ۋكراينانىڭ بۇرىنعى پرەزيدەنتى ۆيكتور يانۋكوۆيچ ەكى ايعا قاماۋعا الىندى (سىرتتاي). كيەۆتىڭ پەچەرسكي اۋداندىق سوتى 4 مامىردا پروكۋراتۋرانىڭ ۇسىنىسىن قاناعاتتاندىرىپ، وسىنداي شەشىم قابىلدادى. يانۋكوۆيچتىڭ ادۆوكاتى ۆيتالي سەرديۋك سوت قاۋلىسىنا شاعىم تۇسىرەتىنىن مالىمدەدى.
ۋنيان اگەنتتىگى وسى ىسپەن شۇعىلداناتىن پروكۋرور الەكساندر سۋپرۋنعا سىلتەي وتىرىپ "قاماۋعا الۋ تۋرالى شەشىم بيلىكتى وزبىرلىقپەن باسىپ الۋ تۋرالى قىلمىستىق ءىستى تەرگەۋ بارىسىندا شىققان" دەپ حابارلايدى.
پروكۋروردىڭ مالىمدەۋىنە قاراعاندا، ايىپتاۋ تارابى يانۋكوۆيچتىڭ رەسەي اۋماعىندا تىعىلىپ جۇرگەنىن راستاعان.
پەچەرسكي سوتىندا يانۋكوۆيچتى قاماۋعا الۋ شاراسىنا قاتىسى بار تاعى ءبىر ءىس قارالادى، ول - 2014 جىلعى 18-20 اقپانداعى وقيعالار. بۇل كۇندەرى كيەۆتە ەۋرومايدان باستالعالى پوليتسيا مەن بيلىككە نارازىلار اراسىندا ەڭ ءىرى قاقتىعىستار بولدى. وقيعا بارىسىندا پرەزيدەنت يانۋكوۆيچ ۋكراينادان قاشىپ، كيەۆتە بيلىك اۋىستى. كوپ ۇزاماي رەسەي قىرىمدى اننەكسيالادى، ۋكراينانىڭ وڭتۇستىك-شىعىسىندا قارۋلى قاقتىعىس باستالدى. ناتو-نىڭ رەسمي انىقتاماسى بويىنشا، بۇل قاقتىعىستا رەسەي اگرەسسور رەتىندە كورىنەدى. رەسەي ۋكراينانىڭ وڭتۇستىك-شىعىسىنداعى كونفليكتىگە "قاتىسىمىز جوق" دەپ سانايدى.
www.azattyq.org
