اسكەري-تەڭىز كۇشتەرىنىڭ بۇرىنعى باس قولباسشىسى 6 جىلعا سوتتالدى

2502

قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ بۇرىنعى باس قولباسشىسى جانداربەك جانۇزاقوۆ التى جىلعا سوتتالدى. بۇل تۋرالى سپۋتنيك.كز حابارلادى

اقمولا گارنيزونىنىنڭ اسكەري سوتى ونى «ۆيتسە-ادميرال» اتاعىنان ايىرىپ، 42 ملن تەڭگە كولەمىندەگى ماتەريالدىق شىعىندى وتەۋگە مىندەتتەگەن.

«قىلمىستىق كودەكستىڭ 49-بابىنا سايكەس، «ۆيتسە-ادميرال» اسكەري اتاعىنان دا ايىرىلدى. وعان قوسا، سوتتالعان ادامنان مەملەكەت كىرىسىنە 42 401 076 تەڭگە كولەمىندە ماتەريالدىق شىعىن وندىرىلەدى»، – دەلىنگەن اسكەري سوت بەرگەن مالىمەتتە.

18 مامىر كۇنى شىعارىلعان ۇكىمدە ۆيتسە-ادميرالدى التى جىلعا باس بوستاندىعىنان ايىرۋ تۋرالى جازاسى كەسىلگەن.

«جانۇزاقوۆ قىلمىستىق كودەكستىڭ 450-بابى 2-بولىگى («اۋىر زارداپتارعا اكەپ سوققان قىزمەت بابىن اسىرا پايدالانۋ») بويىنشا 6 جىلعا باس بوستاندىعىنان ايىرۋ جازاسىن ورتاشا قاۋىپسىز قىلمىستىق-اتقارۋ تۇزەۋ مەكەمەسىندە وتەيدى»، – دەلىنگەن سوت حابارلاماسىندا.

ازىرگە بۇرىنعى ۆيتسە-ادميرالدىڭ جازاسىن ناقتى قاي جەردە وتەيتىنى ناقتىلانباعان، ونى ءىىم انىقتايدى.

بۇدان بىلاي قىلمىستىق كودەكستىڭ 50-بابىنا سايكەس، جانۇزاقوۆ قارۋلى كۇشتەر قاتارىندا، قۇقىق قورعاۋ ورگاندارىندا جانە مەملەكەتتىك قىزمەتتە، كۆازيمەملەكەتتىك سەكتوردا قىزمەت ەتە المايدى.

ايتا كەتۋ كەرەك، ازىرگە سوت ۇكىمى زاڭدى كۇشىنە ەنبەگەن.

"سوت ۇكىمى زاڭدى كۇشىنە ەنبەگەنىن ەسكەرە وتىرىپ، بۇل ىسكە قاتىستى تولىعىراق پىكىر ءبىلدىرۋدى ورىنسىز دەپ ەسەپتەيمىز. ويتكەنى ونى اپەللياتسيالىق ينستانتسيا پىكىرى رەتىندە قابىلداۋى مۇمكىن", – دەپ ناقتىلادى اسكەري سوتتىڭ ءباسپاسوز قىزمەتى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket