سۋ تاسقىنىنان زارداپ شەككەن ماقتاارال اۋدانىنا شىمكەنتتەگى «Bal-Tekstil» كىلەم فابريكاسى دا كومەك كورسەتتى.
اتاكەنت اۋىلىنداعى وبلىستىق شتاب قويماسىنا جالپى سوماسى 6 ملن تەڭگەلىك 404 كىلەم كەلىپ جەتكىزىلدى. اتالعان كىلەم كەرۋەنىن «Nur Otan» پارتياسى ساياسي كەڭەسىنىڭ مۇشەسى، «Bal-Tekstil» كىلەم فابريكاسىنىڭ ديرەكتورى، بەلگىلى كاسىپكەر-مەتسەنات تالعات ىسقاقوۆ ماقتاارالدىقتارعا دەپ ارنايى كومەك رەتىندە جونەلتىپتى.
«ماقتاارال اۋدانىنداعى سۋ تاسقىنىنان 6 مىڭعا جۋىق تۇرعىن زارداپ شەكتى. مىڭعا جۋىق وتباسى باسپاناسىنان ايرىلدى. 8 مىڭ گەكتارعا جۋىق ەگىستىك جەر مەن مال-مۇلىكتەرىن سۋ شايىپ كەتتى. وسىنى ەسكەرە وتىرىپ، ءبىزدىڭ ۇجىم دا ءمىرزاشول حالقىنا كومەك قولىن سوزۋدى ازاماتتىق بورىشىمىز دەپ سانادىق. ءبىز جىبەرگەن كىلەمدەر جاڭا ۇيگە كىرىپ، قونىس تويىن تويلايتىن تۇرعىندارعا تەگىن تاراتىلاتىن بولادى»، - دەيدى «Bal-Tekstil» كىلەم فابريكاسىنىڭ ديرەكتورى تالعات ىسقاقوۆ.
قويماعا كەلىپ تۇسكەن كىلەمدەردىڭ كوركى كوز تارتادى. كولەمدەرى دە سان قيلى. ۇيگە توسەلەتىن شاعىن ءارى ءىرى كىلەمدەر وبلىستىق شتابتىڭ ارنايى جيھاز، كورپە-توسەك جينالاتىن قويماسىنا ءتۇسىرىلدى.
ايتا كەتەيىك، بۇگىندە وبلىستىق شتاب قويماسىندا 300 مىڭ توننادان استام گۋمانيتارلىق كومەك كەلىپ جەتكەن. ونىڭ 91 مىڭ تونناسى ەۆاكۋاتسيا ورىندارىنا تاراتىلىپ بەرىلگەن.
شىمكەنت قالاسى
