Maqtaaral aýdanynyń ortalyǵy- Myrzakentke sarqyndy sýdan qaýip tóngendikten keshe túngi saǵat 23:00-de 12 myńǵa jýyq turǵyn tolyq Atakent kentine kóshirildi. Halyqtyń erkin ári tıimdi kóshýin qamtamasyz etý maqsatynda 68 avtobýs bólindi. Aýdan ortalyǵynyń turǵyndary esh daýryqpastan sırena soǵyla sala kóshýge qamdanǵan bolatyn. Turǵyndardy kóshirý barysynda kóshede kólik keptelisi bolǵan joq. Atakenttegi oqshaýlaý oryndaryna jetkizilgen turǵyndarǵa qajetti kómekter kórsetilýde. Eń aldymen oqshaýlaý oryndaryna barǵan turǵyndar esik aldyndaǵy medıına mamandarynyń arnaıy blok-postyna birtindep tirkelip, koronavırýs indetin anyqtaý qurylǵysymen dene temperatýrasy tekseristen ótkizilýde. Sodan keıin ǵana oqshaýlaý oryndaryna jiberilýde.
Aıta keteıik, keshe túske deıin Maqtaaral aýdanynda oryn alǵan jaǵdaıǵa baılanysty 2243 azamat qaýipsiz aımaqqa kóshirilse, tústen keıin sý basý qaýpi basym bolǵan Nurlyjol men Ferdaýsı aýyldarynan 415 úıdiń 3200-den astam turǵyny qaýipsiz aımaqqa shyǵaryldy. Al túngi saǵat 23:00-de Myrzakent kentiniń turǵyndaryn kóshirý jumystary bastalyp ketti. Bir mezette shamamen 7-8 myń adam Atakent, Asyqata kentterine tasymaldandy. Óıtpeske amal qalmady. Sebebi sarqyndy sý Myrzakent kentiniń irgesine jaqyndap qalǵan-tyn. Arnaıy shtab kelisimimen halyqty kóshirý týraly sheshim qabyldandy.
Tótenshe jaǵdaıǵa baılanysty aýdanda 18 evokýaııalyq oryndar naqtylanyp, olar Atakent, Maqtaral, Jambyl eldimekenderinde ázirlendi. Apattan qutqarý jumystaryna 630 adam men 2 sý kóligi jáne 56 tehnıka jumyldyryldy. Qazirgi tańda qaýipti aımaqtaǵy azamattar men úı janýarlaryn qaýipsiz jerge kóshirý sharalary uıymdastyrylýda. Bul jumystarǵa Keles, Jetisaı, Shardara, Saryaǵash aýdandarynyń ákimshilikteri atsalysyp jatyr.
Desek te, aýdanda sý basyp qalý qaýpi bar aýyldar áli de az emes. Solardyń biri - Jańaaýyl aýyldyq okrýgine qarasty Ferdoýsı eldimekeni. Qazirgi tańda aýyl ortasyndaǵy «Ferdoýsı» jalpy orta mektebiniń aýmaǵyna sý kóterilgen.
Budan bólek, zerdeleý, zertteý jumystarynyń nátıjesinde sý tasqyny kezinde Jańa jol men Eńbekshi aýyldyq okrýgterindegi 3 eldimekende 1682 gektar aýyl sharýashylyǵy daqyldary zardap shekeni anyqtalyp otyr. Aldyn ala boljamdyq esep boıynsha 181,1 mln. teńgeniń shyǵyny eseptelingen. Atap aıtqanda, 1480 gektar maqta 148 mln. teńgege, 42 gektar jońyshqa - 2,1 mln, 150 gektar baqsha - 30 mln, 10 gektar júgeri - 1 mln. teńgelik shyǵynǵa usharady dep boljanýda. Sondaı-aq, atalǵan 4 eldimekende 5335 mal basy tirkelip, onyń ishinde 799 mal basy zardap shegip, 249 mln. shyǵynǵa usharaǵan. Onyń 328-i iri qara, 361-i usaq mal, 53-i jylqy, 57-si túıe.
Maqtaraldan 46-y, Jetisaıdan 10, Shardaradan 5, barlyǵy 61 veterınarlyq dárigerler Jantaqsaı, Ferdoýsı eldimekenderindegi 3686 maldy evakýaııalaý jumystaryn tolyq aıaqtady.
Degenmen sý basyp qalǵan aımaqtarda qansha maldyń sýǵa ketkenin anyqtaý ázirge múmkin bolmaı otyr. Óıtkeni sý basqan aımaqqa kirý múmkin emes. Mamandardyń aıtýynsha, buzylǵan qoımadan kelip jatqan qashyrtpa sýdyń kólemi azaımaýda. Sol sebepti tótenshe jaǵdaı salasynyń mamandary sý basqan aýyldardaǵy sý deńgeıiniń kóterilgen, kóterilmegenine kóz jetkizý úshin tıisti zerdeleý jumystaryn júrgizýge kirisken.
Aıdar Seıdazym
