Qazaqstannyń áýe tasymalyna memleket qandaı qoldaý kórsetedi

2834
Adyrna.kz Telegram

ALMATY, 21 mamyr – Sputnik. Koronavırýs pandemııasy Qazaqstandaǵy áýe tasymalynyń tabysyna aıtarlyqtaı áser etti. Jolaýshylardy tasymaldaýdan túsetin tabys ótken jylmen salystyrǵanda 32,3%-ke azaıǵan. Al ulttyq ekonomıka mınıstrliginiń málimdeýinshe, áýe keńistigine qatysty salalarǵa memleket tarapynan qoldaý kórsetiledi.

"Áýe kóligi kásiporyndarynyń qańtar-sáýir aıynda jolaýshylardy tasymaldaýdan túsken tabysy 69,1 mıllıard teńgeni qurady. Muny ótken jyldyń sáıkes kezeńimen salystyrsaq 32,3%-ke az", – delingen Ranking.kz portalynda jarııalanǵan aqparatta.

Tabys deńgeıi naýryz aıynda 13,8 mıllıard teńgeni quraǵan. Al Qazaqstannyń ishki reısteriniń barlyǵy toqtatylǵan 1 sáýirge deıin jyl basynan beri áýe kóligimen 1,7 mıllıon jolaýshy tasymaldanǵan.

Osyǵan oraı ulttyq ekonomıka mınıstrliginiń habarlaýynsha, memleket tarapynan áýe kompanııalary men áýejaılarǵa qosymsha qoldaý sharalary usynylady. Atap aıtqanda, jyl sońyna deıin ushaqqa satyp alynǵan qosalqy bólshekter ımporty qosymsha qun salyǵynan bosatylady. Tehnıkalyq jáne ózge de qyzmet kórsetý túrleriniń barlyǵy osyndaı jeńildikke ıe bolady. Sondaı-aq, áýejaılardan jer salyǵy men jerdi paıdalanǵany úshin eshqandaı tólemaqy alynbaıdy.

Aıta keteıik, Qazaqstanda 1 mamyrdan bastap ushaqtar qaıta usha bastady. Alǵashqy kúni-aq elimizdiń iri áýejaılary ornalasqan Nur-Sultan men Almatyda 700-ge jýyq azamat áýe kompanııalarynyń qyzmetin paıdalanǵan.

 

Pikirler