ازاماتتاردى جۇمىسپەن قامتۋعا باعىتتالعان مەملەكەتتىك باعدارلامالاردى بەلسەندى ىسكە اسىرۋدىڭ ارقاسىندا مامىر ايىنىڭ باسىنان باستاپ «ەڭبەك» مەملەكەتتىك باعدارلاماسى اياسىندا 28,5 مىڭ قازاقستاندىق جۇمىسقا ورنالاستىرىلدى. ال، «جۇمىسپەن قامتۋدىڭ جول كارتاسى» باعدارلاماسى بويىنشا 14,8 مىڭ ادام جۇمىسپەن قامتىلدى.
«ەڭبەك رەسۋرستارىن دامىتۋ ورتالىعى» اق ماماندارىنىڭ ايتۋىنشا، كورونوۆيرۋس پاندەمياسى سالدارىنان 16 ناۋرىزدان باستاپ، ءساۋىر ايىنىڭ سوڭىنا دەيىن ەنگىزىلگەن كارانتين كەزەڭىندە ەلەكتروندىق ەڭبەك بيرجاسىندا بوس جۇمىس ورىندارىنىڭ سانى 3 ەسەگە ازايعان (2020 جىلدىڭ الدىڭعى ايلارىمەن سالىستىرعاندا).
ءبىرىنشى كەزەكتە جۇمىس ورىندارىنىڭ تومەندەۋى قىزمەت كورسەتۋ سەكتورىندا، ساۋدا، كولىك جانە ونەركاسىپ سالالارىندا تىركەلدى. الايدا، كارانتيندىك شارالار جەڭىلدەتىلگەننەن كەيىن ەڭبەك نارىعىنىڭ جاندانىپ، مامىر ايىنىڭ باسىنان باستاپ ەكونوميكانىڭ بارلىق سالالارىندا جۇمىس بەرۋشىلەر تاراپىنان سۇرانىس دەڭگەيىنىڭ بىرتىندەپ قالپىنا كەلۋى بايقالۋدا.
ماماندار ەڭبەك نارىعىنىڭ جاندانۋىنا «جۇمىسپەن قامتۋدىڭ جول كارتاسى» جانە «ەڭبەك» مەملەكەتتىك باعدارلامالارى ەرەكشە ءرول اتقارىپ وتىرعانىدىعىن اتاپ ءوتتى.
«داعدارىسقا قارسى شارالار ەلىمىزدىڭ بارلىق ايماقتارىندا ءوز اسەرىن بەرۋدە. اعىمداعى جىلدىڭ ءساۋىر ايىنان باستاپ جانە 19 مامىرداعى جاعداي بويىنشا جۇمىسپەن قامتۋ جول كارتاسى اياسىندا 44,7 مىڭ جۇمىس ورنى قۇرىلىپ، ولارعا جۇمىسپەن قامتۋ ورتالىقتارى ارقىلى شامامەن 14,8 مىڭ ادام جۇمىسقا ورنالاستىرىلدى. «ەڭبەك» باعدارلاماسى اياسىندا اعىمداعى جىلدىڭ 4 ايىندا 128,5 مىڭ ادام قامتىلدى، ونىڭ ىشىندە 118,3 مىڭ ادام ۋاقىتشا جانە تۇراقتى جۇمىسقا ورنالاستىرىلدى، 676 ادام وقۋعا جىبەرىلدى، 1,4 مىڭ ادام شاعىن نەسيە الدى. ال، 1-19 مامىر ارالىعىندا عانا «ەڭبەك» باعدارلاماسىنا 30,3 مىڭ ادام قاتىسىپ. ونىڭ 28,5 مىڭى جۇمىسپەن قامتىلعان»، - دەيدى «ەڭبەك رەسۋرستارىن دامىتۋ ورتالىعى» اق دەپارتامەنتىنىڭ ديرەكتورى جۇلدىز پەرنەباەۆا.
بوس جۇمىس ورىندارىن ورنالاستىرۋ بويىنشا اقمولا، قاراعاندى، قوستاناي، پاۆلودار، الماتى، ماڭعىستاۋ، شىعىس قازاقستان وبلىستارىنىڭ جانە نۇر-سۇلتان قالالارىنىڭ جۇمىس بەرۋشىلەرى بەلسەندىلىك تانىتۋدا.
قۇرىلىسشى-مونتاجشىلار، قۇرىلىسشى-ارلەۋشىلەر، سىرلاۋشىلار، دەنساۋلىق ساقتاۋ سالاسىنداعى كاسىبي ماماندار، ورتا مەديتسينالىق جانە فارماتسەۆتيكالىق قىزمەتكەرلەر، مەتالل وڭدەۋ، جابدىقتارعا قىزمەت كورسەتۋ جۇمىسشىلار، جۇرگىزۋشىلەر مەن وپەراتورلار ماماندىقتارى بويىنشا بوس جۇمىس ورىندارىنىڭ سانى وسكەن.
"ادىرنا" ۇلتتىق پورتالى
