جۇمىستارىن جۇرگىزەمىز. مۇنداي شارالار دەمالىس كۇندەرى دە جالعاساتىن بولادى»، – دەيدى المالى اۋداندىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ باسشىسى ساۋلە نۇرعاليەۆا.
ايتا كەتەيىك، ايدىڭ باسىندا الىنعان كول سۋىنىڭ سىناماسىنان ماماندار ا گەپاتيتىنىڭ ۆيرۋسى انىقتالعانىن ايتىپ وتىر. وسىدان كەيىن كول ماڭى قورشاۋعا الىنىپ، شومىلۋعا قاتاڭ تىيىم سالىندى.
"ادىرنا" ۇلتتىق پورتالى
