شىمكەنت قالاسىندا ەپيدەميولوگيالىق جاعدايدىڭ ورشۋىنە بايلانىستى كارانتين شارالارى كۇشەيتىلەدى.
بۇگىن شىمكەنت قالاسى اكىمدىگىندە شىمكەنت قالاسى اكىمىنىڭ ءبىرىنشى ورىنباسارى ەربول سادىر قالاداعى ينفەكتسيالىق اۋرۋلاردىڭ تارالۋى جونىندە باق وكىلدەرىنە ارنايى سۇحبات بەردى.
ەربول ءابىلحايىرۇلى الدىمەن قالاداعى ەپيدەميولوگيالىق جاعدايدى جەتكىزدى.
– قازىر شىمكەنت قالاسىندا تەك قانا كوروناۆيرۋس ەمەس، جرۆي (جەدەل رەسپيراتورلى ۆيرۋستىق ينفەكتسيا) مەن پنەۆمونيا ءورشىپ تۇر. وسى بويىنشا ءبىز كۇندەلىكتى ناقتى جوسپارلى جۇمىستاردى جاساپ جاتىرمىز. ال پاندەميامەن اۋرۋشىلار سانى 2300-گە جەتتى. ونىڭ ىشىندە كەشەگى كۇنى 116 ادام تىركەلدى. سول سەبەپتى ناۋقاستار سانىنىڭ كۇرت وسۋىنە بايلانىستى جەدەل جاردەم قىزمەتىن كۇشەيتۋگە كۇش سالدىق. ءدال قازىر 100 بريگادا تولىقتاي جۇمىس ىستەۋدە. ودان بولەك، ديسپەتچەرلىك قىزمەتتى ۇلعايتتىق. سوڭعى تالداۋلار بويىنشا 1 ماۋسىمدا ءبىر تاۋلىكتىڭ ىشىندە 1091 شاقىرتۋ بولسا، 10 ماۋسىمدا 1200-دەن اسقان، ال كەشەگى كۇنى شاقىرتۋ 1850-گە جەتكەن. بۇل مەديتسينالىق شاقىرتۋلاردىڭ باسىم بولىگى – جرۆي جانە پنەۆمونيامەن اۋىرعان ناۋقاستار. ءدال كەشە 129 ناۋقاس قابىلدانعان. وسى جاعدايعا بايلانىستى الدىن الا كارانتيندىك جانە پروۆيزورلىق ستاتسيونارلاردى كۇشەيتتىك. ياعني، وسىدان بەس كۇن بۇرىن قوسىمشا 650 توسەك-ورىن ەنگىزدىك. سول توسەك-ورىندار بەس كۇننىڭ ىشىندە تولىپ قالدى. كەشەگى كۇنى رەابيليتاتسياعا قوسىمشا 100 توسەك-ورىن ۇيىمداستىردىق. بۇل رەتتە كارانتيندىك ستاتسيونار بولعان ەكى نىساندى 380 توسەك-ورىنمەن پروۆيزورلىق ستاتسيونار قىلىپ قوستىق. بۇل پروۆيزورلىق ستاتسيونارلاردا ەمدەۋ شارالارى كەزىندە ءۇش توپقا ءبولىپ، ارنايى الگوريتم جاسادىق. ال كەرى بايلانىستاعى قاۋىپتى توپتاعى ازاماتتارعا كۇندەلىكتى تەلەفونمەن حابارلاسىپ وتىرمىز. ايتا كەتەيىك، بۇل ستاتسيونارلار كوروناۆيرۋستىڭ جەڭىل تۇرىمەن اۋىرعان ازاماتتاردى ەمدەۋگە ارنالعان. اتالعان پروۆيزورلىق ستاتسيونارلار قالا اكىمى مۇرات دۇيسەنبەكۇلىنىڭ تىكەلەي تاپسىرماسىمەن ىسكە اسۋدا، – دەدى ە.سادىر.
سونداي-اق، ول پنەۆمونيامەن اۋىرعان ناۋقاستار سانى 7,2 پايىزعا وسكەنىن تىلگە تيەك ەتىپ، ەندىگى ماقسات كۇرت وسكەن بۇل دەرتتى اۋىزدىقتاۋ بويىنشا قارقىندى جۇمىس جىرگىزىلەتىنىن ايتتى. وسىعان وراي قالا اكىمىنىڭ تاپسىرماسىمەن قوسىمشا عيماراتتار اشىلاتىنىن بولدى.
