الماتى، 21 مامىر – Sputnik. كوروناۆيرۋس پاندەمياسى قازاقستانداعى اۋە تاسىمالىنىڭ تابىسىنا ايتارلىقتاي اسەر ەتتى. جولاۋشىلاردى تاسىمالداۋدان تۇسەتىن تابىس وتكەن جىلمەن سالىستىرعاندا 32,3%-كە ازايعان. ال ۇلتتىق ەكونوميكا مينيسترلىگىنىڭ مالىمدەۋىنشە، اۋە كەڭىستىگىنە قاتىستى سالالارعا مەملەكەت تاراپىنان قولداۋ كورسەتىلەدى.

"اۋە كولىگى كاسىپورىندارىنىڭ قاڭتار-ءساۋىر ايىندا جولاۋشىلاردى تاسىمالداۋدان تۇسكەن تابىسى 69,1 ميلليارد تەڭگەنى قۇرادى. مۇنى وتكەن جىلدىڭ سايكەس كەزەڭىمەن سالىستىرساق 32,3%-كە از", – دەلىنگەن Ranking.kz پورتالىندا جاريالانعان اقپاراتتا.

تابىس دەڭگەيى ناۋرىز ايىندا 13,8 ميلليارد تەڭگەنى قۇراعان. ال قازاقستاننىڭ ىشكى رەيستەرىنىڭ بارلىعى توقتاتىلعان 1 ساۋىرگە دەيىن جىل باسىنان بەرى اۋە كولىگىمەن 1,7 ميلليون جولاۋشى تاسىمالدانعان.

وسىعان وراي ۇلتتىق ەكونوميكا مينيسترلىگىنىڭ حابارلاۋىنشا، مەملەكەت تاراپىنان اۋە كومپانيالارى مەن اۋەجايلارعا قوسىمشا قولداۋ شارالارى ۇسىنىلادى. اتاپ ايتقاندا، جىل سوڭىنا دەيىن ۇشاققا ساتىپ الىنعان قوسالقى بولشەكتەر يمپورتى قوسىمشا قۇن سالىعىنان بوساتىلادى. تەحنيكالىق جانە وزگە دە قىزمەت كورسەتۋ تۇرلەرىنىڭ بارلىعى وسىنداي جەڭىلدىككە يە بولادى. سونداي-اق، اۋەجايلاردان جەر سالىعى مەن جەردى پايدالانعانى ءۇشىن ەشقانداي تولەماقى الىنبايدى.

ايتا كەتەيىك، قازاقستاندا 1 مامىردان باستاپ ۇشاقتار قايتا ۇشا باستادى. العاشقى كۇنى-اق ەلىمىزدىڭ ءىرى اۋەجايلارى ورنالاسقان نۇر-سۇلتان مەن الماتىدا 700-گە جۋىق ازامات اۋە كومپانيالارىنىڭ قىزمەتىن پايدالانعان.