استانانىڭ كوپبالالى انالارى تاعى دا نارازىلىق اكتسياسىنا شىقتى. ولار بۇل جولى ەڭبەك جانە حالىقتى الەۋمەتتىك قورعاۋ مينيسترلىگىنىڭ الدىندا ءۇنسىز ميتينگ وتكىزدى، دەپ حابارلايدى SputnikNews.kz.
پيكەتكە قاتىسۋشىلار مەديتسينالىق بەتپەردە كيىپ، وعان قىزىل بوياۋمەن "سويلەمەيمىز" دەگەن بەلگى سالىپ قويعان. كوپبالالى انالار جۋرناليستەرگە دە سۇحبات بەرۋدەن باس تارتتى.
قالا اكىمىنىڭ كەڭەسشىسى داۋرەن بابامۇراتوۆتىڭ پىكىرىنشە، جەرگىلكتى بيلىك پيكەتكە شىققان ءاربىر انامەن جەكە-جەكە كەزدەسۋگە دايىن. ءتۇسىندىرۋ جۇمىستارى دا تۇراقتى تۇردە جۇرگىزىلەدى. كەڭەسشى پيكەتكە شىققاندارعا باسپانانىڭ نە سەبەپتى بەرىلمەي جاتقانىن ايتتى.
15 ايەل بىرنەشە پلاكاتقا ءوز تالاپتارىن جازىپ قويدى. سونىڭ ىشىندە باستاپقى جارناسىز جانە جالدامالى باسپانا بەرۋ، مۇقتاج حالىقتىڭ كرەديتىن كەشىرۋ سياقتى ناقتى تالاپتار بار. بۇلان بولەك، كوپبالالى انالار ۆاكتسيناعا قارسى ەكەنىن ءبىلدىردى. "اشتىق جاريالايمىز!" دەگەن پلاكات تا بار.
"قازىر نۇر-سۇلتاندا ءۇي كەزەگىندە 46 مىڭنان استام ادام تۇر. بىراق ءبىر نارسەنى ءتۇسىنۋ كەرەك، 2008-2010 جىلداردان بەرى ءۇي كەزەگىندە تۇرعان ازاماتتار بار. ولار ءالى ءۇي العان جوق. ال بۇل كىسىلەردىڭ كوپشىلىگى 2019 جىلى كەزەككە تۇرعان", - دەدى بابامۇراتوۆ.
ونىڭ سوزىنە قاراعاندا، پيكەتكە شىققان انالار "باقىتتى وتباسى" ارقىلى كرەديتتىك باسپانا الۋعا قۇقىلى. بىراق ونىڭ ءوزى كەزەك بويىنشا بەرىلەدى.
نۇر-سۇلتان قالاسىندا "باقىتتى وتباسى" بويىنشا 2 600-دەن استام ادام ءوتىنىش تاپسىرعان. ولاردىڭ 414-ءى جولداما العان. تۇرعىن ءۇي قۇرىلىس جيناق بانكى بارلىعىنا بىردەي كرەديت بەرمەيدى. ياعني، ونىڭ ىشىنەن تاعى ارتىلۋى مۇمكىن. سوندا ودان كەيىن كەزەكتە تۇرعان ازاماتتارعا ۇلەستىرىلەدى. قالا اكىمشىلىگى كۆوتانى "باقىتتى وتباسى" بويىنشا كۆوتانى ۇلعايتۋ ماسەلەسىن كوتەرىپ جاتىر", - دەپ اتاپ كورسەتتى بابامۇراتوۆ.
