Qalam men qarýdy qatar ustap, qandy qyrǵynǵa qatysqandardyń ishinde qazaqtyń aqyn-jazýshylary az emes. Jeńis kúni qarsańynda maıdanger aqyn-jazýshylardyń qalamynan týǵan shyǵarmalardy dáriptep, Altyn qordaǵy daýysyn tyńdarmanǵa jetkizý maqsatynda «Qazaq radıosy jańa joba usynbaq. «Batyrlar rýhyna taǵzym» atty on kúndik baǵdarlamalar toptamasy aıasynda 1-10 mamyr aralyǵynda kún saıyn saǵat 17:45-te Qazaq radıosynyń áýe tolqynynan arnaıy habarlar beriledi. Bul týraly óziniń feısbýktegi paraqshasynda «Qazaq radıolary» JShS Bas redaktory – «Qazaq radıosy» radıoarnasynyń dırektory Dýlat Abıbýllaev jazdy.
«Batyrlar rýhyna taǵzym» habarynan qazaq qyzdarynyń arasynan shyqqan tuńǵysh ushqysh Hyıýaz (Hıýaz) Dospanovanyń, poezııa men soǵys qaharmany Hamıt Erǵalıevtiń, otty jyldardy óleńmen órgen Syrbaı Máýlenovtiń, maıdannyń aldyńǵy shebinde án salǵan Roza Baǵlanovanyń, qyryqqa jýyq kitap jazǵan soǵys ardageri Qalmuqan Isabaevtyń, Mánshúk jaıly jyr avtory Ázilhan Nurshaıyqovtyń syr-suqbattaryn, soǵys jaıly ózderi aıtqan estelikterin tyńdaı alasyzdar. «Men qazaqpyn» dep jyrlaǵan Juban Moldaǵalıev pen áıgili partızan Qasym Qaısenovtiń de erterekte Altyn qorǵa jazyp alynǵan ún taspalary áýe tolqynynan taratylady. Áıgili «Soldat soǵysqa ketti» avtobıografııalyq romanynyń avtory, jazýshy, soǵys ardageri Kemel Toqav týraly Ábilfaıyz Ydyrysovtyń Altyn qordaǵy esteligi men Ábý Sársenbaevtyń maıdan jyrlary efırden berilip, batyrlarymyz tyńdarmanmen qaıta qaýyshady,- dep jazdy Dýlat Abıbýllaev.
Jeńisti jaqyndatqan jandardyń erligin qurmettep, rýhyna taǵzym etý urapaqqa júktelgen zor mindet. Aıta ketý kerek, Ekinshi dúnıejúzilik soǵystyń aıaqtalǵanyna bıyl 75 jyl. Osynsha ýaqyt ótse de qan maıdannyń surapyl kúnderi talaı júrekterde syzat qaldyryp, qanshama shańyraqty ortasyna túsirgeni eshqashan umytylmaıdy. Soǵysqa attanǵan 1 mıllıon 200 otandasymyzdyń jartysyna jýyǵy urys dalasynda qaza tapty, elde qalǵandary tylda eńbek etti, 500 den astam qazaqstandyq Keńes odaǵynyń batyry atandy delingen radıoarna dırektorynyń jelidegi jazbasynda.
"Adyrna" ulttyq portaly
