ماقتارالدا تاعى ءبىر اۋىلدى سۋ باستى. اۋداندا 31 مىڭنان اسا ادام ەۆاكۋاتسيالاندى

3818
Adyrna.kz Telegram
سۋ باسقان جاڭا تۇرمىس اۋىلى. 2 مامىر 2020 جىل.

ماقتارال اۋدانىندا ءبىر اۋىلدى سۋ باستى. ايماقتا ەۆاكۋاتسيالانعان ادامدار سانى 31 مىڭنان استى دەپ "ازاتتىق" راديوسى حابارلايدى.

4 مامىر كۇنى تۇركىستان وبلىسى ماقتارال اۋدانىندا سۋ باسقان اۋىلداردان 31 مىڭنان اسا ادام قاۋىپسىز جەرگە كوشىرىلدى. اۋدانداعى تاعى ءبىر ەلدىمەكەن – دوستىق اۋىلى سۋ استىندا قالدى. بۇعان دەيىن جاڭاتۇرمىس، جەڭىس، فيردوۋسي، ورگەباس اۋىلدارىن سۋ باسىپ قالعان ەدى.

وبلىس اكىمدىگىنىڭ مالىمەتىنشە، ماقتارالدا سۋ باسقان اۋىل سانى بەسەۋگە جەتكەن. ون ءۇش اۋىلدىڭ ادامدارى ەۆاكۋاتسيالانعان. قازىر ماقتارالدا قاۋىپسىز جەرگە كوشىرىلگەن ادامدار سانى 31 600 ادامنان اسقان. اكىمدىك حابارلاماسىندا جەتىساي اۋدانىنا قاراستى قوعالى اۋىلىنىڭ 1025 تۇرعىنى دا قاۋىپسىز جەرگە كوشىرىلگەنى جازىلعان.

اۋدان تۇرعىندارىنىڭ ازاتتىققا ايتۋىنشا، سۋ العان اۋىلداردان الىپ شىققان مالدار قازىر كوشە بويىندا ءجۇر. ايەلدەر مەن بالالار تۋعان تۋىستارى مەن اكىمدىك دايىنداعان ورتالىقتارعا جەتكىزىلگەن.

«سۋ ءالى توقتاعان جوق. اۋەلى ەگىندىكتەردى، ارتىنشا اۋىلدىڭ ىشىنە كىرىپ جاتىر» دەيدى ورگەباس اۋىلىنىڭ تۇرعىنى.

1 مامىر كۇنى وزبەكستاننىڭ سىرداريا وبلىسىنداعى ساردوبا سۋ قويماسى جارىلىپ، اينالاسىنداعى اۋىلداردى سۋ شايىپ كەتكەن. كەيىن، 1 مامىر تۇندە ساردوبانىڭ سۋى قازاقستاننىڭ وڭتۇستىگىندەگى، قازاق-وزبەك شەكاراسىندا ورنالاسقان اباي كانالىنا جەتتى. كەيىن كانال سۋ ارناسىنان اسىپ، ماقتارال اۋدانىنداعى جاڭاتۇرمىس جانە جەڭىس اۋىلىنا سۋ الدى. ەكى اۋىلدىڭ تۇرعىندارى ەۆاكۋاتسيالاندى. وسىدان سوڭ ماقتارال اۋدانىندا توتەنشە جاعداي جاريالاندى. 2 مامىر كۇنى ەكى اۋىل تولىق سۋ استىندا قالىپ، ونداعى ۇيلەر قۇلاعان. 3 مامىردا ورگەباس پەن فيردوۋسي اۋىلىن سۋ باسىپ قالعان. ەكى اۋىلدا سۋ باسقان ۇيلەردىڭ سانى التى جۇزدەن اسقان.

 

پىكىرلەر