Shoýmender nápaqasyz qalǵanyn aıtyp shaǵymdanýda

308

Otandyq shoýmender Qazaqstan Prezıdentine jumys isteýge ruqsat berý týraly ashyq hat joldady. Tótenshe jaǵdaı bolǵandyqtan, olar alǵashqylardyń biri bolyp óz qyzmetin toqtatty, endi olar basty tabys  kózderinen aıyrylyp otyr, dep habarlaıdy «Adyrna» ulttyq portaly zakon.kz-ke silteme jasap.

Elde karantın rejımi jumsartylǵanymen ártister men júrgizýshiler qashan jumysqa shyǵatynyn bilmeıdi.

Almatynyń ortalyǵyndaǵy keńselerdiń aılyq tólemi 250 myń teńge. Al shoýmen Rýslan Ysqaqovtyń jumysy júrmegendikten oǵan tóleıtin aqshasy joq.

“Qazir eshqandaı kiris taýyp otyrǵan joqpyz. Mundaı bolýy múmkin dep eshqashan oılamaǵan edik. Biz buǵan deıin aıyna 10-15 mıllıon teńgege deıin aqsha taýyp keldik. Bul qazan-qarashadan naýryz aıyna deıingi maýsymdaǵy tabysymyz. Roza Rymbaevadan bastap, «MýzART»-qa deıin barlyǵy tek toıdan paıda tabady”, - deıdi shoýmen Rýslan Ysqaqov.

Ol 10 myń dollarǵa deıin syıaqy alyp júrgen tek asabalar men ánshiler ǵana emes, sonymen qatar bı toptary, fotograftar, senarıster de nápaqasyn taýyp kelip, qazirgi tańda barlyǵy jumyssyz otyrǵanyn aıtty.

“Tek Almatynyń ózinde 300-ge jýyq iri ortalyq bar.  Ár komandanyń jeti múshesi taǵy bar. Demek is-sharaǵa qatysatyn tehnıkter, dekoratorlar, dızaınerler sekildi 40-50 myń adam jumyssyz otyr” - dep jalǵastyrady Rýslan.

Shoýmenderdi olardyń qyzmetine durys mán berilmeıtini qynjyltady. Áıgili asaba Kırıll Meıster 10 jyl boıy túrli merekelik is-sharalardy júrgizip keldi. Meıramhanalar ashylyp, jumysy bastalsa, qatań sanıtarlyq normalardy saqtaýǵa daıyn ekenin moıyndady. Eń bastysy - jumys isteýge ruqsat berse eken deıdi.

“Biz, júrgizýshiler, betperdede jumys isteýge, qajet bolǵan jaǵdaıda qolǵapty da paıdalanýǵa, ár qonaqtyń sózinen keıin mıkrofonǵa antıseptık shashýǵa daıynbyz. Bizge tek jumys isteýge múmkindik berýin qalaımyz”, - dep suraıdy júrgizýshi Kırıll Meıster.

Eýrazııalyq is-sharalar qaýymdastyǵy basqarmasynyń múshesi Tımýr Balbaevtyń aıtýynsha, is-sharalardy uıymdastyrýmen baılanysty 350 myńnan astam resmı tirkelgen kompanııa men mıllıon jýyq adam bar. Qazir olardyń bári jumyssyz qaldy. Oıyn-saýyq bıznesiniń qyzmetkerleri bazarlar men saýda ortalyqtary ashylyp, shaǵyn sharalardy ótkizýge ruqsat etiledi dep kútken edi.

Alaıda, meıramhanalardyń ashylýy epıdemıologııalyq jaǵdaı jeti kún ishinde turaqtalsa ǵana múmkin bolmaq. «Meıramhanalar men kafeler jabyq keńistik bolyp sanalady. Al jeldetý barlyq jerde birdeı jumys isteı bermeıdi. Sondyqtan, biz jabyq jerlerde adamdar jınalýyna tyıym salamyz», - deıdi Almaty qalasy boıynsha taýarlar men qyzmetterdiń sapasy men qaýipsizdigi bóliminiń bastyǵy Elmıra Omarova.

Epıdemıologııalyq jaǵdaıdy boljaý óte qıyn deıdi dárigerler. Sol sebepti is-sharalar qaı ýaqytta jumysyn bastaıtyny ázirge belgisiz.

Pikirler
Redakııa tańdaýy