اليشەر ۋسمانوۆ وزبەكستان تۇرعىندارىنا تاعى 1,5 ملن دوللار ءبولدى

2458
Adyrna.kz Telegram

رەسەيدىڭ تانىمال ميللياردەرى اليشەر ۋسمانوۆ وزبەكستاننىڭ نامانگان جانە ءاندىجان وبلىسىنداعى تۇرمىسى تومەن 6 مىڭ وتباسىعا 15 ميلليارد سۋم (1,5 ملن دوللار) ءبولدى.

جەرگىلىكتى باق-تىڭ حابارلاۋىنشا، كوپ بالالى وتباسىلار، اسىراۋشىسىنان ايىرىلعاندار جانە مۇمكىندىگى شەكتەۋلى ازاماتتاردىڭ ءتىزىمى الىنىپ، ولاردىڭ كارتالارىنا قاراجات اۋدارىلعان جانە كەيبىرىنە قولما-قول تابىس ەتىلگەن.

اليشەر ۋسمانوۆ بۇعان دەيىن  ساردوبا سۋ قويماسى اپاتىنان زارداپ شەككەندەرگە 15 ميلليون دوللار بولگەن. ونىڭ 10 ميلليونى وزبەكستاندىقتارعا بەرىلسە، قالعان 5 ميلليونى قازاقستاننىڭ تۇركىستان وبلىسى ماقتارال اۋدانى تۇرعىندارىنا كومەك رەتىندە جىبەرىلگەن.

اليشەر ۋسمانوۆتىڭ ءوزى وزبەكستاننىڭ نامانگان وبلىسى چۋست اۋدانىندا دۇنيەگە كەلگەن. رەسەيدىڭ جانە ۇلىبريتانيانىڭ ەڭ باي ادامدارىنىڭ قاتارىنا كىرەدى. Forbes مالىمەتى بويىنشا، ونىڭ بايلىعى 13,4 ملرد دوللارعا باعالانادى.

centralasian.org

پىكىرلەر