الماتى وبلىسى جاۋعاشتى اۋىلىنداعى لا-155/4 ايەلدەر كولونياسىندا جازاسىن وتەپ جاتقان اياعى اۋىر ايەلدەن كوروناۆيرۋس تابىلدى. بۇل تۋرالى رەسپۋبليكالىق قىلمىستىق اتقارۋ جۇيەسى كوميتەتىنىڭ ءباسپاسوز قىزمەتىنە سىلتەمە جاساپ، centralasian.org حابارلادى.
اقپارات بويىنشا، تۇتقىن اياعى اۋىر بولۋىنا بايلانىستى ىلە اۋدانىنىڭ ورتالىق اۋداندىق اۋرۋحاناسىندا تەكسەرۋدەن وتكەن. كەيىنىرەك اۋرۋحانادا كوروناۆيرۋس تابىلىپ، كارانتينگە جابىلعان. رەسمي اقپارات بويىنشا، ينفەكتسيا انىقتالعانعا دەيىن ايەل كولونيانىڭ مەديتسينالىق بولىمىندە تۇتقىنداردان بولەك وڭاشا پالاتادا بولعان. پەرزەنتحاناعا جاتۋ ءۇشىن تەكسەرىلگەن كەزدە كوروناۆيرۋس انىقتالىپ، ورتالىق اۋرۋحاناعا جاتقىزىلعان.
قىلمىستىق اتقارۋ جۇيەسى كوميتەتى ايەلمەن ارالاسقان تۇتقىنداردىڭ ينفەكتسيالىق يزولياتورعا اۋىستىرىلىپ، تەكسەرۋدەن وتكەنىن، مەكەمەدە سانيتارلىق-زالالسىزداندىرۋ جۇمىستارى جۇرگىزىلگەنىن، ءدارى-دارمەك جەتكىلىكتى ەكەنىن ايتادى.
ال تۇتقىندار سوزىنە سۇيەنگەن Vlast سايتىنىڭ جازۋىنشا، كولونيا ىندەتكە دايىن بولماعان. اتى-ءجونىن اتاماعان تۇتقىنداردىڭ ءبىرى سايتقا كوروناۆيرۋس تابىلعان ايەلدىڭ تۇرمەگە ەكى اپتا بۇرىن ەتاپپەن جەتكىزىلگەنىن، مەكەمەدە قاتاڭ كارانتيندىك شارالار ەنگىزىلىپ، تۇتقىنداردىڭ جاعدايى قيىن ەكەنىن ايتقان. ونىڭ ايتۋىنشا، ناۋقاس تۇتقىنداردىڭ كوبىمەن ارالاسقان.
دەنساۋلىق ساقتاۋ مينيسترلىگىنىڭ ءباسپاسوز حاتشىسى دياس احمەتشارىپتىڭ ايتۋىنشا، مەكەمەگە جاقىن جەردەگى بالالار ۇيىنە 18 ايەل جانە 18 بالا كارانتينگە جاتقىزىلعان. وندا ءبىر دارىگەر، 6 مەدبيكە بار. كولونياعا ناۋقاسپەن بايلانىستا بولعانداردى تەكسەرۋ ءۇشىن مەديتسينا قىزمەتكەرلەرى جەتكەن.
رەسمي مالىمەت بويىنشا، قازاقستاندا 2717 ادامنان كوروناۆيرۋس تابىلعان. 25 ادام قايتىس بولعان. 682 ادام جازىلعان.
