Túrkistan oblysynda jantúrshiktirer jaǵdaı! Keles aýdany, Abaı aýylynda kúıeýi óz áıelin kóshede ketip bara jatqan jerinde baltamen urǵan. Basy men qolynan jaralanǵan 46 jastaǵy áıeldiń bir kózi endi kórmeıdi. Endi ǵana esin jıǵan Álııa Áıtimbetovanyń aıtýynsha, ol únemi zábir kórsetip kelgen kúıeýinen eki aptadan beri qyzdarymen birge bólek turyp júripti. Múgedek bolyp qalǵan Álııanyń týystary kúıeý balalary endi jazadan qutylyp kete me dep qorqady. Bul týraly KTK telearnasy habarlady.
Jan saqtaý bóliminen palataǵa aýystyrylǵan Álııanyń jaǵdaıy: qoly shabylǵan, balta tıgen basy qaq aırylǵandaı. Abaı aýylyndaǵy emhanada medbıke bolyp isteıtin Álııa eki aptadan beri únemi uryp-soǵatyn kúıeýinen ketip, qyzdarymen bólek úıde turyp júrgen. Tańerteń jumysqa ketip bara jatqanda typ-tynysh kóshede tý syrtynan kelgen kúıeýi eki qyzynyń anasyna basqa emes, balta jumsapty.
— Jumysqa shyǵyp kele jatqanymda kúıeýim Matqulov Murat meni baltalap tastady. Tegi sózge kelmeıdi, «óltiremnen» basqany aıtpaıdy. 15 jyl otandasyp, 16 jyldan beri kóretin jábirim sol. Tek zorlyq pen zombylyq. «Jaqyndama maǵan, ne boldy saǵan, tynyshtyq pa?» — desem, «sóılespeımin, seni óltirem, seni óltirem» — dep, meni baltalap tastady.
— Myna jerdiń bári qanjosa, kórseń, qorqasyń, deneń túrshigedi.
Elýdi eńsergen kúıeýi áıeline osy jerde shabýyldaǵan. Qaıta áıeldiń shyńǵyrǵan daýsyna júrginshi eki jigit júgirip kelgen soń, Murat Matqulov qasha jónelipti. Oqıǵa ornynda kósheni baqylaıtyn kamera da ornatylǵan. Biraq ol áli iske qosylmapty. Kóp qan joǵaltyp, tym aýyr jaǵdaıda aýrýhanaǵa túsken Álııanyń tiri qalýy úshin dárigerler jarty kún ota jasaǵan. Ol úshin sanavııaııa jelisimen oblystan birneshe dáriger aldyrylǵan.
Rústem Raısov, Keles aýdandyq aýrýhanasy jaraqattaný bóliminiń meńgerýshisi:
— Basynda, oń jaǵynda jara, baltamen shabylǵan. Qolynda, oń qolynda, bileginde kesilgen jaraqaty jáne 5-shi saýsaǵy synǵan. Onyń bári tigilip, ornyna qoıyldy.
Álııanyń kórshileri Murat týraly jaqsy pikirde emes. Qara bazarda valıýta aıyrbastap, aqsha tabatyn ol qońsylarymen de sóılespeıdi eken. Al Álııa sońǵy ýaqytta kórshilerine kóp shaǵymdanypty.
Maıra Egemberdıeva, kórshisi:
— «Kúıeýim urady, meni de urady, qyzdardy da urady, qyzdar da azap-bezer boldy» deıtin. Ózi sál birtúrli, sol Murat. Qazir qolǵa túsken onyń, baltasymen birge ózinen de saraptama alynǵan, tergelip jatyr.
Al kúndiz-túni aýrýhanada aýyr jaraqat alǵan týysynyń tileýin tilep júrgen jaqyndary: «Kúdikti jazadan qutylyp kete me?» dep qorqady.
Janar Áıtimbetova, jábirlenýishiniń jeńgesi:
— Ajyrasyp ta kórdi bunymen. Áıteýir eki qyzy jetim bolmasyn, osylar ákesi joq bop óspesin dep, jalynyp kelgennen keıin, Quran ustap, bizge ant-sýyn ishkennen keıin, biz jarastyryp… Osy ýaqytqa deıin jazalanbady ǵoı bul. Neshe ret urdy, basqa qyldy. Áıteýir shyǵyp kete beredi ǵoı, tynysh qana. Endi osydan qutylyp ketpesin, ádil jazasyn alsyn.
Álııa Áıtimbetovanyń týystary bul isti prokýratýra erekshe qadaǵalaýǵa alǵanyn qalaıdy. Al áıelin baltalap, qansyraǵan kúıinde tastaı qashqan kúdiktige qatysty polıeıler «adam óltirýge oqtalý» babymen is qozǵady. Bárinen de, eki qyzǵa qıyn soqqandaı. Óıtkeni ábden shoshyp qalǵan oqýshylarǵa psıhologtardyń kómegi qajet.
https://www.ktk.kz/kz/news/video/2020/05/04/147325/
JASQAZAQ.KZ