– قازىرگى تاڭدا اۋرۋدى وتكىزىپ العان ناۋقاستاردىڭ ءولىم كورسەتكىشى ءوسىپ جاتىر. كەشە اۋىر جاعدايدا كەلگەن 8 ناۋقاس كوز جۇمدى. مۇنىڭ كوپشىلىگى – بۇرىننان سوزىلمالى اۋرۋلارى بار ازاماتتار. وسىعان بايلانىستى پروۆيزورلىق ستوتسيونارلار كۇشەيتىلىپ، بارىندە ءدارى-دارمەكتىڭ بارلىعى تولىق جەتكىلىكتى. بۇل جاعدايدى باقىلاۋدا ۇستاپ، جاقسارتۋ ماقساتىندا جەرگىلىكتى بيۋدجەتتەن 25 يۆل (وكپەنىڭ جاساندى جەلدەتۋ اپپاراتى) اپپاراتتى الدىق. بۇگىندە 301 يۆل اپپاراتى بار. ودان بولەك، جاتاقحانالارعا دەمەۋشىلەردىڭ كومەگىمەن 6 يۆل اپپاراتى قويىلدى. بۇل رەتتە دەمەۋشىلەردىڭ تاعى ءبىر كومەگىمەن 100 مىڭ بەتپەردە جانە كيسلورودپەن دەمالاتىن 100 بوبروۆا اپپاراتى كەلە جاتىر، – دەدى ە.ءابىلحايىرۇلى.
ارنايى سۇحباتتا قالا اكىمىنىڭ ءبىرىنشى ورىنباسارى قالادا ەپيدەميولوگيالىق جاعدايدىڭ ناشارلاۋىنا بايلانىستى 2020 جىلعى 23 ماۋسىمىنان باستاپ شەكتەۋ شارالارى كۇشەيەتىنىن دە جەتكىزدى.
اتاپ وتسەك:
1. بازارلاردىڭ جۇمىس كەستەسى تاڭەرتەڭ ساعات 06:00-دەن 16:00-گە دەيىن (ازىق-تۇلىك، ازىق-تۇلىك ەمەس، مال، كولىك بازارلارى), ال كوتەرمە ساۋدا بازارلارى ساعات 05:00-دەن 13:00-گە دەيىن شەكتەلەدى;
2. بارلىق ساۋدا نىساندارىنىڭ (ويىن-ساۋىق ورتالىقتارى، ساۋدا ورتالىقتارى، ساۋدا ۇيلەرى، دۇكەندەر، سۋپەرماركەتتەر، گيپەرماركەتتەر، كىشى-ماركەتتەر، زوو جانە گۇل ساتاتىن دۇكەندەر جانە ت.ب.) جۇمىس كەستەسى 10:00-دەن 18:00-گە دەيىن، ال جەكە ورنالاسقان ازىق-تۇلىك سۋپەرماركەتتەرى مەن دۇكەندەرى ساعات 21:00-گە دەيىن شەكتەلەدى;
3. الەۋمەتتىك اراقاشىقتىقتى جانە سانيتارلىق ەپيدەميولوگيالىق تالاپتاردى قاتاڭ ساقتاي وتىرىپ، قوعامدىق تاماقتاندىرۋ ورىندارىنىڭ (كافەلەر، مەيرامحانالار جانە ت.ب.) جۇمىس كەستەسى ساعات 09:00-دەن 21:00-گە دەيىن، ال دونەر، لاۆاش ورتالىقتارى، قۇيىلاتىن سۋسىندار مەن بالمۇزداقتار ساعات 10:00-دەن 18:00-گە دەيىن شەكتەلەدى;
4. ونلاين رەجيمىندە كورسەتىلەتىن قىزمەتتەردى قوسپاعاندا جۇمىسپەن قامتۋ جانە حالىققا قىزمەت كورسەتۋ ورتالىقتارىنىڭ جۇمىس كەستەسى تاڭەرتەڭ ساعات 08:00-دەن 12:00-گە دەيىن شەكتەلەدى;
5. قوعامدىق كولىكتەر دەزينفەكتسيالىق شارالاردى جالعاستىرا وتىرىپ، جۇمىس رەجيمى تاڭەرتەڭ ساعات 07:00-دەن 11:00-گە دەيىن جانە كەشكى ساعات 17:00-دەن 20:00-گە دەيىن شەكتەلەدى;
6. جۇمىس كۇندەرى (دۇيسەنبى – جۇما) قىزمەت كورسەتۋگە رۇقسات ەتىلگەن بارلىق وبەكتىلەردىڭ (قىزمەت كورسەتۋ سالاسىندا سونىڭ ىشىندە فيتنەس، مونشالار، ساۋنالار، SPA - سالوندارى جانە ساۋدا سالاسىندا سونىڭ ىشىندە پىسكەن تاعامداردى، فاسفۋد، جۇمساق بالمۇزداق، سۋسىندار، تاعى باسقا ساتۋ دۇڭگىرشەكتەرى، قارجى سالاسىندا) جۇمىس ۋاقىتى ساعات 10:00-دەن 18:00-گە دەيىن شەكتەلەدى. دەمالىس كۇندەرى (سەنبى، جەكسەنبى) جۇمىسى توقتاتىلادى.
