Aýyl sharýashylyǵy mınıstrliginiń málimeti boıynsha, ótken jyly Qazaqstan shetelge 156 myń bas iri qara mal satqan. Bul - tirileı eksporttaǵan mal sany.
Shetelge satylǵan maldyń basym kópshiligi 121,6 myń basy nemese 78%-y Ózbekstanǵa, 14% -y Armenııaǵa jiberilgen.
Sondaı-aq elden 264 myń bas qoı shyǵarylǵan, onyń jartysynan astamy analyq eken. Usaq múıizdi maldyń basym bóligin, ıaǵnı 200 myńnan astamy (76%) Ózbekstan memleketine, 21,5 myń bas (8,1%) Reseı Federaııasyna, 18 myń bas (6,7%) Ázirbaıjanǵa, shamamen 12 myń bas (4,5%) Iran eline tasymaldanǵan.
Osylaısha tiri maldyń jappaı eksporty et baǵasynyń ósýine negiz bolǵan. Sonymen qatar et óńdeý kásiporyndary men bordaqylaý alańdarynyń jumysyn tómendetken. Iaǵnı, olar shıkizat tapshylyǵyn ótkergen.
Agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasyna sáıkes, mınıstrlik aldynda qaıta óńdelgen ónim eksportyn 2,5 esege arttyrý mindeti tur. Osyǵan baılanysty, bordaqylaý alańdary men et kombınattarynyń ótinishin eskerip, aýyl sharýashylyǵy men qarjy mınıstrlikteriniń birlesken buıryǵyna ózgerister engizildi. Atalǵan buıryq tek tóldeıtin maldyń ǵana eksportyn ýaqytsha shekteıtin. Jańa ózgerister barlyq tiri iri qara mal men usaq múıizdi maldy basqa elderge shyǵarýǵa (eksporttaýǵa) tolyǵymen tyıym salady.
Atalǵan ózgerister aldaǵy jyldary mal basyn saqtap, ony ulǵaıtýǵa, otandyq et kombınattaryn tıimdi baǵadaǵy sapaly shıkizatpen qamtamasyz etýge jáne daıyn óńdelgen ónimniń óndirisi men eksportyn arttyrýǵa múmkindik beredi.
"Adyrna" ulttyq portaly
