ومىرزاق اقجىگىت: ساۋدا-ساۋىق-سايران ورتالىقتارى حالىقتى اسىراي الا ما؟

1864

قر پرەزيدەنتى ق.توقاەۆقا: ساۋدا-ساۋىق-سايران ورتالىقتارى مەن اۆتوسالوندار، اۆياكومپانيالار مەن اەروپورتتار اسىراي ما حالىقتى ەرتەڭ؟..

قۇرمەتتى پرەزيدەنت مىرزا!

بۇگىنگى داعدارىسقا بايلانىستى ۇكىمەتىمىز 361 مەكەمەگە قارجىلاي كومەك كورسەتەتىن بولىپ جاتىر. ول تىزىمدە 218 قۇرىلىس (ونىڭ 80- BI Group قاراستى), 86 – ساۋدا مەن جىلجىمايتىن مۇلىكتى جالعا بەرۋشىلەر، 26 – كولىك، 15 – ەنەرگەتيكا جانە 5 – تاۋ-كەن كومپانياسى بار ەكەن. بىراق، ءبىر دە ءبىر ءوندىرىس كومپانياسى جوق كورىنەدى. ونى سارالاعان قر ونەركاسىپشىلەر مەن كاسىپكەرلەر وداعى مالىمدەمە جاساپتى.

مالىمدەمەدەگى «اۆياكومپانيالار مەن اەروپورتتارعا، ەنەرگەتيكالىق، ەليتالىق تۇرعىن ءۇي سالاتىن جانە ەليتالىق اۆتوموبيل ساتاتىن كومپانيالارعا قولداۋ كورسەتۋگە باسىمدىق بەرۋگە بولمايدى»; «تىزىمگە ماقساتى مەن باعىتى جاعىنان مەملەكەتتەن كومەك الۋعا ءتيىس ەمەس بيزنەس وكىلدەرىنىڭ كىرۋىنە جول بەرۋگە بولمايدى!»; «ۇكىمەتتىڭ ناقتى ءوندىرىس كاسىپورىندارىنا كومەك كورسەتۋدىڭ ورنىنا ميللياردتاردى تاريفتى كوتەرىپ قويىپ، اسا ءبىر مۇقتاجدىق كورمەيتىن مونوپوليستەرگە جۇمساۋى مەملەكەتتىك ۇيىمداردىڭ بەدەلىن تۇسىرەدى، وعان جول بەرۋگە بولمايدى!»; «بۇل – بارلىق كاسىپكەرلەر مەن ەلدىڭ بۇكىل تۇرعىندارىنىڭ بەتىنە تۇكىرۋ بولىپ كورىنەدى» دەگەن، «ءتىزىمدى قايتا قاراۋ كەرەك!» دەگەن سوزدەرىن وقىعانىڭىزعا كۇمانىم جوق. بۇدان ارتىق اششى دا اقيقي ايتۋ مۇمكىن ەمەس.

