قازاقستاننان مال شىعارۋعا تيىم سالىندى

1252

اۋىل شارۋاشىلىعى مينيسترلىگىنىڭ مالىمەتى بويىنشا، وتكەن جىلى قازاقستان شەتەلگە 156 مىڭ باس ءىرى قارا مال ساتقان. بۇل - تىرىلەي ەكسپورتتاعان مال سانى.

شەتەلگە ساتىلعان مالدىڭ  باسىم كوپشىلىگى 121,6 مىڭ باسى نەمەسە 78%-ى وزبەكستانعا،  14% -ى ارمەنياعا جىبەرىلگەن.

سونداي-اق ەلدەن 264 مىڭ باس قوي شىعارىلعان، ونىڭ جارتىسىنان استامى انالىق ەكەن. ۇساق ءمۇيىزدى مالدىڭ باسىم بولىگىن، ياعني 200 مىڭنان استامى (76%) وزبەكستان مەملەكەتىنە، 21,5 مىڭ باس (8,1%) رەسەي فەدەراتسياسىنا، 18 مىڭ باس (6,7%) ازىربايجانعا، شامامەن 12 مىڭ باس (4,5%) يران ەلىنە تاسىمالدانعان.

وسىلايشا ءتىرى مالدىڭ جاپپاي ەكسپورتى ەت باعاسىنىڭ وسۋىنە نەگىز بولعان. سونىمەن قاتار ەت وڭدەۋ كاسىپورىندارى مەن بورداقىلاۋ الاڭدارىنىڭ جۇمىسىن تومەندەتكەن. ياعني، ولار شيكىزات تاپشىلىعىن وتكەرگەن.

اگروونەركاسىپ كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنا سايكەس، مينيسترلىك الدىندا قايتا وڭدەلگەن ءونىم ەكسپورتىن 2,5 ەسەگە ارتتىرۋ مىندەتى تۇر.  وسىعان بايلانىستى، بورداقىلاۋ الاڭدارى مەن ەت كومبيناتتارىنىڭ ءوتىنىشىن ەسكەرىپ، اۋىل شارۋاشىلىعى مەن قارجى مينيسترلىكتەرىنىڭ بىرلەسكەن بۇيرىعىنا وزگەرىستەر ەنگىزىلدى. اتالعان بۇيرىق تەك تولدەيتىن مالدىڭ عانا ەكسپورتىن ۋاقىتشا شەكتەيتىن. جاڭا وزگەرىستەر بارلىق ءتىرى ءىرى قارا مال مەن ۇساق ءمۇيىزدى مالدى باسقا ەلدەرگە شىعارۋعا (ەكسپورتتاۋعا) تولىعىمەن تىيىم سالادى.

اتالعان وزگەرىستەر الداعى جىلدارى مال باسىن ساقتاپ، ونى  ۇلعايتۋعا، وتاندىق ەت كومبيناتتارىن ءتيىمدى باعاداعى ساپالى شيكىزاتپەن قامتاماسىز ەتۋگە جانە دايىن وڭدەلگەن ءونىمنىڭ ءوندىرىسى مەن ەكسپورتىن ارتتىرۋعا مۇمكىندىك بەرەدى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى