بۇل كۇندەرى كوروناۆيرۋس پاندەمياسىنىڭ اۋىلى الىستار ەمەس. قازىر شىمكەنت قالاسىندا توتەنشە جاعداي الىنعانىمەن، كارانتين ساقتالۋدا. سوندىقتان، ماماندار ۇسىنىپ وتىرعان قاراپايىم ساقتىق شارالارىنا ءمان بەرىپ، بارلىق تالاپتاردى ورىنداۋ ماڭىزدى بولىپ وتىر.
الەۋمەتتىك جەلىدە تۇرعىنداردان كوپتەگەن ساۋالدار ءتۇسىپ، قالاداعى دەنساۋلىق ساقتاۋ باسقارماسىنىڭ ماماندارى جاۋاپ بەرىپ كەلەدى. بۇگىنگە دەيىن ءتۇسىپ ۇلگەرگەن سۇراقتاردى سارالاي كەلىپ، ىرىكتەلگەن التى سۇراققا جاۋاپ ىزدەپ كوردىك. وسىعان بايلانىستى شىمكەنت قالاسى دەنساۋلىق ساقتاۋ باسقارماسىنىڭ جوعارى ساناتتى دارىگەر-ەپيدەميولوگى ماشيروۆ قوجاحمەت نامازبايۇلىمەن بولعان سۇحباتتى نازارلارىڭىزعا ۇسىنامىز.
- سيمپتومسىز كوروناۆيرۋس نەسىمەن قاۋىپتى؟
- ەشقانداي سيمپتومى جوق ناۋقاستار دا ۆيرۋس تاراتۋى مۇمكىن. بىرىنشىدەن، ولاردى مەديتسينالىق تىلمەن ايتقاندا ۆيرۋس تاسىمالداۋشىلار دەپ اتايدى، ەكىنشىدەن، ونداي ناۋقاستار 14 كۇن باقىلاۋدا بولۋى كەرەك. سەبەبى اۋرۋدىڭ بەلگىلەرى 14 كۇن ىشىندە بايقالۋى مۇمكىن.
- ەشقانداي سيمپتومى جوق ينفەكتسيا جۇقتىرعان ادام ۆيرۋستى تاراتا ما؟
- سيمپتومسىز كوروناۆيرۋستىڭ ەڭ قاۋىپتىلىگى، ول ادام ءوزىنىڭ دە اۋىرعانىن بىلمەيدى جانە ءوزىنىڭ اينالاسىنداعى ادامدار (جانۇيا مۇشەلەرى، جۇمىستاعى ارىپتەستەرى) جانە قورشاعان ورتاعا تاراتىپ، كۇنىنە بىرنەشە ادامعا جۇقتىرۋى مۇمكىن.
- ينفەكتسيا جۇقتىرعان ادام قاي كەزدە اۋرۋدان ايىققان بولىپ سانالادى؟
- ناۋقاس تولىق ەمدەلىپ شىققاننان كەيىن كلينيكالىق بەلگىلەرى تولىق جويىلىپ، ودان كەيىن الىنعان اناليز ناتيجەسى تەرىس بولعان كەزدە تولىق ايىققان بوپ ەسەپتەلەدى.
- كوروناۆيرۋس پەن تۇماۋدىڭ ايىرماشىلىعى؟ COVID-19 دەرتىنىڭ سيمپتومدارى قانداي؟
- كوروناۆيرۋستىڭ دا، تۇماۋدىڭ دا قوزدىرعىشى ۆيرۋس. ەكەۋى دە ينفەكتسيالىق جۇقپالى اۋرۋلار. بىراق قوزدىرعىش ۆيرۋستارى ءارتۇرلى. تۇماۋ ۆيرۋسى تەك قانا اۋا تاپشىلىعى جولىمەن جۇعاتىن بولسا، كوروناۆيرۋس اۋا تاپشىلىعى جانە قاتىناس ارقىلى جۇعادى. ەكىنشى ەرەكشىلىگى تۇماۋدىڭ ينكۋباتسيالىق كەزەڭى 5-7 كۇن، ال كوروناۆيرۋستىڭ بۇل كەزەڭى 14 كۇنگە سوزىلادى.
- تۇماۋعا قارسى سالدىرعان ەكپە COVID-19 ۆيرۋسىنان قورعاي ما؟
- جوق، قورعامايدى. ءبىر ينفەكتسياعا ارنالعان ەكپە ەكىنشى ءبىر ينفەكتسيادان قورعامايدى.
- ۆيرۋس جۇقتىرۋدان قالاي ساقتانۋعا بولادى؟
- قوعامدىق ورىنداردا مىندەتتى تۇردە بەتپەردە كيۋ، قولدى انتيسەپتيك قۇرالدارىمەن زالالسىزداندىرۋ، اراقاشىقتىق ساقتاۋ جانە جەكە باس گيگيەناسىن ساقتاۋ قاجەت.
شىمكەنت
