ءانشى بۇركىت «نيەت» تەلەجوباسىنىڭ Instagram جەلىسىندە تىكەلەي ەفيرگە شىعىپ، كوكەيدەگى سۇراقتارعا جاۋاپ بەردى. وتاندىق شوۋ-بيزنەستەگى تانىمال تۇلعالاردىڭ ءبىرى پرەزيدەنتكە ۇندەۋ جولداپ، كارانتين مەرزىمىن مەيىلىنشە قىسقارتۋ كەرەكتىگىن ايتقان بولاتىن. ءانشى وسى جانە كوكەيدە جۇرگەن وزگە دە ماڭىزدى سۇراقتارعا توقتالدى دەپ جازادى Adyrna.kz.
«كارانتين كوپتەگەن وتباسىعا وڭاي ءتيىپ جاتقان جوق. سول سەبەپتى، شامامىز كەلگەنشە تۇرمىسى تومەن جانۇيالارعا كومەك كورسەتۋدەمىز. مەنىڭ Instagram-داعى پاراقشاما كومەك سۇراپ، حات جازاتىندار كوپ. بىراق مەن ءوز كوزىم جەتكەن جاندارعا قول ۇشىن سوزعاندى ءجون كورەم. وسىعان دەيىن الماتىنىڭ ءبىراز بۇرىشىن ارالاپ، جاعدايى قيىن جانۇيالارعا ازىق-تۇلىك تاراتتىم. بۇل ءىس-ارەكەتىمدى ەلگە كورسەتۋىمنىڭ سەبەبى جوق ەمەس. ءبىز حالىق الدىندا جۇرگەن سوڭ، ءاربىر قادامىمىزدى ەل ءبىلىپ وتىرادى. ەشكىمگە ايتپاي، وزىمە جانە اللاعا عانا ايان ەتىپ، قايىرىمدىلىق جاساۋىما بولادى، ارينە. بىراق وسى كەزدە حالىق مەنى كىنالاي باستايدى. «ەل باسىنا اۋىر جاعداي تۋعاندا نە ءۇشىن حالىققا جاردەم بەرمەيسىڭدەر» دەپ جازعىرادى. سوندىقتان، جاريا ساداقا جاساۋدى ءجون كوردىم»، - دەيدى ءانشى.
سونداي-اق، بۇركىت انشىلەر كومەك كورسەتۋگە مىندەتتى دەگەن پىكىردىڭ ورىنسىز ەكەنىن ايتتى.
«مۇنداي جاعدايدا جۇدىرىقتاي جۇمىلىپ، شامامىز كەلگەنشە كومەكتەسكەن دۇرىس. بىراق كومەك بەرمەدىڭ دەپ انشىلەردى كىنالاۋعا بولمايدى. اركىم ءوز ءحالى جەتكەنشە كومەك بەرسىن. كومەك بەرە المايتىندار دا بار. ەشكىم ەشكىمدى مىندەتتەمەۋى قاجەت»، - دەيدى ول.
سۇحبات بارىسىندا وتاندىق جۇلدىز الداعى بولۋى مۇمكىن داعدارىسقا توقتالىپ، ءوز باسىنداعى قيىن كەزدەردى جانە ءوزىنىڭ قالاي كوتەرىلگەنىن دە اڭگىمەلەدى.
«داعدارىس بولىپ جاتسا، ايتەۋىر ءبىر ءىستىڭ كوزىن تابارىم انىق. قولىمىزدان ءبىرشاما ءىس كەلەتىن جىگىتپىز. ماسەلەن، 2008 جىلعى داعدارىس كەزىندە انشىلەرگە قيىن سوقتى. ەشقانداي توي جوق، كونتسەرتتەر جوق. سول زامانداردا اۆتوكولىك جۋىپ تا قيىندىقتان وتتىك. سوندىقتان، ەكى قولعا ءبىر كۇرەك تابىلارى انىق. ءدال قازىر بيزنەسىم جوق. ءبارىن ساتىپ جىبەردىم. ويتكەنى، ونەرگە كوپ ۋاقىت كەرەك. ال وسى كۇنگە جەتۋىمە ءبىرىنشى سەبەپ بولعان - ءوزىمنىڭ ىنتا-جىگەرىم. ءۇيدىڭ كىشىسى بولسام دا، اتا-انام ارمانىمدى ورىنداۋ ءۇشىن الماتىعا جىبەردى. ءان ايتسام، انشىلەر توبىن قۇرسام دەپ ارماندايتىنمىن. وسى كۇنگە ۇلكەن ەڭبەكتىڭ ارقاسىندا جەتتىم. ارينە، قالتالى اعالارىمنان دا كومەك بولدى. ولار شەتەلدە، اپتاسىنا 100 دوللاردان بەرىپ تۇراتىن. 1995-1998 جىلدار ارالىعىندا بۇل ۇلكەن اقشا»، - دەدى ول.
