ەلىمىزدىڭ توعىز ايماعىندا دابىلدى ەسكەرتۋ جاريالاندى

 توتەنشە جاعدايلار كوميتەتىنىڭ قىزمەتكەرلەرى قازاقستاندىقتاردى الداعى ەكى تاۋلىكتە رەسپۋبليكانىڭ بىرنەشە وڭىرىندە جاريالانعان دابىلدى ەسكەرتۋلەرگە بارىنشا ءمان بەرۋگە شاقىرادى.

سينوپتيكتەردىڭ ەسكەرتۋىنە سايكەس، جاۋىن-شاشىننىڭ بولۋىنا جانە كەي جەردە جاڭبىردىڭ قاتتى جاۋىنا بايلانىستى، 18-19 مامىر كۇنى الماتى، تۇركىستان وبلىستارىنىڭ تاۋلى اۋداندارىندا جانە الماتى قالاسىنا ىرگەلەس ايماقتاردا وزەندەردە سۋ دەڭگەيى كوتەرىلەدى جانە سۋ تاسقىنى بولادى.

18 مامىردا اقمولا وبلىسىنىڭ كەي جەرلەرىندە نايزاعاي ويناپ، داۋىل بولىپ، بۇرشاق جاۋىپ، سەكۋندىنا 15-20 مەتر جەل سوعادى.

شىمكەنتتە جاڭبىر قاتتى جاۋىپ، كۇن كۇركىرەپ، بۇرشاق جاۋى ىقتيمال، جەلدىڭ جىلدامدىعى – 15-20 م/c.

قوستاناي وبلىسىنىڭ كەي جەرىندە جاڭبىر جاۋىپ، كۇن كۇركىرەيدى، تۇمان تۇسەدى، بۇرشاق جاۋادى، سەكۋندىنا 15-20 مەتر جەل سوعادى.

قىزىلوردا وبلىسىنىڭ كوپ بولىگىندە جاڭبىر جاۋىپ، كەي جەرلەردە كۇن كۇركىرەيدى، جەل ەكپىنى 15-20, كەي جەرلەردە سەكۋندىنا 23-28 مەترگە دەيىن جەتەدى.

ماڭعىستاۋ وبلىسىنىڭ كەي جەرىندە تۇمان ءتۇسىپ، نايزاعاي وينايدى، جەلدىڭ جىلدامدىعى – سەكۋندىنا 15-20 مەتر.

سولتۇستىك قازاقستان وبلىسىنىڭ كەي جەرىندە نايزاعاي ويناپ، داۋىل بولادى، بۇرشاق جاۋىپ، تۇمان تۇسەدى، جىلدامدىعى سەكۋندىنا 15-20 مەتر جەل سوعادى.

تۇركىستان وبلىسىنىڭ تاۋلى ايماقتارىندا كەي جەردە جاڭبىر قاتتى جاۋىپ، نايزاعاي وينايدى، بۇرشاق جاۋادى، جەل ەكپىنى – 23 م/س.

قولايسىز اۋا رايىنان قالاي قورعانۋ كەرەك؟

توتەنشە جاعدايلار كوميتەتى ازاماتتاردى اۋا رايىنىڭ وزگەرىسىن باقىلاپ وتىرۋعا جانە دابىلدى ەسكەرتۋ تۋرالى حابارلامالاردى ەسكەرۋگە، بارلىق ساقتىق شاراسىن ساقتاۋعا شاقىرادى.

داۋىل كەزىندە، جەلدىڭ ەكپىنى سەكۋندىنا 15-30 مەترگە جەتكەن كەزدە ءۇي مەن پاتەردەگى ەسىك-تەرەزەلەردى جابۋ ۇسىنىلدى. اينەكتەلمەگەن بالكوندار مەن لودجيالاردان قاتتى جەل كەزىندە ءتۇسىپ كەتۋى مۇمكىن بارلىق زاتتى (قۇمىرا، بانكا، جاشىك، بوتەلكە جانە ت.ب.) الىپ تاستاۋ كەرەك.

كوشەدە جۇرگەن كەزدە داۋىل باستالسا، جارنامالىق قالقاندار مەن باسقا دا ءىلۋلى تۇرعان زاتتاردان، اۆتوبۋس ايالدامالارىنان، ەلەكتر جەلىلەرىنەن، سونداي-اق اعاشتاردان مۇمكىندىگىنشە الىس تۇرۋ كەرەك. قاتتى جەل باستالسا، جاقىن ماڭداعى عيماراتقا نەمەسە كەز كەلگەن جابىق جەردە جەلدىڭ باسىلۋىن كۇتۋ قاجەت.

اسىرەسە، ۇلكەن اعاشتاردىڭ استىندا قالماۋدى جانە ولاردىڭ استىندا اۆتوكولىك تۇرماعانىن مۇقيات قاداعالاۋ كەرەك، ويتكەنى اعاش قۇلاپ كەتۋى مۇمكىن. شىرىگەن جانە ەسكى، سونداي-اق، جالعىز تۇرعان اعاشتار ەرەكشە قاۋىپ توندىرەدى.