اپتانىڭ اپتىعى ەرنار ايداردىڭ قامالۋى بولدى. الماتى قالاسى ەكونوميكالىق تەرگەۋ دەپارتامەنتى مەن پوليتسيا قىزمەتكەرلەرى الەۋمەتتىك جەلىدە جالعان لوتەرەيا ويىنىن ۇيىمداستىرعانداردى انىقتادى. ولاردىڭ اراسىندا ەلگە تانىمال ءانشى ەرنار ايدار دا بار دەپ الدىندا حابارلاعان بولاتىنبىز.
"بۇل توپ 2020 جىلدىڭ 23 اقپان مەن 23 ءساۋىر ارالىعىندا وتە قىمبات ۇتىس سىيلىقتارىن - ياعني 4 اۆتوكولىك (2 سەدان جانە 2 دجيپ), الماتى قالاسىندا ءبىر بولمەلى پاتەر جانە باسقا دا تۇرمىستىق تەحنيكانى ويناتپاق بولىپ، جالعان لوتەرەيا ويىنىن ۇيىمداستىرعان. الايدا، جوعارىدا كورسەتىلگەن قۇندى سىيلىقتار بولماعان. ولار لوتەرەيا ويىنىنا قاتىسۋشىلاردى سەندىرۋ ءۇشىن 4 اۆتوكولىكتى باسقا جەكە تۇلعالاردان جالعا العاندىعى انىقتالدى", - دەلىنگەن رەسمي تاراتىلعان حابارلامادا.
ارتىنان ەرنار ايدار ءوزىنىڭ ينستاگرامم پاراقشاسى ارقىلى حالىققا ۇندەۋ جولداپ، ءوزىنىڭ الاياقتارعا الدانىپ قالعانىن، جەلىدە ءوزىن جازعىرىپ جازعان جۇرتقا اللا سابىر بەرسىن دەپ اياقتاعان ۆيدەوۇندەۋىن.
وسى ورايدا حالىق تا "لوتەرەيا ويىنىن وتكىزگەن تەك قانا ەرنار ەمەس، ولاردىڭ ىشىندە قايرات نۇرتاس، بۇركىت، ءمادينا سادۋاقاسوۆا، نۇرلان ەسپانوۆ، ايقىن، ايگۇل يمانباەۆا، سيۆي ماحمۋدي، باعلان ءابدىرايىموۆ، قاراقات ءابىلدينالار دا بار. سەمينار-ترەنينگ وتكىزىپ اقشا تاۋىپ جۇرگەن اينۇر تۇرسىنباەۆا، قۇرالاي حانىم، ومار جالەل بارلىعى دا جاۋاپقا تارتىلسىن" دەپ اشىنا جازىپ جاتىر. وسى كۇنگە دەيىن قانشاما انشىلەر ماشينا، پاتەر ويناتقانىنان جەلىدەگى جۇرت جاڭىلىپ قالعان سياقتى. ەرنار ايداردىڭ "اتى-شۋلى" لوتەرەياسىندا قويىلعان ءتورت كولىك پەن پاتەردىڭ بولماعانىن، ۇتىپ الۋشىلار وزدەرىنىڭ "پودستاۆنوي" ادامدارى بولعانىن ەسەپكە الساق، باسقا انشىلەر دە وسى ىزبەن جۇرگەن دەپ بولجام جاساۋعا نەگىز بار سياقتى.
ءبىز اتتارى اتالعان "جۇلدىزداردىڭ" ينستاگرامم پاراقشالارىن ءبىر ءسۇزىپ شىقتىق. "ايتىستىڭ اققۋى" اتانعان اينۇر تۇرسىنباەۆانىڭ ينستا پاراقشاسىنا مىنانداي جارناما سالىنىپتى.
قۇرالاي حانىم دەگەن اتپەن تانىمال پسيحولوگتىڭ ينستا پاراقشاسىنا كىرگەنىمىزدە ەشقانداي جارناما ءماتىنىن تابا المادىق. ينستاپاراقشاسىنا تىركەۋلى نومىرىنە حابارلاسپاقشى بولىپ باسىپ ەدىك، اۆتوماتتى تۇردە ۆاتساپ نومىرىنە كىردىك. كىرگەن بەتتە بىزگە مىنانداي ءماتىن شىقتى.
