تۇركىستان وبلىسىندا جانتۇرشىكتىرەر جاعداي! كەلەس اۋدانى، اباي اۋىلىندا كۇيەۋى ءوز ايەلىن كوشەدە كەتىپ بارا جاتقان جەرىندە بالتامەن ۇرعان. باسى مەن قولىنان جارالانعان 46 جاستاعى ايەلدىڭ ءبىر كوزى ەندى كورمەيدى. ەندى عانا ەسىن جيعان ءاليا ايتىمبەتوۆانىڭ ايتۋىنشا، ول ۇنەمى ءزابىر كورسەتىپ كەلگەن كۇيەۋىنەن ەكى اپتادان بەرى قىزدارىمەن بىرگە بولەك تۇرىپ ءجۇرىپتى. مۇگەدەك بولىپ قالعان ءاليانىڭ تۋىستارى كۇيەۋ بالالارى ەندى جازادان قۇتىلىپ كەتە مە دەپ قورقادى. بۇل تۋرالى كتك تەلەارناسى حابارلادى.
جان ساقتاۋ بولىمىنەن پالاتاعا اۋىستىرىلعان ءاليانىڭ جاعدايى: قولى شابىلعان، بالتا تيگەن باسى قاق ايرىلعانداي. اباي اۋىلىنداعى ەمحانادا مەدبيكە بولىپ ىستەيتىن ءاليا ەكى اپتادان بەرى ۇنەمى ۇرىپ-سوعاتىن كۇيەۋىنەن كەتىپ، قىزدارىمەن بولەك ۇيدە تۇرىپ جۇرگەن. تاڭەرتەڭ جۇمىسقا كەتىپ بارا جاتقاندا تىپ-تىنىش كوشەدە تۋ سىرتىنان كەلگەن كۇيەۋى ەكى قىزىنىڭ اناسىنا باسقا ەمەس، بالتا جۇمساپتى.
— جۇمىسقا شىعىپ كەلە جاتقانىمدا كۇيەۋىم ماتقۇلوۆ مۇرات مەنى بالتالاپ تاستادى. تەگى سوزگە كەلمەيدى، «ولتىرەمنەن» باسقانى ايتپايدى. 15 جىل وتانداسىپ، 16 جىلدان بەرى كورەتىن ءجابىرىم سول. تەك زورلىق پەن زومبىلىق. «جاقىنداما ماعان، نە بولدى ساعان، تىنىشتىق پا؟» — دەسەم، «سويلەسپەيمىن، سەنى ولتىرەم، سەنى ولتىرەم» — دەپ، مەنى بالتالاپ تاستادى.
— مىنا جەردىڭ ءبارى قانجوسا، كورسەڭ، قورقاسىڭ، دەنەڭ تۇرشىگەدى.
ەلۋدى ەڭسەرگەن كۇيەۋى ايەلىنە وسى جەردە شابۋىلداعان. قايتا ايەلدىڭ شىڭعىرعان داۋسىنا جۇرگىنشى ەكى جىگىت جۇگىرىپ كەلگەن سوڭ، مۇرات ماتقۇلوۆ قاشا جونەلىپتى. وقيعا ورنىندا كوشەنى باقىلايتىن كامەرا دا ورناتىلعان. بىراق ول ءالى ىسكە قوسىلماپتى. كوپ قان جوعالتىپ، تىم اۋىر جاعدايدا اۋرۋحاناعا تۇسكەن ءاليانىڭ ءتىرى قالۋى ءۇشىن دارىگەرلەر جارتى كۇن وتا جاساعان. ول ءۇشىن ساناۆياتسيا جەلىسىمەن وبلىستان بىرنەشە دارىگەر الدىرىلعان.
رۇستەم رايسوۆ، كەلەس اۋداندىق اۋرۋحاناسى جاراقاتتانۋ ءبولىمىنىڭ مەڭگەرۋشىسى:
— باسىندا، وڭ جاعىندا جارا، بالتامەن شابىلعان. قولىندا، وڭ قولىندا، بىلەگىندە كەسىلگەن جاراقاتى جانە 5-ءشى ساۋساعى سىنعان. ونىڭ ءبارى تىگىلىپ، ورنىنا قويىلدى.
ءاليانىڭ كورشىلەرى مۇرات تۋرالى جاقسى پىكىردە ەمەس. قارا بازاردا ۆاليۋتا ايىرباستاپ، اقشا تاباتىن ول قوڭسىلارىمەن دە سويلەسپەيدى ەكەن. ال ءاليا سوڭعى ۋاقىتتا كورشىلەرىنە كوپ شاعىمدانىپتى.
مايرا ەگەمبەرديەۆا، كورشىسى:
— «كۇيەۋىم ۇرادى، مەنى دە ۇرادى، قىزداردى دا ۇرادى، قىزدار دا ازاپ-بەزەر بولدى» دەيتىن. ءوزى ءسال ءبىرتۇرلى، سول مۇرات. قازىر قولعا تۇسكەن ونىڭ، بالتاسىمەن بىرگە وزىنەن دە ساراپتاما الىنعان، تەرگەلىپ جاتىر.
ال كۇندىز-ءتۇنى اۋرۋحانادا اۋىر جاراقات العان تۋىسىنىڭ تىلەۋىن تىلەپ جۇرگەن جاقىندارى: «كۇدىكتى جازادان قۇتىلىپ كەتە مە؟» دەپ قورقادى.
جانار ايتىمبەتوۆا، جابىرلەنۋىشىنىڭ جەڭگەسى:
— اجىراسىپ تا كوردى بۇنىمەن. ايتەۋىر ەكى قىزى جەتىم بولماسىن، وسىلار اكەسى جوق بوپ وسپەسىن دەپ، جالىنىپ كەلگەننەن كەيىن، قۇران ۇستاپ، بىزگە انت-سۋىن ىشكەننەن كەيىن، ءبىز جاراستىرىپ… وسى ۋاقىتقا دەيىن جازالانبادى عوي بۇل. نەشە رەت ۇردى، باسقا قىلدى. ايتەۋىر شىعىپ كەتە بەرەدى عوي، تىنىش قانا. ەندى وسىدان قۇتىلىپ كەتپەسىن، ءادىل جازاسىن السىن.
ءاليا ايتىمبەتوۆانىڭ تۋىستارى بۇل ءىستى پروكۋراتۋرا ەرەكشە قاداعالاۋعا العانىن قالايدى. ال ايەلىن بالتالاپ، قانسىراعان كۇيىندە تاستاي قاشقان كۇدىكتىگە قاتىستى پوليتسەيلەر «ادام ولتىرۋگە وقتالۋ» بابىمەن ءىس قوزعادى. بارىنەن دە، ەكى قىزعا قيىن سوققانداي. ويتكەنى ابدەن شوشىپ قالعان وقۋشىلارعا پسيحولوگتاردىڭ كومەگى قاجەت.
https://www.ktk.kz/kz/news/video/2020/05/04/147325/
JASQAZAQ.KZ