ال دەمالىس كۇندەرىندەگى (سەنبى، جەكسەنبى) كارانتين شارالارى مىناداي:
1. جەكە ورنالاسقان ازىق-تۇلىك سۋپەرماركەتتەرى مەن دۇكەندەرىن (10:00-دەن 21:00-گە دەيىن) قوسپاعاندا، بارلىق ساۋدا بازارلارى (ازىق-تۇلىك، ازىق-تۇلىك ەمەس، مال، كولىك بازارلارى) جانە ساۋدا نىساندارىنىڭ (ويىن-ساۋىق ورتالىقتارى، ساۋدا ورتالىقتارى، ساۋدا ۇيلەرى، ونىڭ ىشىندە ورنالاسقان دۇكەندەر، سۋپەرماركەتتەر، گيپەرماركەتتەر، كىشى-ماركەتتەر، زوو جانە گۇل ساتاتىن دۇكەندەر) جۇمىستارى توقتاتىلادى;
2. بارلىق قوعامدىق تاماقتاندىرۋ ورىندارىنىڭ جۇمىسى جانە قوعامدىق كولىكتەردىڭ جۇمىسى توقتاتىلادى.
سۇحبات سوڭىندا كارانتين كەزەڭىندە جۇمىسىن توقتاتاتىن نىساندار دا ايتىلدى:
1. مەكتەپكە دەيىنگى (بالاباقشا، تۇزەتۋ ورتالىقتارى) ۇيىمداردىڭ جۇمىسى توقتاتىلادى;
2. سپورت نىساندارىنىڭ (فيتنەس-ورتالىقتارى، جاتتىعۋ زالدارى، سپورت باسسەينى جانە كەشەندەرى) جۇمىسى توقتاتىلادى;
3. بازارلاردىڭ سانيتارلىق كۇنى دەمالىس كۇنگە (سەنبى، جەكسەنبى) بەلگىلەنەدى;
4. قالا تۇرعىندارىنىڭ كوپشىلىك جينالاتىن ورىندارعا، ونىڭ ىشىندە ءجيى جينالاتىن ورىندار، جاياۋ سەرۋەندەۋ ورىندارى (كوشە), ساياباقتارعا، سكۆەرلەرگە، جاعالاۋعا، الاڭدارعا، بالالار جانە سپورتتىق الاڭدارىنا، تۋريستىك ورىندارعا بارۋعا شەكتەۋ قويىلادى.
ال قالا توڭىرەگىندەگى (شىمكەنتكە قارايتىن - رەد.) بارلىق مەديتسينالىق ۇيىمدار، ءدارىحانالار جانە قالانىڭ تىنىس-تىرشىلىگىنە قاتىستى بارلىق كوممۋنالدىق قىزمەتتەر قالىپتى رەجيمىندە جۇمىسىن جالعاستىرادى.
«قالا تۇرعىندارى كارانتيندىك ەرەجەلەردى ساقتاپ وتىرعان جوق. وزدەرىڭىز دە الەۋمەتتىك جەلىلەردەن كورىپ جاتقانداي توي-تومالاق وتكىزۋدە. نەگىزى ءاربىر ازامات ءوز ومىرىنە ءوزى جاۋاپتى. ال ءبىز كىنانى باسقا بىرەۋدەن ىزدەيمىز. بۇگىنگى دارىگەرلەر تاۋلىك بويى دەمالىسسىز جۇمىس ىستەۋدە. سول سەبەپتى اۋرۋ وشاقتارىندا جۇرگەن سوڭ، ولاردىڭ 20 پايىزى اۋىرىپ قالۋدا. وسىعان بايلانىستى اۋرۋحانالاردى تازا جانە لاس زونالارعا بولدىك. ويتكەنى دارىگەرلەردى ساقتاۋىمىز كەرەك. سونداي-اق، اق حالاتتىلاردىڭ ورنىن الماستىراتىن قوسىمشا مامانداردىڭ ءتىزىمىن جاساپ جاتىرمىز. الايدا ءبىر ايتا كەتەتىنى، ەگەر ءبىز سانيتارلىق نورمالاردى ساقتاماساق، دارىگەرلەردى دە ساقتاي المايمىز. وسىنى ءتۇسىنۋىمىز كەرەك»، – دەپ ءسوزىن اياقتادى قالا اكىمىنىڭ ءبىرىنشى ورىنباسارى.
شىمكەنت
