دەنساۋلىق ساقتاۋ مينيسترلىگى حالىقتى جالعان مالىمەتتەرگە سەنبەۋگە جانە رەسمي اقپارات كوزدەرىنەن مالىمەت الۋعا شاقىردى
دەنساۋلىق ساقتاۋ مينيسترلىگىنىڭ ماماندارى وڭتۇستىك قازاقستاندا وقۋشىلارعا چيپ سالىنادى ەكەن دەگەن حابارلامانى جوققا شىعاردى، دەپ حابارلايدى Sputnik قازاقستان .
ينفەكتسيالىق اۋرۋلاردى ەپيدەميولوگيالىق قاداعالاۋ باسقارماسىنىڭ باس ساراپشىسى نۇرشاي ازىمباەۆانىڭ ايتۋىنشا، اۋديوحابارلاما الەۋمەتتىك جەلىلەر مەن مەسسەندجەرلەردە تاراعان. فوتوسى دا بار. وندا حالىققا جاپپاي ەكپە سالۋ، وقۋشىلارعا چيپ ەنگىزۋ جايىندا ايتىلعان.
"قازاقستان رەسپۋبليكاسىنىڭ دەنساۋلىق ساقتاۋ مينيسترلىگى ول اقپاراتتىڭ شىندىققا جاناسپايتىنىن رەسمي تۇردە مالىمدەيدى. حالىقتى جالعان مالىمەتتەرگە سەنبەۋگە جانە رەسمي اقپارات كوزدەرىنەن مالىمەت الۋعا شاقىرامىز. بارلىق اقپارات مينيسترلىكتىڭ رەسمي سايتى مەن الەۋمەتتىك جەلىدەگى پاراقشاسىندا بار", - دەدى ازىمباەۆا بۇگىنگى ونلاين بريفينگتە.
وسى ورايدا باس ساراپشى جالعان اقپارات تاراتقان ادامداردىڭ قىلمىستىق كودەكستىڭ 274-بابى بويىنشا جاۋاپقا تارتىلاتىنىن ەسكە سالدى.