مەن تەك ءوز تاراپىمنان مۇنداي قارجىنى ەڭ الدىمەن اۋىل شارۋاشىلىعىن كوتەرۋگە: ەگىنشىلىكتى ينتەنسيۆتى پايدالانۋعا كوشىرۋگە، ودان دا بۇرىن ەتتى، ءسۇتتى، ءجۇن مەن تەرىنى تەرەڭدەتە وڭدەۋ ىسىنە جۇمساۋعا مىندەتتى ەكەنىمىزگە ءسىزدىڭ نازارىڭىزدى اۋدارعىم كەلەدى. بۇل ماسەلە 30 جىلدان بەرى ايتۋداي ايتىلىپ، بىراق، ءالى كۇنگە قولعا الىنباي-اق قويعان ماسەلە. ءبىزدىڭ ءسۇت پەن ايراندى، سارىماي مەن ىرىمشىكتى رەسەي مەن قىرعىزستاننان، ەتتى ...ارگەنتينا مەن برازيليادان الىپ وتىرعانىمىز ەستىگەن قۇلاقتان ۇيات. ءسىز وسى داعدارىستى، توتەنشە جاعدايدى پايدالانىپ اۋىل شارۋاشىلىعىن كوتەرىپ الماساق، ەرتەڭ اقشا تابا الماي قالامىز. ءبىز سوندا عانا باياعىدا برەندىمىزگە اينالۋعا ءتيىس ەكولوگيالىق تازا تاعام ونەركاسىبى مەن كيىم شىعاراتىن جەڭىل ونەراسىپكە نەگىز سالىپ الامىز. سوندا عانا حالقىمىز قانداي داعدارىس بولسا دا ءوزىنىڭ اش-جالاڭاش قالمايتىنىنا سەنىمدى بولادى. ويتكەنى، ماقتا مەن ءجۇنىمىز، تەرىمىز بار ءبىزدىڭ ىشكيىم-كويلەكتەن باستاپ ىشىك-تونعا دەيىن ءوزىمىزدى تولىق قامتاماسىز ەتۋگە مۇمكىندىگىمىز جەتىپ-ارتىلادى. سىرتى قۇندىزداي جىلتىرايتىن، ىشىندە نەشە ءتۇرلى جىلىتقىشى بار جەپ-جەڭىل تايجاقى جاۋىن مەن ايازدان بىردەي قورعايتىن، ناعىز الەمدىك قازاق برەندى بولار ەدى...
داعدارىس ۇزاققا سوزىلمايدى دەپ ەشكىم كەپىلدىك بەرە المايدى. مۇنايدىڭ باعاسى كوتەرىلمەي قويسا، ەكسپورتقا شىعاراتىن ءونىمىمىز شامالى-اق، سوندا نە ىستەيمىز؟ جارايدى، 1 ميلليون وليگارحتار مەن بايلار قينالا قويماس، قالعان 17 ميليون حالىقتى نەمەن اسىرايسىز؟ جاۋاپكەرشىلىك ءسىزدىڭ موينىڭىزدا عوي؟ جاپونيا مەن قىتاي وتكەن، «ءبىر اۋىل – ءبىر ءونىم» قاعيداسىن ۇستانساق، «ۆسە سيلى – نا دەنيكينا!» دەگەن لەنيننىڭ ىزىمەن «بار كۇشىمىز – اۋىلدى وركەندەتۋگە!» دەگەن ۇرانمەن قيمىلدساق، ءبىر-ەكى جىلدا «گۇلدەنسە اۋىل – گۇلدەنەمىز ءبارىمىز!» دەگەن بەيىمبەت اتامىزدىڭ ارمان-وسيەتىن ىسكە اسىرار ەدىك.
بۇگىن تاڭدا حالىققا، اسىرەسە قازاققا ەڭ ءبىرىنشى كەرەگى – كۇندەلىكتى تاماعى مەن باسىنا باسپانا. تاماق جايىن اۋىلدى كوتەرىپ شەشە الاسىز. باسپانانى شەشۋ ءۇشىن – استانا مەن الماتىدان باستاپ بارلىق قالاداعى جالعا بەرىلەتىن جانە بوس تۇرعان پاتەرلەردى تەكسەرتىڭىز. مىڭداعان ەمەس، ءجۇز مىڭداعان قازاققا باسپانا تاۋىپ بەرەسىز!..
قۇرمەتتى پرەزيدەنت مىرزا! ۇلتتىڭ تاعدىرى شەشىلەتىن ساتتە قىزمەت مارتەبەسى ماعدايىڭىزعا بۇيىردى. باتىل دا جەدەل قيمىل كۇتەدى ەل-جۇرت سىزدەن. ويتكەنى، مۇمكىنشىلىك تە، اۋىدان شىققان ءسوز سەكىلدى، قايتىپ كەلمەيتىنىن ءسىز جاقسى بىلەسىز.
ءىسىڭىزدىڭ العا باسۋىنا تىلەكتەسپىن. اللا-تاعالا وزىڭىزگە جار بولسىن!

قۇرمەتپەن، ومىرزاق اقجىگىت، تاۋەلسىز جۋرناليست

پىكىرلەر
رەداكتسيا تاڭداۋى