1997 جىلى ەلباسى ن.نازارباەۆتىڭ جارلىعىمەن 31 مامىر ساياسي قۋعىن-سۇرگىن قۇرباندارىن ەسكە الۋ كۇنى رەتىندە بەلگىلەنگەن ەدى. بۇل – قاسىرەتتى كەزەڭدە زوبالاڭ كورگەن حالقىمىزدىڭ كورنەكتى مەملەكەت جانە قوعام قايراتكەرلەرىنە دەگەن قۇرمەت. سودان بەرى اتالعان ءۇردىس جالعاسىپ كەلەدى. مەملەكەت باسشىسى قاسىم-جومارت توقاەۆتىڭ بۇگىنگى ۇندەۋى سوزىمىزگە دالەل.
پرەزيدەنت ۇندەۋ كەزىندە ناۋبەت قۇرباندارىن ماڭگى ەستە قالدىرۋ ءۇشىن مەملەكەتتىك دەڭگەيدەگى ءتيىستى شارالاردى جۇزەگە اسىرا باستاعانىن العا تارتتى. سونىڭ ءبىرى ق.توقاەۆتىڭ: «تاريحي ادىلدىكتى قالپىنا كەلتىرۋ جۇمىستارىن اياقتاپ، ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋدى تاپسىردىم» دەگەنى ءبارىمىزدى دە قۋانتتى. ياعني، ەلىمىزدىڭ تاريح بەتتەرىندە جاڭا پاراقتار اشىلادى دەگەن ءسوز.
بۇل بەتبۇرىس تاۋەلسىز قازاقستاننىڭ دىڭگەگىن قاتايتا تۇسەتىنى انىق. ال ءوز كەزەگىندە بۇگىنگى ۇرپاق وتكەن عاسىرداعى ەڭ قيلى كەزەڭنىڭ بىرىندە جازىقسىز جاپا شەككەندەردىڭ رۋحىنا تاعزىم ەتۋ پەرزەنتتىك پارىز ەكەنىن ۇمىتپاۋىمىز كەرەك!
يسامۋدين رىسباي،
شىمكەنت قالالىق ارداگەرلەر كەڭەسىنىڭ توراعاسى
