وزبەكستان پرەزيدەنتى شاۆكات ميرزياەۆ ساردوبا سۋ قويماسىنداعى بوگەتتىڭ بۇزىلۋىنا كىنالىلەر كىم بولسا دا، زاڭ الدىندا جاۋاپقا تارتىلاتىنىن ەسكەرتتى.
ول بۇل جونىندە ۇكىمەت مۇشەلەرىمەن وتكىزگەن ۆيدەوسەلەكتورلىق جينالىس كەزىندە ايتتى.
"مەنىڭ تاپسىرمام بويىنشا سۋ تاسقىنىنا بايلانىستى قۇقىق قورعاۋ ورگاندارى تەرگەۋ ءىسىن باستادى. بارلىق كىنالىلەر، ول كىم بولماسىن زاڭ الدىندا جاۋاپ بەرەدى", – دەپ ەسكەرتتى وزبەك پرەزيدەنتى.
ميرزياەۆتىڭ سوزىنشە، سىرداريا وبدىسىنداعى سۋ تاسقىنى وزبەكستاندىقتار ءۇشىن اششى ساباق بولدى.
ء"بىز حالىقارالىق ساراپشىلاردى شاقىرىپ، بوگەتتىڭ قۇرىلىسىن تەكسەرەمىز. سول كەزدە ءبارى بەلگىلى بولادى", – دەدى شاۆكات ميرزياەۆ.
1 مامىردا تاڭعا جۋىق سىرداريا وبلىسىنداعى ساردوبا سۋ قويماسىنداعى بوگەت بۇزىلىپ، 22 ەلدىمەكەندى سۋ الدى. ول جاقتان 70 مىڭ ادام كوشىرىلدى. كەمىندە ءتورت ادام قايتىس بولىپ، بىرەۋى ءىز-ءتۇسسىز جوعالىپ كەتتى.
سۋ اپاتىنان قازاقستان ءوڭىرى دە زارداپ شەكتى. تۇركىستان وبلىسىنىڭ ماقتارال اۋدانىندا 845 ءۇي، 3 مەكتەپ، 5 بالاباقشا، 4 مەديتسينا عيماراتى مەن مادەنيەت ءۇيى جانە 54,7 كم كوپىر مەن جولدى سۋ العان. مۇنان وزگە 7639 گا ەگىستىك سۋ استىندا قالدى.
