شوۋمەندەر ناپاقاسىز قالعانىن ايتىپ شاعىمدانۋدا

307

وتاندىق شوۋمەندەر قازاقستان پرەزيدەنتىنە جۇمىس ىستەۋگە رۇقسات بەرۋ تۋرالى اشىق حات جولدادى. توتەنشە جاعداي بولعاندىقتان، ولار العاشقىلاردىڭ ءبىرى بولىپ ءوز قىزمەتىن توقتاتتى، ەندى ولار باستى تابىس  كوزدەرىنەن ايىرىلىپ وتىر، دەپ حابارلايدى «ادىرنا» ۇلتتىق پورتالى zakon.kz-كە سىلتەمە جاساپ.

ەلدە كارانتين رەجيمى جۇمسارتىلعانىمەن ارتىستەر مەن جۇرگىزۋشىلەر قاشان جۇمىسقا شىعاتىنىن بىلمەيدى.

الماتىنىڭ ورتالىعىنداعى كەڭسەلەردىڭ ايلىق تولەمى 250 مىڭ تەڭگە. ال شوۋمەن رۋسلان ىسقاقوۆتىڭ جۇمىسى جۇرمەگەندىكتەن وعان تولەيتىن اقشاسى جوق.

“قازىر ەشقانداي كىرىس تاۋىپ وتىرعان جوقپىز. مۇنداي بولۋى مۇمكىن دەپ ەشقاشان ويلاماعان ەدىك. ءبىز بۇعان دەيىن ايىنا 10-15 ميلليون تەڭگەگە دەيىن اقشا تاۋىپ كەلدىك. بۇل قازان-قاراشادان ناۋرىز ايىنا دەيىنگى ماۋسىمداعى تابىسىمىز. روزا رىمباەۆادان باستاپ، «مۋزارت»-قا دەيىن بارلىعى تەك تويدان پايدا تابادى”، - دەيدى شوۋمەن رۋسلان ىسقاقوۆ.

ول 10 مىڭ دوللارعا دەيىن سىياقى الىپ جۇرگەن تەك اسابالار مەن انشىلەر عانا ەمەس، سونىمەن قاتار بي توپتارى، فوتوگرافتار، ستسەناريستەر دە ناپاقاسىن تاۋىپ كەلىپ، قازىرگى تاڭدا بارلىعى جۇمىسسىز وتىرعانىن ايتتى.

“تەك الماتىنىڭ وزىندە 300-گە جۋىق ءىرى ورتالىق بار.  ءار كوماندانىڭ جەتى مۇشەسى تاعى بار. دەمەك ءىس-شاراعا قاتىساتىن تەحنيكتەر، دەكوراتورلار، ديزاينەرلەر سەكىلدى 40-50 مىڭ ادام جۇمىسسىز وتىر” - دەپ جالعاستىرادى رۋسلان.

شوۋمەندەردى ولاردىڭ قىزمەتىنە دۇرىس ءمان بەرىلمەيتىنى قىنجىلتادى. ايگىلى اسابا كيريلل مەيستەر 10 جىل بويى ءتۇرلى مەرەكەلىك ءىس-شارالاردى جۇرگىزىپ كەلدى. مەيرامحانالار اشىلىپ، جۇمىسى باستالسا، قاتاڭ سانيتارلىق نورمالاردى ساقتاۋعا دايىن ەكەنىن مويىندادى. ەڭ باستىسى - جۇمىس ىستەۋگە رۇقسات بەرسە ەكەن دەيدى.

ء“بىز، جۇرگىزۋشىلەر، بەتپەردەدە جۇمىس ىستەۋگە، قاجەت بولعان جاعدايدا قولعاپتى دا پايدالانۋعا، ءار قوناقتىڭ سوزىنەن كەيىن ميكروفونعا انتيسەپتيك شاشۋعا دايىنبىز. بىزگە تەك جۇمىس ىستەۋگە مۇمكىندىك بەرۋىن قالايمىز”، - دەپ سۇرايدى جۇرگىزۋشى كيريلل مەيستەر.

ەۋرازيالىق ءىس-شارالار قاۋىمداستىعى باسقارماسىنىڭ مۇشەسى تيمۋر بالباەۆتىڭ ايتۋىنشا، ءىس-شارالاردى ۇيىمداستىرۋمەن بايلانىستى 350 مىڭنان استام رەسمي تىركەلگەن كومپانيا مەن ميلليون جۋىق ادام بار. قازىر ولاردىڭ ءبارى جۇمىسسىز قالدى. ويىن-ساۋىق بيزنەسىنىڭ قىزمەتكەرلەرى بازارلار مەن ساۋدا ورتالىقتارى اشىلىپ، شاعىن شارالاردى وتكىزۋگە رۇقسات ەتىلەدى دەپ كۇتكەن ەدى.

الايدا، مەيرامحانالاردىڭ اشىلۋى ەپيدەميولوگيالىق جاعداي جەتى كۇن ىشىندە تۇراقتالسا عانا مۇمكىن بولماق. «مەيرامحانالار مەن كافەلەر جابىق كەڭىستىك بولىپ سانالادى. ال جەلدەتۋ بارلىق جەردە بىردەي جۇمىس ىستەي بەرمەيدى. سوندىقتان، ءبىز جابىق جەرلەردە ادامدار جينالۋىنا تىيىم سالامىز»، - دەيدى الماتى قالاسى بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگى ءبولىمىنىڭ باستىعى ەلميرا وماروۆا.

ەپيدەميولوگيالىق جاعدايدى بولجاۋ وتە قيىن دەيدى دارىگەرلەر. سول سەبەپتى ءىس-شارالار قاي ۋاقىتتا جۇمىسىن باستايتىنى ازىرگە بەلگىسىز.

پىكىرلەر
رەداكتسيا تاڭداۋى