ماقتاارال اۋدانىنىڭ ورتالىعى- مىرزاكەنتكە سارقىندى سۋدان قاۋىپ تونگەندىكتەن كەشە تۇنگى ساعات 23:00-دە 12 مىڭعا جۋىق تۇرعىن تولىق اتاكەنت كەنتىنە كوشىرىلدى. حالىقتىڭ ەركىن ءارى ءتيىمدى كوشۋىن قامتاماسىز ەتۋ ماقساتىندا 68 اۆتوبۋس ءبولىندى. اۋدان ورتالىعىنىڭ تۇرعىندارى ەش داۋرىقپاستان سيرەنا سوعىلا سالا كوشۋگە قامدانعان بولاتىن. تۇرعىنداردى كوشىرۋ بارىسىندا كوشەدە كولىك كەپتەلىسى بولعان جوق. اتاكەنتتەگى وقشاۋلاۋ ورىندارىنا جەتكىزىلگەن تۇرعىندارعا قاجەتتى كومەكتەر كورسەتىلۋدە. ەڭ الدىمەن وقشاۋلاۋ ورىندارىنا بارعان تۇرعىندار ەسىك الدىنداعى مەديتسينا ماماندارىنىڭ ارنايى بلوك-پوستىنا بىرتىندەپ تىركەلىپ، كوروناۆيرۋس ىندەتىن انىقتاۋ قۇرىلعىسىمەن دەنە تەمپەراتۋراسى تەكسەرىستەن وتكىزىلۋدە. سودان كەيىن عانا وقشاۋلاۋ ورىندارىنا جىبەرىلۋدە.
ايتا كەتەيىك، كەشە تۇسكە دەيىن ماقتاارال اۋدانىندا ورىن العان جاعدايعا بايلانىستى 2243 ازامات قاۋىپسىز ايماققا كوشىرىلسە، تۇستەن كەيىن سۋ باسۋ قاۋپى باسىم بولعان نۇرلىجول مەن فەرداۋسي اۋىلدارىنان 415 ءۇيدىڭ 3200-دەن استام تۇرعىنى قاۋىپسىز ايماققا شىعارىلدى. ال تۇنگى ساعات 23:00-دە مىرزاكەنت كەنتىنىڭ تۇرعىندارىن كوشىرۋ جۇمىستارى باستالىپ كەتتى. ءبىر مەزەتتە شامامەن 7-8 مىڭ ادام اتاكەنت، اسىقاتا كەنتتەرىنە تاسىمالداندى. ويتپەسكە امال قالمادى. سەبەبى سارقىندى سۋ مىرزاكەنت كەنتىنىڭ ىرگەسىنە جاقىنداپ قالعان-تىن. ارنايى شتاب كەلىسىمىمەن حالىقتى كوشىرۋ تۋرالى شەشىم قابىلداندى.
توتەنشە جاعدايعا بايلانىستى اۋداندا 18 ەۆوكۋاتسيالىق ورىندار ناقتىلانىپ، ولار اتاكەنت، ماقتارال، جامبىل ەلدىمەكەندەرىندە ازىرلەندى. اپاتتان قۇتقارۋ جۇمىستارىنا 630 ادام مەن 2 سۋ كولىگى جانە 56 تەحنيكا جۇمىلدىرىلدى. قازىرگى تاڭدا قاۋىپتى ايماقتاعى ازاماتتار مەن ءۇي جانۋارلارىن قاۋىپسىز جەرگە كوشىرۋ شارالارى ۇيىمداستىرىلۋدا. بۇل جۇمىستارعا كەلەس، جەتىساي، شاردارا، سارىاعاش اۋداندارىنىڭ اكىمشىلىكتەرى اتسالىسىپ جاتىر.
دەسەك تە، اۋداندا سۋ باسىپ قالۋ قاۋپى بار اۋىلدار ءالى دە از ەمەس. سولاردىڭ ءبىرى - جاڭااۋىل اۋىلدىق وكرۋگىنە قاراستى فەردوۋسي ەلدىمەكەنى. قازىرگى تاڭدا اۋىل ورتاسىنداعى «فەردوۋسي» جالپى ورتا مەكتەبىنىڭ اۋماعىنا سۋ كوتەرىلگەن.
بۇدان بولەك، زەردەلەۋ، زەرتتەۋ جۇمىستارىنىڭ ناتيجەسىندە سۋ تاسقىنى كەزىندە جاڭا جول مەن ەڭبەكشى اۋىلدىق وكرۋگتەرىندەگى 3 ەلدىمەكەندە 1682 گەكتار اۋىل شارۋاشىلىعى داقىلدارى زارداپ شەكەنى انىقتالىپ وتىر. الدىن الا بولجامدىق ەسەپ بويىنشا 181,1 ملن. تەڭگەنىڭ شىعىنى ەسەپتەلىنگەن. اتاپ ايتقاندا، 1480 گەكتار ماقتا 148 ملن. تەڭگەگە، 42 گەكتار جوڭىشقا - 2,1 ملن، 150 گەكتار باقشا - 30 ملن، 10 گەكتار جۇگەرى - 1 ملن. تەڭگەلىك شىعىنعا ۇشارادى دەپ بولجانۋدا. سونداي-اق، اتالعان 4 ەلدىمەكەندە 5335 مال باسى تىركەلىپ، ونىڭ ىشىندە 799 مال باسى زارداپ شەگىپ، 249 ملن. شىعىنعا ۇشاراعان. ونىڭ 328-ءى ءىرى قارا، 361-ءى ۇساق مال، 53-ءى جىلقى، 57-ءسى تۇيە.
ماقتارالدان 46-ى، جەتىسايدان 10, شاردارادان 5, بارلىعى 61 ۆەتەرينارلىق دارىگەرلەر جانتاقساي، فەردوۋسي ەلدىمەكەندەرىندەگى 3686 مالدى ەۆاكۋاتسيالاۋ جۇمىستارىن تولىق اياقتادى.
دەگەنمەن سۋ باسىپ قالعان ايماقتاردا قانشا مالدىڭ سۋعا كەتكەنىن انىقتاۋ ازىرگە مۇمكىن بولماي وتىر. ويتكەنى سۋ باسقان ايماققا كىرۋ مۇمكىن ەمەس. مامانداردىڭ ايتۋىنشا، بۇزىلعان قويمادان كەلىپ جاتقان قاشىرتپا سۋدىڭ كولەمى ازايماۋدا. سول سەبەپتى توتەنشە جاعداي سالاسىنىڭ ماماندارى سۋ باسقان اۋىلدارداعى سۋ دەڭگەيىنىڭ كوتەرىلگەن، كوتەرىلمەگەنىنە كوز جەتكىزۋ ءۇشىن ءتيىستى زەردەلەۋ جۇمىستارىن جۇرگىزۋگە كىرىسكەن.
ايدار سەيدازىم
