شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن دەنساۋلىق ساقتاۋ جۇيەسىن دامىتۋ پەرسپەكتيۆالارى بويىنشا جيىن ءوتىپ،
قالالىق دەنساۋلىق ساقتاۋ باسقارماسىنىڭ باسشىسى ر.الباەۆ 2020-2025 جىلدارعا ارنالعان دەنساۋلىق ساقتاۋ سالاسىن دامىتۋ جوسپارىن ۇسىندى.
بەس جىلدىق دامۋ جوسپارى نەگىزگى 4 باعىت بويىنشا جۇرگىزىلەدى. ولار: مەديتسينالىق كومەك كورسەتۋدى جەتىلدىرۋ، كادرلىق رەسۋرستاردى دامىتۋ، قوعامدىق دەنساۋلىق ساقتاۋ قىزمەتىن جەتىلدىرۋ جانە دەنساۋلىق ساقتاۋ ۇيىمدارىنىڭ ينفراقۇرىلىمىن دامىتۋ.
«ناتيجەسىندە ءومىر ءسۇرۋ ۇزاقتىعى 75 جاسقا دەيىن ارتادى، انا ءولىمى 25,3 پايىزدان 7 پايىزعا دەيىن تومەندەيدى، بالا ءولىمى 8,7-دەن 6,9 پايىزعا تومەندەيدى، جەكە ينۆەستيتسيالاردىڭ ۇلەسى 25%-عا دەيىن ۇلعايادى، ينسۋلت ورتالىعىنىڭ سانى 4-كە جەتەدى، مەكەمەلەر 100 پايىز تسيفرلاندىرىلادى» - دەدى ر.الباەۆ.
سونداي-اق، مەديتسينا ۇيىمدارىمەن مەموراندۋم جاسالىپ، بارلىق ينديكاتورلار بويىنشا باعالاۋ جۇرگىزۋگە، ۇيىمداردى باقىلاپ وتىرۋعا مۇمكىندىك بولاتىنىن جەتكىزدى.
جوسپاردا - ونلاين دارىگەرلىك كەڭەس بەرۋدى دامىتۋ جانە حالىقتىڭ دەنساۋلىق ماسەلەلەرى بويىنشا ساۋاتتىلىق دەڭگەيىن ارتتىرۋ ماقساتىندا ءموبيلدى قوسىمشالاردى پايدالانۋ نازارعا الىنعان.
جيىن سوڭىندا ءسوز العان مۇرات دۇيسەنبەكۇلى: «جوسپاردا ايتىلعاننىڭ بارلىعىن ىسكە اسىرۋعا مۇمكىندىك بار. دەنساۋلىق سالاسىنا جەتكىلىكتى قارجى بولىنەدى. مەديتسينالىق كومەكتىڭ ساپاسى مەن ونىڭ قول جەتىمدىلىگىنە باسا نازار اۋدارۋ قاجەت. سونىمەن قاتار، حالىققا پروفيلاكتيكا، تۇسىندىرمە جۇمىستارى كوپتەپ جۇرگىزىلسىن. جۇمىستاردى كورسەتىلگەن مەرزىمنەن ەرتە اياقتاۋدى تاپسىرامىن» - دەدى.
شىمكەنت