بەلگىلى ءانشى، قوعامداعى كەلەڭسىزدىكتەردى جاسقانباي ايتىپ جۇرگەن مەرۋەرت تۇسىپباەۆا ءوزىنىڭ ينستاگرامم پاراقشاسىندا "ەرناردى تۇسىنەمىن، جاس قوي... كورگەنى سول بولسا...(؟!) مەن ءالى كۇنگە روزا رىمباەۆاعا ەلىكتەيمىن" دەگەن جازبا قالدىرىپتى.
استىنداعى 400-دەن استام پىكىرلەردى وقىپ، توبە شاشىمىز تىك تۇردى. "حالىق قۇدايدىڭ ءبىر اتى" دەيتىن بولساق، جۇرتشىلىق قاي ءانشى قانشا اقشاعا، قاشان لوتەرەيا ويناتقانىنا دەيىن جازىپ وتىر.
تالاي انشىلەردى "جۇلدىز" جاساپ، تەلەديدارعا اكەلگەن بەلگىلى جۋرناليست ارمان سقابىلۇلى وسى كۇنگە دەيىن لوتەرەيانىڭ زاڭ بويىنشا تيىم سالسا دا توقتاماي تۇرعانىن، حالىقتى الداۋدى توقتاتۋ كەرەكتىگىن تالاي مارتە مالىمدەدى دە.
قاسيەتتى ساحنانى فانەرششيكتەردەن تازالاپ، ولارعا قارسى "قاسيەتتى سوعىس" جاريالاپ جۇرگەن مادەنيەتتانۋشى، ءداستۇرلى ءانشى ەرلان تولەۋتاي " بۇلار مەن ءۇشىن قاشاندا الاياق فانەرششيك بولاتىن، بۇدان بىلاي دا، əماندا افەريست بولىپ قالا بەرمەك" دەگەن جازبا قالدىرىپتى.
كەرەك دەرەك
«لوتەرەيالار جانە لوتەرەيا قىزمەتى تۋرالى» زاڭنىڭ 4-ءشى بابىنىڭ 2-ءشى جانە 3-ءشى پۋنكتەرىندە بىلاي كورسەتىلگەن.
4-باپ. لوتەرەياعا قاتىسۋشىلار قۇقىقتارىنىڭ كەپىلدىكتەرى
2) ۇتىستى تولەۋدى تالاپ ەتۋگە قۇقىلى.
3. لوتەرەياعا قاتىسۋشى لوتەرەيا وپەراتورىنىڭ شەشىمدەرىن جانە ارەكەتتەرىن (ارەكەتسىزدىگىن) سوتتا داۋلاۋعا قۇقىلى.
قازىر قولدانىپ جۇرگەن «لوتەرەيالار جانە لوتەرەيا قىزمەتى تۋرالى» زاڭ 2016 جىلى قابىلدانعان. الايدا قازىر ول زاڭعا ەنبەي قالعان بىرقاتار ءماسەلە بارى انىقتالىپ، اقپان ايىندا مادەنيەت جانە سپورت مينيسترى اقتوتى رايىمقۇلوۆا ماجىلىستە نورماتيۆتىك اكتىلەرگە تۇزەتۋ ەنگىزىلىپ، تولىقتىرىلۋدى ۇسىنعان بولاتىن.
پارلامەنت ءماجىلىسىنىڭ توراعاسى نۇرلان نىعماتۋلين زاڭ جوباسىن ەكىنشى وقىلىمعا دەيىن جان-جاقتى جەتىلدىرىپ، ءتىپتى زاڭسىز لوتەرەيا ويناتقان ادامداردى قىلمىستىق جاۋاپكەرشىلىككە تارتۋدى ۇسىنعان بولاتىن.
"ادىرنا" ۇلتتىق پورتالى
فوتو KAZ content فب پاراقشاسىنان الىندى
