جامبىل وبلىسىنىڭ اكىمى بەردىبەك ساپارباەۆ جول قۇرىلىسى سالاسىنداعى كاسىپورىنداردا بولىپ، قىتاي كومپانيالارىنىڭ باسشىلارىنا «ءتىل تۋرالى زاڭ» مەن قازاقستاندىق جۇمىسشىلاردىڭ جالاقىسى تومەن ەكەندىگىنە توقتالدى، - دەپ حابارلايدى جامبىل وبلىسى اكىمدىگىنىڭ ءباسپاسوز قىزمەتى.
ساپارباەۆ جۇمىس ساپارىمەن شۋ اۋدانىندا بولىپ، ۇزىندىعى 262 شاقىرىمعا سوزىلعان مەركى-بۋرىلبايتال جولىن قايتا قۇرۋ جۇمىستارىنىڭ بارىسىمەن تانىستى. وبلىس اكىمى سالىنىپ جاتقان ۋچاسكەلەردى ارالاپ، جول قۇرىلىس كومپانيالارىنىڭ باسشىلارىمەن كەزدەستى.
بۇل ۇلكەن جوبانى ەكى كومپانيا جۇزەگە اسىرۋدا. قىتايلىق "China Xinxin Corporation" جانە قازاقستاندىق "ABK-Avtodor NS". قىتايلىق مەردىگەرلەرمەن اۋدارماشىنىڭ كومەگىمەن سويلەسكەن ساپارباەۆ قازاقستان زاڭدارىن قاتاڭ ساقتاۋدى تالاپ ەتتى. ول قىتايلىق كاسىپورىنداردىڭ جالاقىسى تومەن ەكەنىنە نازار اۋداردى، ولاردىڭ مولشەرى جىل سايىن كەم دەگەندە 10 پايىزعا ءوسۋى كەرەك. سونداي-اق، ايماق باسشىسى بارلىق جۇمىسشىلار ءۇشىن تەڭ جاعداي جاسالعانىن، ونىڭ ىشىندە جالاقى، تاماقتانۋ جانە جاتىن ورىن ماسەلەلەرىن دە ەسكە سالدى.
«قازاقستان رەسپۋبليكاسىنىڭ زاڭدارى، سونىڭ ىشىندە ءتىل تۋرالى زاڭى قاتاڭ ساقتالۋى كەرەك. ءبىزدىڭ مەملەكەتتىك ءتىلىمىز - قازاق ءتىلى. بارلىق بەلگىلەر قازاق تىلىندە، ونىڭ ىشىندە كىرەبەرىستە ورنالاسقان كومپانيانىڭ اتاۋى دا قازاق تىلىندە بولۋى كەرەك. ۆاحتالىق لاگەرگە بارعان كەزدە مەن سوعان باسا نازار اۋداردىم. مەن تاعى دا وسىندا كەلىپ، نۇسقاۋلارىمنىڭ قالاي ورىندالعانىن تەكسەرەمىن »، - دەدى ساپارباەۆ.
اكىم جول بويىندا مال وتۋگە ارنالعان جولدار سالىنىپ، سۋارىلاتىن ارىقتار مەن كوپىرلەر جوندەلۋى قاجەت ەكەنىن ەسكەرتتى. جول جوندەۋ جۇمىستارى كەزىندە جەرگىلىكتى 13 تۇرعىننىڭ ءۇيىنىڭ قابىرعالارىندا جارىقتار پايدا بولعان، ولاردى 15 كۇننەن كەشىكتىرمەي جوندەۋ كەرەك. بۇل ءۇشىن 8,5 ميلليون تەڭگە قاجەت.
«قازاقستاندا بيزنەستىڭ الەۋمەتتىك جاۋاپكەرشىلىگى دەگەن ۇعىم بار. كومپانيالار جاقىن ماڭداعى ەلدى مەكەندەرگە، اۋدان ورتالىعىنا الەۋمەتتىك ماسەلەلەردى شەشۋگە كومەكتەسۋى كەرەك. ءبىز، اسىرەسە، كوروناۆيرۋس جاعدايىن ەسكەرە وتىرىپ، از قامتىلعان، كوپ بالالى وتباسىلارعا كومەكتەسۋىمىز قاجەت»، - دەدى ساپارباەۆ.
اكىمدىكتىڭ حابارلاۋىنشا، قىتاي كومپانيالارىنىڭ باسشىلارى ساپارباەۆتىڭ تالاپتارىنا تولىق كەلىسكەن.
"ادىرنا" ۇلتتىق پورتالى
