قالام مەن قارۋدى قاتار ۇستاپ، قاندى قىرعىنعا قاتىسقانداردىڭ ىشىندە قازاقتىڭ اقىن-جازۋشىلارى از ەمەس. جەڭىس كۇنى قارساڭىندا مايدانگەر اقىن-جازۋشىلاردىڭ قالامىنان تۋعان شىعارمالاردى دارىپتەپ، التىن قورداعى داۋىسىن تىڭدارمانعا جەتكىزۋ ماقساتىندا «قازاق راديوسى جاڭا جوبا ۇسىنباق. «باتىرلار رۋحىنا تاعزىم» اتتى ون كۇندىك باعدارلامالار توپتاماسى اياسىندا 1-10 مامىر ارالىعىندا كۇن سايىن ساعات 17:45-تە قازاق راديوسىنىڭ اۋە تولقىنىنان ارنايى حابارلار بەرىلەدى. بۇل تۋرالى ءوزىنىڭ فەيسبۋكتەگى پاراقشاسىندا «قازاق راديولارى» جشس باس رەداكتورى – «قازاق راديوسى» راديوارناسىنىڭ ديرەكتورى دۋلات ابيبۋللاەۆ جازدى.
«باتىرلار رۋحىنا تاعزىم» حابارىنان قازاق قىزدارىنىڭ اراسىنان شىققان تۇڭعىش ۇشقىش حىيۋاز (حيۋاز) دوسپانوۆانىڭ، پوەزيا مەن سوعىس قاھارمانى حاميت ەرعاليەۆتىڭ، وتتى جىلداردى ولەڭمەن ورگەن سىرباي ماۋلەنوۆتىڭ، مايداننىڭ الدىڭعى شەبىندە ءان سالعان روزا باعلانوۆانىڭ، قىرىققا جۋىق كىتاپ جازعان سوعىس ارداگەرى قالمۇقان يساباەۆتىڭ، مانشۇك جايلى جىر اۆتورى ءازىلحان نۇرشايىقوۆتىڭ سىر-سۇقباتتارىن، سوعىس جايلى وزدەرى ايتقان ەستەلىكتەرىن تىڭداي الاسىزدار. «مەن قازاقپىن» دەپ جىرلاعان جۇبان مولداعاليەۆ پەن ايگىلى پارتيزان قاسىم قايسەنوۆتىڭ دە ەرتەرەكتە التىن قورعا جازىپ الىنعان ءۇن تاسپالارى اۋە تولقىنىنان تاراتىلادى. ايگىلى «سولدات سوعىسقا كەتتى» اۆتوبيوگرافيالىق رومانىنىڭ اۆتورى، جازۋشى، سوعىس ارداگەرى كەمەل توقاۆ تۋرالى ءابىلفايىز ىدىرىسوۆتىڭ التىن قورداعى ەستەلىگى مەن ابۋ سارسەنباەۆتىڭ مايدان جىرلارى ەفيردەن بەرىلىپ، باتىرلارىمىز تىڭدارمانمەن قايتا قاۋىشادى،- دەپ جازدى دۋلات ابيبۋللاەۆ.
جەڭىستى جاقىنداتقان جانداردىڭ ەرلىگىن قۇرمەتتەپ، رۋحىنا تاعزىم ەتۋ ۇراپاققا جۇكتەلگەن زور مىندەت. ايتا كەتۋ كەرەك، ەكىنشى دۇنيەجۇزىلىك سوعىستىڭ اياقتالعانىنا بيىل 75 جىل. وسىنشا ۋاقىت وتسە دە قان مايداننىڭ سۇراپىل كۇندەرى تالاي جۇرەكتەردە سىزات قالدىرىپ، قانشاما شاڭىراقتى ورتاسىنا تۇسىرگەنى ەشقاشان ۇمىتىلمايدى. سوعىسقا اتتانعان 1 ميلليون 200 وتانداسىمىزدىڭ جارتىسىنا جۋىعى ۇرىس دالاسىندا قازا تاپتى، ەلدە قالعاندارى تىلدا ەڭبەك ەتتى، 500 دەن استام قازاقستاندىق كەڭەس وداعىنىڭ باتىرى اتاندى دەلىنگەن راديوارنا ديرەكتورىنىڭ جەلىدەگى جازباسىندا.
"ادىرنا" ۇلتتىق پورتالى
