اقش-تىڭ ميننەسوتا شتاتىنداعى ميننەاپوليس قالاسىندا ءۇش كۇننەن بەرى جەرگىلىكتى تۇرعىندار كوتەرىلىپ جاتىر. ولار قارا ءناسىلدى تۇرعىن دجوردج فلويدتىڭ ولىمىنە پوليتسيانى كىنالاپ وتىر.
46 جاستاعى فلويد 25 مامىردا اۋرۋحانادا كوز جۇمدى. بۇنىڭ الدىندا ونى پوليتسيا ۇستاعان. ينتەرنەتتە تاراعان ۆيدەودا قولىنا كىسەن سالىنعان فلويد جەردە جاتىر، ال ونىڭ موينىن اق ءتۇستى پوليتسيا قىزمەتكەرى جەرگە قاتتى قىسىپ ۇستاپ تۇر. فلويد اۋا جەتپەي قالعانىن بىرنەشە مارتە قايتالاعان. ونىڭ ناقتى نەدەن قايتىس بولعانى ازىرگە بەلگىسىز.
فلويدتى ۇستاعان كەزدە وندا قارۋ بولماعان. پوليتسيا ونى قۇجاتتارى جالعان بولۋى مۇمكىن دەگەن كۇدىكپەن ۇستاعان.
فلويدتى ۇستاعان ءتورت پوليتسەي جۇمىستان شىعارىلدى. ءىستى فەدەرالدىق بارلاۋ بيۋروسى جۇرگىزىپ جاتىر. پوليتسيا قىزمەتكەرلەرىن جازالاۋدى ميننەاپوليس مەرى دجەيكوب فرەي تالاپ ەتتى. پوليتسيا ارەكەتىن تانىمال قوعام قايراتكەرلەرى مەن ساياساتكەرلەر ايىپتادى. ولاردىڭ اراسىندا بۇرىنعى ۆيتسە-پرەزيدەنت، الداعى پرەزيدەنت سايلاۋىنا ءتۇسۋى مۇمكىن دەموكرات دجو بايدەن دە بار.
قالاداعى باسكوتەرۋلەر 26 مامىردا كەشكە باستالعان. نارازى توپ پوليتسيا عيماراتىنىڭ الدىنا جينالدى. كەيبىرەۋى پوليتسيا قىزمەتكەرلەرىنە تاس لاقتىرسا، ولار حالىققا قارسى كوزدەن جاس اعىزاتىن گاز قولداندى.
نارازىلىق شەرۋلەرى قۇراما شتاتتاردىڭ باسقا دا شتاتتارىندا ءوتىپ جاتىر.
اقش ادىلەت مينيسترلىگى بەيسەنبى كۇنى دجوردج فلويد ءولىمىن ءادىل تەرگەۋگە كۇش سالاتىنىن مالىمدەدى.
centralasian
