بۇگىنگى كۇنگە الماتى وبلىسىندا كوكتەمگى ەگىس جۇمىستارىنىڭ شامامەن 69,1 % اياقتالدى. بۇل تۋرالى بۇگىن وبلىستىق اكىمدىكتە وتكەن سەلەكتورلىق جيىندا بەلگىلى بولدى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.
وبلىس اكىمىنىڭ ورىنباسارى سەرىكجان بەسكەمپىروۆتىڭ ايتۋىنشا، «قولداۋ» جۇيەسى ارقىلى بەرىلگەن ەلەكتروندى وتىنىشتەرىنىڭ نەگىزىندە 1086 اۋىل شارۋاشىلىعى تاۋار ءوندىرۋشىسى اۋىل شارۋاشىلىعى سالاسىن قولداۋ ماقساتىندا بەرىلەتىن سۋبسيديادان 1 024,9 ملن. تەڭگە سۋبسيديا الدى. سول سياقتى ەگىس ناۋقانىن مەرزىمىندە ءارى ساپالى اتقارۋ ءۇشىن «اگرارلىق نەسيەلىك كورپوراتسيا» اق-نىڭ «كەڭ دالا» باعدارلاماسى ارقىلى جىل باسىنان بەرى 78 زايم الۋشىعا 888,4 ملن. تەڭگە سوما نەسيە بەرىلگەن. سونىمەن قاتار 11 اۋىل شارۋاشىلىعى تاۋار وندىرۋشىلەرى «قاراپايىم زاتتار ەكونوميكاسى» باعدارلاماسى شەڭبەرىندە جالپى سوماسى 290 ملن. تەڭگە نەسيە الۋعا ءوتىنىش قالدىرىپتى. بولىنگەن 19,0 مىڭ توننا ديزەل وتىنىنىڭ 5,3 مىڭ تونناسى جەتكىزىلگەن، بۇل رەتتە ءوڭىر شارۋاشىلىقتارى ءار ءليترىن 165 تەڭگەدەن 4,2 مىڭ توننا ديزەل وتىنىن الىپ ۇلگەرگەن. وسىنىڭ بارلىعى ءوز كەزەگىندە كوكتەمگى ەگىس جۇمىستارىنىڭ ءتيىمدى اتقارىلۋىنا، اگرارلىق سالانىڭ العا باسۋىنا ىقپال ەتپەك.
اماندىق باتالوۆ جيىندا ەگىس ناۋقانىنىڭ بارىسى، اقسۋ، كوكسۋ قانت زاۋىتتارىنىڭ وڭدەۋ ماۋسىمىنا دايىندىعى، جۇگەرى مەن كارتوپ ونىمدىلىگىن ارتتىرۋدىڭ مۇمكىندىكتەرى تۋرالى سۇراپ-ءبىلىپ، مىندەتتەر جۇكتەدى.
- توتەنشە جاعداي رەجيمىنە قاراماستان كوكتەمگى دالا جۇمىستارى ءبىر كۇنگە دە كەشىكتىرىلمەي مەرزىمىندە باستالىپ، ءبىر ساعات تا تولاستاعان جوق. وسىنداي قيىن كەزەڭدە اۋىل شارۋاشىلىعى سالاسى الدىڭعى شەپكە، العى پوزيتسياعا شىعىپ وتىر. جۇمىستاردى وسى قارقىندا جالعاستىرا بەرۋىمىز كەرەك. اۋىل شارۋاشىلىعى ونىمدەرىن وڭدەۋ باعىتىندا دا سولاي. ءبىز اقسۋ، كوكسۋ قانت زاۋىتتارىن، جاركەنت كراحمال-سىرنە زاۋىتىن قاجەتتى شيكىزاتتارمەن قامتاماسىز ەتۋدى جولعا قويدىق. ەندى كۇنى كەشە تالدىقورعاندا اشىلعان «جەتىسۋ-ماجيكو» زاۋىتىن دا مايلى داقىلدارمەن، سونىڭ ىشىندە راپستىڭ قاجەتتى كولەمىمەن جۇيەلى تۇردە قامتاماسىز ەتۋىمىز كەرەك. ءبىز جىل سايىن ەگىستىك القاپتارىنىڭ كولەمىن ۇلعايتىپ كەلەمىز. ماسەلەن، ەگىس القابى بيىل بىلتىرعىعا قاراعاندا 4,9 مىڭ گەكتارعا ۇلعايتىلىپ، 966,5 مىڭ گەكتارعا جەتكىزىلدى. دەگەنمەن ەگىستىكتەردى ۇلعايتۋ مۇمكىندىگى شەكسىز ەمەس، سوندىقتان الداعى ۋاقىتتا ءبىز ءونىم شىعىمىن ارتتىرۋ ارقىلى ءوسىمدى قامتاماسىز ەتۋگە باسا ءمان بەرۋىمىز كەرەك، - دەپ اتاپ وتكەن وبلىس اكىمى اماندىق باتالوۆ ءتيىستى سالا ماماندارىنا، اسىرەسە، قانت قىزىلشاسى، كارتوپ، جۇگەرى ونىمدىلىگىن ۇلعاتۋعا باعىتتالعان شارالاردى اتقارۋ تۋرالى ناقتى تاپسىرمالار بەردى.
«ادىرنا» ۇلتتىق پورتالى
