Astananyń kópbalaly analary taǵy da narazylyq akııasyna shyqty. Olar bul joly Eńbek jáne halyqty áleýmettik qorǵaý mınıstrliginiń aldynda únsiz mıtıng ótkizdi, dep habarlaıdy SputnikNews.kz.
Pıketke qatysýshylar medıınalyq betperde kıip, oǵan qyzyl boıaýmen "sóılemeımiz" degen belgi salyp qoıǵan. Kópbalaly analar jýrnalısterge de suhbat berýden bas tartty.
Qala ákiminiń keńesshisi Dáýren Babamuratovtyń pikirinshe, jergilkti bılik pıketke shyqqan árbir anamen jeke-jeke kezdesýge daıyn. Túsindirý jumystary da turaqty túrde júrgiziledi. Keńesshi pıketke shyqqandarǵa baspananyń ne sebepti berilmeı jatqanyn aıtty.
15 áıel birneshe plakatqa óz talaptaryn jazyp qoıdy. Sonyń ishinde bastapqy jarnasyz jáne jaldamaly baspana berý, muqtaj halyqtyń kredıtin keshirý sııaqty naqty talaptar bar. Bulan bólek, kópbalaly analar vakınaǵa qarsy ekenin bildirdi. "Ashtyq jarııalaımyz!" degen plakat ta bar.
"Qazir Nur-Sultanda úı kezeginde 46 myńnan astam adam tur. Biraq bir nárseni túsiný kerek, 2008-2010 jyldardan beri úı kezeginde turǵan azamattar bar. Olar áli úı alǵan joq. Al bul kisilerdiń kópshiligi 2019 jyly kezekke turǵan", - dedi Babamuratov.
Onyń sózine qaraǵanda, pıketke shyqqan analar "Baqytty otbasy" arqyly kredıttik baspana alýǵa quqyly. Biraq onyń ózi kezek boıynsha beriledi.
Nur-Sultan qalasynda "Baqytty otbasy" boıynsha 2 600-den astam adam ótinish tapsyrǵan. Olardyń 414-i joldama alǵan. Turǵyn úı qurylys jınaq banki barlyǵyna birdeı kredıt bermeıdi. Iaǵnı, onyń ishinen taǵy artylýy múmkin. Sonda odan keıin kezekte turǵan azamattarǵa úlestiriledi. Qala ákimshiligi kvotany "Baqytty otbasy" boıynsha kvotany ulǵaıtý máselesin kóterip jatyr", - dep atap kórsetti Babamuratov.
