قازاقستان رەسپۋبليكاسىنىڭ ۋكرايناداعى ەلشىسى دارحان كالەتاەۆ ۇلى وتان سوعىسىنىڭ ارداگەرى نۇرباي امانجولوۆتى جەڭىستىڭ 75 جىلدىعىمەن قۇتتىقتادى. بۇل تۋرالى قر ءسىم ءباسپاسوز قىزمەتى حابارلادى.
قازاقستاندىق ديپلومات 97 جاستاعى سوعىس ارداگەرىنە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ العىس حاتى مەن «بارىس» ءتوس بەلگىسىن تابىستاپ، وعان رۋحتىڭ سەرگەكتىگىن ساقتاۋدى، دەنساۋلىق پەن ۇزاق ءومىر تىلەدى. جۇزدەسۋ بارىسىندا ن.امانجولوۆ ءوزىنىڭ اسكەري ەرلىكتەرى تۋرالى ەستەلىكتەرىمەن جانە بەيبىتشىلىك ومىردەگى قىزىقتى وقيعالارىمەن ءبولىستى.
شىعىس قازاقستان وبلىسىنداعى كاتونقاراعاي اۋدانىنان مايدانعا 18 جاستاعى بوزبالا بولىپ اتتانىپ، ۋكراينا مەن پولشانى ازات ەتۋگە، ساندومير پلاتسدارمىن بۇزۋعا، ودەر وزەنىنەن وتۋگە، پراگانى بوساتۋعا قاتىسقان. سوعىستان كەيىن كارپات جانىنداعى اسكەري وكرۋگتە قىزمەت ەتىپ، پولكوۆنيك اتاعىمەن زەينەتكەرلىككە شىقتى. I دارەجەلى «وتان سوعىسىنىڭ قىزىل جۇلدىزى» جانە I دارەجەلى «بوگدان حمەلنيتسكي» وردەندەرىمەن، سونداي-اق 26 مەدالمەن ماراپاتتالعان. ارداگەر ءوزىنىڭ سانالى ءومىرىن ۋكراينادا وتكىزگەنىنە قاراماستان، ءوزىنىڭ وتانى - قازاقستان رەسپۋبليكاسىمەن تىعىز بايلانىسىن ساقتاپ قالعانىن جانە ۇلى وتان سوعىسىنىڭ ارداگەرلەرى مەن تىل ەڭبەككەرلەرىنە دەگەن مەملەكەت باسشىلىعىنىڭ قامقورلىعىن جوعارى باعالايتىنىن اتاپ ءوتتى.
